திருச்சி:

கர்நாடகாவில் காவிரியின் குறுக்கே மேகதாது அணை கட்டும் விவகாரத்தில், எந்தச் சூழலிலும் அந்த அணையைக் கட்ட நாங்கள் ஒருபோதும் அனுமதிக்க மாட்டோம் என்று தமிழக ஊரக வளர்ச்சி மற்றும் நீர்வளத்துறை அமைச்சர் என்.ஆனந்த் திட்டவட்டமாகத் தெரிவித்துள்ளார்.

முதலமைச்சர் கடிதம்:

மேகதாது அணை கட்டுவதால் தமிழக விவசாயிகளுக்கு ஏற்படும் மிகக் கடுமையான பாதிப்புகளைச் சுட்டிக்காட்டி, தமிழகத்தின் முறையான அனுமதியின்றி அணை கட்ட கர்நாடகாவிற்கு எந்தவிதமான அனுமதியும் வழங்கக் கூடாது என முதலமைச்சர் விஜய் கடந்த ஏழாம் தேதி பிரதமர் மோடிக்குக் கடிதம் ஒன்றை எழுதியிருந்தார். இந்தக் கடிதம் இரு மாநில அரசியலிலும் பெரும் பரபரப்பை ஏற்படுத்திய நிலையில், இதற்கு கர்நாடக தரப்பில் இருந்து தற்போது அதிகாரப்பூர்வமாகப் பதிலடி கொடுக்கப்பட்டுள்ளது.

அனுமதி தேவையில்லை:

பெங்களூருவில் செய்தியாளர்களிடம் பேசிய கர்நாடக முதலமைச்சர் டி.கே.சிவக்குமார், “காவிரியின் குறுக்கே மேகதாது அணை கட்டுவதற்கு யாரிடமும் அனுமதி கேட்க வேண்டிய அவசியமில்லை. கர்நாடக அரசு தனது சொந்த நிலத்தில் அணை கட்டிக்கொள்ள உச்ச நீதிமன்றம் ஏற்கனவே அனுமதி வழங்கியுள்ளது. தமிழ்நாட்டிற்கு ஆண்டுதோறும் 177 டி.எம்.சி நீரைத் திறந்துவிட வேண்டும் என்ற நிபந்தனை மட்டுமே விதிக்கப்பட்டுள்ளது. அந்த நிபந்தனையை நாங்கள் உறுதியாகக் கடைப்பிடிப்போம். தமிழ்நாடு முதலமைச்சர் விஜய் சட்டத்தை நன்கு அறிந்திருப்பார் என்று நம்புகிறேன்,” என்று அவர் கூறினார்.

ஆய்வு செய்ய அழைப்பு:

தொடர்ந்து அவர், “மேகதாது அணை கட்டுவதால் தமிழ்நாட்டிற்கே அதிக பயன் கிடைக்கும். வறட்சிக் காலங்களில் நீரைச் சேமித்து வைக்கும் நீர்த்தேக்கமாக இத்திட்டம் மிகச் சிறப்பாகச் செயல்படும். இத்திட்டத்திற்குக் கர்நாடகாவில் உள்ள பாஜக மற்றும் தேசிய ஜனநாயகக் கூட்டணித் தலைவர்கள் முழு ஆதரவாக உள்ளனர். வனத்துறை நிலத்திற்குப் பதிலாகத் தற்போது வேறு 5,400 ஹெக்டேர் நிலம் அடையாளம் காணப்பட்டுப் பணிகள் நடைபெற்று வருகின்றன. எனவே, இந்த விவகாரத்தில் மோதல் போக்கைக் கைவிட்டு, அணைத் திட்டம் குறித்து நேரில் ஆய்வு செய்யத் தமிழ்நாடு முதலமைச்சர் விஜய் ஒரு சிறப்புக் குழுவைக் கர்நாடகாவுக்கு அனுப்பி வைக்க வேண்டும் என்று கேட்டுக்கொள்கிறேன்,” என்று அவர் தெரிவித்தார்.

தமிழக அமைச்சர் பதிலடி:

இந்தப் பரபரப்பான அரசியல் சூழ்நிலையில், திருச்சியில் செய்தியாளர்களைச் சந்தித்த தமிழக ஊரக வளர்ச்சி மற்றும் நீர்வளத்துறை அமைச்சர் என்.ஆனந்த் இதற்கு ஆவேசமாகப் பதிலளித்தார். அவர் கூறுகையில், “கர்நாடக முதலமைச்சர் டி.கே.சிவக்குமார் கூறுவது போன்று எதுவும் இங்கு நடக்காது. கர்நாடகாவில் காவிரியின் குறுக்கே மேகதாது அணை கட்டுவதற்கு எந்தச் சூழலிலும் நாங்கள் அனுமதிக்க மாட்டோம். இந்தத் திட்டத்தைத் தமிழக அரசு ஒருபோதும் ஏற்காது,” என்று அவர் ஆணித்தரமாகப் பதிலடி கொடுத்துள்ளார்.