எல் நினோ நிலைமை வலுவடைந்து வருவதால், எதிர்வரும் ஒக்டோபர் மற்றும் நவம்பர் மாதங்களில் நாட்டில் மழைவீழ்ச்சி அதிகரிக்கக்கூடும் என வளிமண்டலவியல் திணைக்களம் எதிர்வுகூறியுள்ளது.
இதனால், சில பகுதிகளில் வெள்ள நிலைமை ஏற்படக்கூடும் என்பதால், அதற்குத் தயாராக வேண்டிய நிலை ஏற்படலாம் எனவும் எச்சரிக்க தெரிவிக்கப்பட்டுள்ளது.
பசுபிக் கடலில் எல் நினோ நிலைமை வலுவடைந்து வருவதுடன், எதிர்வரும் நாட்களில் வங்காள விரிகுடா பகுதியில் வானிலை செயற்பாடுகள் அதிகரிப்பதுமே இதற்கு முக்கியக் காரணமாகும் என வளிமண்டலவியல் திணைக்களம் குறிப்பிட்டுள்ளது.
அதற்கமைய, அடுத்த சில நாட்களில் நாட்டின் தென்மேற்கு பகுதிகளில் மழையுடனான வானிலை நிலவும் என எதிர்பார்க்கப்படுகிறது.
வறட்சியான வானிலை நிலவும் பகுதிகளில் எதிர்வரும் 28 அல்லது 29 ஆம் திகதி முதல் இடியுடன் கூடிய மழை பெய்யக்கூடும் எனவும் வளிமண்டலவியல் திணைக்களம் எதிர்வுகூறியுள்ளது.
இதனிடையே, மேல் மற்றும் சபரகமுவ மாகாணங்களிலும், காலி, மாத்தறை, கண்டி மற்றும் நுவரெலியா மாவட்டங்களிலும் அவ்வப்போது மழை பெய்யக்கூடும் எனவும் தெரிவிக்கப்பட்டுள்ளது.
ஊவா மாகாணத்திலும், மட்டக்களப்பு மற்றும் அம்பாறை மாவட்டங்களிலும் சில இடங்களில் இடியுடன் கூடிய மழை பெய்யக்கூடும் என்றும் கடற்பகுதிகளைப் பொறுத்தவரை, காங்கேசன்துறை முதல் புத்தளம் வரையிலும், மாத்தறை முதல் பொத்துவில் வரையிலும் காற்றின் வேகம் மணிக்கு 50 முதல் 55 கிலோமீற்றர் வரை அதிகரிக்கக்கூடும்.
இதனால், கடற்றொழிலாளர்கள், கடற்படையினர் மற்றும் கடலோர மக்கள் அவதானமாக இருக்குமாறு வானிலை ஆய்வு திணைக்களம் அறிவுறுத்தியுள்ளது.
பலத்த மழைக் காரணமாக அதிகரித்திருந்த ஆறுகளின் நீர்மட்டம் தற்போது படிப்படியாகக் குறைந்து வருவதாக நீர்ப்பாசனத் திணைக்களம் தெரிவித்துள்ளது.
எனினும், மில்லகந்த பகுதியில் குடா கங்கை, பத்தேகம பகுதியில் ஜின் கங்கை மற்றும் தல்கஹகொட பகுதியில் நில்வளா கங்கை ஆகியன தொடர்ந்தும் சிறிய வெள்ள மட்டத்தில் காணப்படுகின்றன.
எவ்வாறாயினும், இந்தப் பகுதிகளில் ஆறுகளின் நீர்மட்டம் தொடர்ந்து குறைந்து வருவதாக தெரிவிக்கப்பட்டுள்ளது.
இதேவேளை, பனாடுகம பகுதியில் நில்வளா கங்கையின் நீர்மட்டம் எச்சரிக்கை மட்டத்தை அடைந்திருந்த போதிலும், தற்போது அதுவும் குறைந்து வருவதாக நீர்ப்பாசனத் திணைக்களம் குறிப்பிட்டுள்ளது.
