போலந்தில் கிராகோவ் நகர மைய சதுக்கத்தில் சனிக்கிழமை மர்ம நபர் ஒருவர் நடத்திய துப்பாக்கிச் சூட்டில் 5 பேர் உயிரிழந்துள்ளனர். 10 இற்கும் மேற்பட்டோர் படுகாயமடைந்து மருத்துவமனையில் அனுமதிக்கப்பட்டுள்ளனர்.

கிராகோவ் நகரின் முக்கியச் சதுக்கப் பகுதிக்கு அதிவேகமாக வந்த வாகனம் ஒன்றில் இருந்து, அங்கிருந்த பொதுமக்கள் மீது மர்ம நபர் ஒருவர் துப்பாக்கிச்சூடு நடத்தத் தொடங்கினார். ஸ்லாவ்கோவ்ஸ்கா வீதி அருகே பொதுமக்கள் மீது நடத்தப்பட்ட இந்தத் தாக்குதலால் அப்பகுதியில் பெரும் பரபரப்பும் பதற்றமும் நிலவியது.

தகவலறிந்து உடனடியாக சம்பவ இடத்திற்கு விரைந்த போலந்து பொலிஸார், துப்பாக்கிச்சூடு நடத்திய நபர் மீது பதில் தாக்குதல் நடத்தி அவரை வீழ்த்தினர். இதில் காயமடைந்த குற்றவாளி பொலிஸின் பலத்த பாதுகாப்புடன் உடனடியாக மருத்துவமனைக்குக் கொண்டு செல்லப்பட்டு தீவிர சிகிச்சைப் பிரிவில் அனுமதிக்கப்பட்டுள்ளார்.

இத்தாக்குதல் குறித்துப் போலந்து பிரதமர் டொனால்ட் டஸ்க் வெளியிட்டுள்ள செய்தியில், உள்துறை அமைச்சகத்திடமிருந்து அவ்வப்போது நிலவரங்களைக் கேட்டுப் பெற்று வருகின்றேன் எனவும் இந்தத் தாக்குதலின் பின்னணி மற்றும் காரணங்கள் குறித்து பொலிஸார் தீவிர விசாரணை நடத்தி வருகின்றனர் என்றும் தெரிவித்தார்.