விழுப்புரம் மாவட்டம் மதுராந்தகம் சட்டமன்றத் தொகுதி இடைத்தேர்தல் பிரச்சார கூட்டத்தில் தேர்தல் நடத்தை விதிகள் மற்றும் சொன்னை நீதிமன்றத்தின் உத்தரவை மீறிப் பேசியதாக, தமிழக வெற்றிக் கழகத் தலைவர் விஜய் மற்றும் மாநில பொதுப்பணித்துறை அமைச்சர் ஆதவ் அர்ஜுனா ஆகியோர் மீது திமுக தரப்பில் இந்திய தேர்தல் ஆணையத்திடம் புகார் அளிக்கப்பட்டுள்ளது.
கடந்த வியாழக்கிழமையன்று மதுராந்தகத்தில் நடைபெற்ற தேர்தல் பிரச்சாரக் கூட்டத்தில் பேசிய தவெக நிர்வாகிகள், போக்ஸோ வழக்கு தொடர்பான விவகாரத்தில் திமுகவையும் அதன் தலைவர்களையும் தொடர்புபடுத்திப் பேசியதாகக் கூறப்படுகிறது. முன்னதாக, ஜெம் கிரானைட்ஸ் நிறுவன உரிமையாளர் வீராமணி மீதான போக்ஸோ வழக்கு தொடர்பாக திமுக அல்லது அதன் நிர்வாகிகளை இணைத்துப் பேசக்கூடாது என்று சென்னை உயர் நீதிமன்றம் தெளிவான உத்தரவைப் பிறப்பித்திருந்தது. திமுக பொதுச்செயலாளர் துரைமுருகன் தொடர்ந்த அவதூறு வழக்கின் விசாரணையின் போது, தவெக அமைச்சர்கள் சி.டி. நிர்மல் குமார் மற்றும் ஆதவ் அர்ஜுனா ஆகியோருக்கு நீதிமன்றம் இந்தத் தடையை விதித்திருந்தது.
நீதிமன்றத்தின் இந்த வழிகாட்டுதலைப் பொருட்படுத்தாமல், தவெக தலைவர்கள் இருவரும் பிரச்சார மேடையில் பேசியது நீதிமன்ற உத்தரவை நேரடியாக மீறும் செயல் எனத் தெரிவித்து, திமுக மாநிலங்களவை உறுப்பினர் ஜே. கான்ஸ்டன்டைன் ரவீந்திரன் தலைமைத் தேர்தல் ஆணையரிடம் புகார் மனுவை அளித்துள்ளார்.
