திருப்பூர்:

தாராபுரம் சட்டமன்றத் தொகுதி இடைத்தேர்தல் பிரச்சாரத்தில் தவெக மற்றும் அதிமுகவினருக்கு இடையே மோதல் ஏற்பட்டதாகக் கூறப்படும் நிலையில், இதுகுறித்து பிற்படுத்தப்பட்டோர் நலத்துறை அமைச்சர் சம்பத்குமார் விளக்கம் அளித்துள்ளார்.

பிரச்சாரத்தில் வாக்குவாதம்:

திருப்பூர் மாவட்டம் தாராபுரம் சட்டமன்றத் தொகுதி இடைத்தேர்தல் வரும் அக்டோபர் 6-ஆம் தேதி நடைபெறவுள்ளதை முன்னிட்டு பிரச்சாரம் சூடுபிடித்துள்ளது. இந்நிலையில், தவெக வேட்பாளர் சத்தியபாமாவை ஆதரித்து அமைச்சர் சம்பத் குமார் நஞ்சியம்பாளையம் பகுதியில் பிரச்சாரத்தில் ஈடுபட்டார். அப்போது அப்பகுதிப் பொதுமக்கள் அடிப்படை வசதிகள் மற்றும் குடிநீர் பிரச்சினைகள் தொடர்பாக அமைச்சரிடம் கோரிக்கைகளை முன்வைத்தனர். அந்த சமயத்தில் அங்கு வந்த அதிமுக தொண்டர்களுக்கும் தவெகவினருக்கும் இடையே வாக்குவாதம் ஏற்பட்டு, பின்னர் மோதலாக மாறியதாகக் கூறப்படுகிறது.

போலீசார் பாதுகாப்பு:

மோதல் காரணமாக அப்பகுதியில் சிறிது நேரம் பதற்றமான சூழல் நிலவியது. சம்பவ இடத்திற்கு விரைந்து வந்த போலீசார் இரு தரப்பினரையும் விலக்கி வைத்துப் பாதுகாப்புப் பணியில் ஈடுபட்டனர்.

அமைச்சர் சம்பத்குமார் விளக்கம்:

இன்று தாராபுரம் தேர்தல் பணிமனையில் கட்சி நிர்வாகிகளுடன் ஆலோசனை நடத்திய பின்னர் செய்தியாளர்களிடம் பேசிய அமைச்சர் சம்பத் குமார், “மக்கள் பேராதரவுடன் நாங்கள் களத்தில் இருக்கிறோம். நேற்று எங்கள் பிரச்சாரம் சிறப்பாக நடைபெற்றுக் கொண்டிருந்தபோது, பிரச்சாரத்தைத் திசைதிருப்பும் நோக்கில் வேறு பகுதியைச் சேர்ந்த சிலர் திட்டமிட்டு வந்து பிரச்சனை செய்தனர். இந்த மோதலில் தவெகவைச் சேர்ந்த சில தொண்டர்கள் காயமடைந்து மருத்துவமனையில் சிகிச்சை பெற்று வருகின்றனர். இது குறித்து போலீசார் விசாரித்து வருகின்றனர்; விசாரணையின் முடிவில் இதன் பின்னணி வெளிவரும்” என்று தெரிவித்தார்.

#Dharapuram #TVK #AIADMK #MinisterSampathKumar #ByElection2026 #Tiruppur #TNPolitics #BmNews #TamilNews #BreakingNewsTN #TamilNaduNews #LatestNews #TamilNewsLive