சென்னை:

மேகதாது அணை கட்டுவதை யாராலும் தடுக்க முடியாது எனப் பிரதமர் முன்னிலையில் கர்நாடக முதலமைச்சர் டி.கே.சிவக்குமார் பேசியுள்ள நிலையில், காவிரியின் குறுக்கே மேகதாது அணை கட்டும் விவகாரத்தில் தமிழ்நாடு அரசு இனியும் மவுனம் காக்கக் கூடாது என வலியுறுத்தி, முதலமைச்சர் விஜய்க்கு திமுக தலைவர் மு.க.ஸ்டாலின் விரிவான கடிதம் ஒன்றை எழுதியுள்ளார்.

விவசாயிகள் கொந்தளிப்பு:

திமுக தலைவர் மு.க.ஸ்டாலின் எழுதிய கடிதத்தில், “கர்நாடக முதலமைச்சர் டி.கே.சிவக்குமார் மைசூரில் நடைபெற்ற அரசு விழாவில் பிரதமர் மோடி முன்னிலையில் மேகதாது அணை குறித்து மீண்டும் பேசியுள்ளார். கர்நாடகத்தில் மேகதாது அணையைக் கட்ட வேண்டும் என்று உச்ச நீதிமன்றமே தெரிவித்துள்ளதாகவும், அதனை எவராலும் தடுத்து நிறுத்த முடியாது என்றும் அவர் பேசியுள்ளது தமிழ்நாட்டு விவசாயிகள் மத்தியில் பெரும் கொந்தளிப்பை ஏற்படுத்தியுள்ளதைத் தங்களது கவனத்துக்குக் கொண்டு வர விரும்புகிறேன். காவிரி என்பது நீர்ப்பங்கீடு என்பதைத் தாண்டி, வரலாற்றுப் பூர்வமாகவும் உணர்வுப் பூர்வமாகவும் தமிழர்களின் வாழ்வோடு பின்னிப் பிணைந்தது. டெல்டா விவசாயிகளின் ஒட்டுமொத்த வாழ்வாதாரமும் இதனை நம்பித்தான் இருக்கிறது. எனவே, மேகதாது அணை குறித்துத் தமிழ்நாடு அரசு கண்டும் காணாமல் இருக்க முடியாது என்பதை மீண்டும் நினைவூட்டுகிறேன்,” என்று அவர் தெரிவித்துள்ளார்.

விஷப்பரீட்சை வேண்டாம்:

தொடர்ந்து அவர், “காவிரி நீர் உரிமை தொடர்பாகக் கர்நாடகத்துடன் எந்தவிதப் பேச்சுவார்த்தைக்கும் இடமில்லை, சட்டப் பூர்வமாகத்தான் நமது உரிமையைப் பெறுவோம் என்பதே தமிழ்நாட்டின் நிலைப்பாடாக இருந்து வந்தது. இதனை மீறும் வகையில், தாங்கள் முதலமைச்சராகப் பொறுப்பேற்றதும் கர்நாடகம் சென்று பேச்சுவார்த்தை நடத்தப் போவதாகச் செய்திகள் வந்தபோதே, ‘வேண்டாம் இந்த விஷப்பரீட்சை’ என எச்சரித்தோம். முதலமைச்சராகிய தாங்கள் கர்நாடகம் செல்வது பற்றி வெளிப்படைத்தன்மையும் இல்லாமல், அதிகாரப்பூர்வ அறிவிப்பும் வராத நிலையில் அமைச்சர்கள் முரணான கருத்துகளைத் தெரிவித்து விவசாயிகளைக் குழப்பி வந்தனர். தற்போதைய சூழ்நிலையில் முதலமைச்சர் விஜய் கர்நாடகத்துக்கு வர வேண்டாம் என்று டி.கே.சிவக்குமார் கூறிவிட்டார். இந்த நிகழ்வுகள் எதுவுமே தமிழ்நாட்டு மக்களுக்கு உவப்பானதாக இல்லை,” என்று அவர் சாடியுள்ளார்.

அனைத்துக் கட்சிக் கூட்டம்:

மேலும் அவர் கூறுகையில், “காவிரி விவகாரத்தில் கர்நாடகத்தில் உள்ள கட்சிகள் அனைத்தும் ஒருமித்த குரலில் பேசி வரும் நிலையில், நமது விவசாயிகளைக் காப்பதற்காகத் தமிழ்நாட்டின் கட்சிகளும் நமது ஒற்றுமையை வெளிப்படுத்துவது அவசியம். எனவே, நமது ஒற்றுமையையும் கர்நாடக முதலமைச்சரின் பேச்சுக்கு எதிர்ப்பையும் வெளிப்படுத்தும் வகையில் உடனடியாக அனைத்துக் கட்சிக் கூட்டம் கூட்டப்பட வேண்டும். அந்தக் கூட்டத்தில் நிறைவேற்றப்படும் தீர்மானங்களையும், மேகதாது அணைக்கு எதிராகத் தமிழ்நாடு சட்டமன்றத்தில் ஒருமனதாக நிறைவேற்றப்பட்ட தனித் தீர்மானத்தையும், அனைத்துக் கட்சித் தலைவர்கள் மற்றும் நாடாளுமன்ற உறுப்பினர்களுடன் இணைந்து பிரதமரை நேரில் சந்தித்து அளிப்பதற்கான ஏற்பாடுகளைச் செய்ய வேண்டும். காவிரி உரிமையைப் பொறுத்தவரையில் கட்சி வேறுபாடுகளைக் கடந்து நாம் ஒற்றுமையாக நிற்பது அவசியம்,” என்று மு.க.ஸ்டாலின் ஆணித்தரமாகக் குறிப்பிட்டுள்ளார். உடனடியாக அனைத்துக் கட்சிக் கூட்டத்தைத் தமிழ்நாடு அரசு அறிவிக்கும் என்று நம்புவதாகவும் அவர் தெரிவித்துள்ளார்.