பயங்கரவாத தடைச்சட்டத்தை நீக்குவோம் என தேர்தல்காலத்தில் வாக்குறுதி வழங்கிய அரசாங்கம் தற்போது நடைமுறையில் காணப்படும் பயங்கரவாத தடைச்சட்டத்தை விட ஆபத்தான சட்டத்தை கொண்டுவர முயல்கின்றது என மக்கள் போராட்ட முன்னணியின் செயற்பாட்டாளர் ராஜ்குமார் ரஜீவ்காந் தெரிவித்துள்ளார்.
கொழும்பில் இடம்பெற்ற செய்தியாளர் மாநாட்டில் அவர் மேலும் குறிப்பிட்டுள்ளதாவது
அரசை பயங்கரவாதத்திலிருந்து பாதுகாப்போம் என்ற புதிய பயங்கரவாத தடைச்சட்ட வரைபு வெளியாகியிருக்கின்றது.
பயங்கரவாத தடைச்சட்டத்தை நீக்கப்போகின்றோம் என மக்களுக்கு தங்கள் கொள்கை பிரகடனத்தில் தெளிவாக அச்சடித்து வெளியிட்டு வாக்குகளை வாங்கிய இந்த அரசாங்கம் பயங்கரவாத தடைச்சட்டத்தை விட மோசமான சட்டத்தை கொண்டுவருவதற்கான வரைபை வெளியிட்டுள்ளது.
அரசாங்கம் இந்த சட்டமூலம் மூலம் தீவிரவாதம் அல்லது பயங்கரவாதம் என்பதை ஒரு மிகப்பெரிய வரையறைக்குள் கொண்டு செல்கின்றது.
இன்று நீங்கள் ஒரு பொதுச்சொத்து அல்லது உடமையொன்றிற்கு சேதத்தை ஏற்படுத்தினால் கூட தீவிரவாதியாக பார்க்கப்படுவீர்கள்.
அதேபோன்று சுகாதார சேவைகளுக்கு பாதிப்பை ஏற்படுத்தினால் பாதையொன்றை மறித்து பாதிப்பை ஏற்படுத்தினால் நீங்கள் தீவிரவாதி பயங்கரவாதி, போராட்டங்கள் எதிர்ப்புகள் எல்லாம் பல வழிகளில் பயங்கரவாதமாக பார்க்கப்படபோகின்றது.
ஒருவரை தடுத்துவைப்பதற்கான ஆணை என்பது இதுவரை காலமும் பாதுகாப்பு அமைச்சரிடமிருந்தது இனிமேல் அது பாதுகாப்பு அமைச்சரின் செயலாளரிடம் இருக்கப்போகின்றது அவரின் கையெழுத்தின் மூலம் ஒருவரை எத்தனை காலமும் தடுத்துவைக்க முடியும்.
புதிய பயங்கரவாத தடைச்சட்டத்தை எப்படி பயன்படுத்தப்போகின்றார்கள் என நினைத்தால் அச்சம் ஏற்படுகின்றது..
சாதாரண சட்டங்களில் காணப்படும் விடயங்களை எல்லாம் பயங்கரவாதமாக மாற்றிவைத்திருக்கின்றார்கள் எனவே சாதாரண அரசியலில் ஈடுபடுபவர் அரசியலை பேசுபவர் எல்லாம் பயங்கரவாதியாக மாற்றப்படக்கூடிய சூழ்நிலையை இந்த புதிய சட்டம் வழங்குகின்றதுஎன அவர் தெரிவித்துள்ளார்..
