திருச்சி:

நடப்பாண்டில் மேட்டூர் அணை இன்னும் திறக்கப்படாததாலும், போதிய அளவு மழை பெய்யாததாலும் திருச்சியில் காவிரி ஆறு முற்றிலும் நீரின்றி பாலைவனமாக வறண்டுகாணப்படுகிறது. இதனால், திருச்சி மாவட்டத்தில் மிகக் கடுமையான குடிநீர் தட்டுப்பாடு அபாயம் நிலவி வருகிறது. ஆண்டுதோறும் ஜூன் மாதம் 12 ஆம் தேதி டெல்டா குறுவை பாசனத்திற்காக மேட்டூர் அணை திறக்கப்படுவது வழக்கம். அந்த நீர் விவசாயப் பாசனத்திற்குப் பயன்படுவதோடு மட்டுமல்லாமல், டெல்டா மாவட்டங்களின் ஒட்டுமொத்த குடிநீர் தேவையையும் பூர்த்தி செய்து, நிலத்தடி நீர்மட்டத்தை உயர்த்தவும் பேருதவியாக இருக்கும். ஆனால், இந்த ஆண்டு இதுவரை மேட்டூர் அணை திறக்கப்படாததால் விவசாயம் முழுமையாகப் பொய்த்துப் போனது. தற்போது பல்வேறு இடங்களிலும் மக்களின் அடிப்படை தேவையான குடிநீருக்கே பெரும் தட்டுப்பாடு நிலவி வருகிறது.

காவிரி மற்றும் கொள்ளிடம் ஆகிய இரு முக்கிய குடிநீர் ஆதாரங்களும் முற்றிலும் வறண்டு காணப்படுவதால், திருச்சி மாநகராட்சிக்கு நாளொன்றுக்கு சுமார் 15 மில்லியன் லிட்டர் நீர் பற்றாக்குறை ஏற்பட்டுள்ளது. திருச்சி மாநகராட்சிக்குத் தேவையான நீர், காவிரி மற்றும் கொள்ளிடம் ஆறுகளில் உள்ள 9 நீரேற்று நிலையங்கள் மூலம் விநியோகம் செய்யப்படுகிறது. சுமார் 10.8 லட்சம் மக்கள் வசிக்கும் திருச்சி மாநகராட்சியில் 1.20 லட்சம் குடிநீர் இணைப்புகள் உள்ளன. வழக்கமாக, நாளொன்றுக்கு 165 மில்லியன் லிட்டர் தண்ணீர் விநியோகம் செய்யப்படும் நிலையில், தற்போது வெறும் 149 முதல் 150 மில்லியன் லிட்டர் தண்ணீர் மட்டுமே விநியோகம் செய்யப்படுகிறது. அந்த அளவும் நாளுக்கு நாள் குறைந்து கொண்டே செல்கிறது. மேட்டூர் அணையிலிருந்து குடிநீர் தேவைக்காக வெறும் 1,000 கன அடி நீர் மட்டுமே திறக்கப்படும் நிலையில், அது முக்கொம்புவிற்கு வந்து சேரும்போது 90 முதல் 100 கனஅடியாகச் சுருங்கி விடுகிறது.

ஏற்கெனவே காவிரியும் கொள்ளிடமும் வறண்டு போயுள்ளதாலும், மழைப்பொழிவு இல்லாததாலும் நிலத்தடி நீர்மட்டம் வெகுவாகக் குறைந்து வருகிறது. இதனால் ஸ்ரீரங்கத்தில் உள்ள 1 முதல் 7 வார்டுகளுக்குக் காலை, மாலை என இரு வேளையும் குடிநீர் விநியோகம் செய்யப்பட்டு வந்த நிலையில், தற்போது காலை ஒருவேளை மட்டுமே வழங்கப்படுகிறது. மேலும் சில பகுதிகளில் ஒரு நாள் விட்டு ஒரு நாள் குடிநீர் விநியோகம் செய்யப்பட்டு வருகிறது. தொடர்ந்து இதே நிலை நீடித்தால், திருச்சி மாநகராட்சி முழுவதுமே ஒரு நாள் விட்டு ஒரு நாள் மட்டுமே குடிநீர் விநியோகம் செய்ய வேண்டிய கட்டாயம் ஏற்படும் என அதிகாரிகள் அச்சம் தெரிவித்துள்ளனர். மக்களின் அடிப்படை தேவையான குடிநீருக்கே தட்டுப்பாடு ஏற்பட்டுள்ளதால், தமிழ்நாடு அரசு போர்க்கால அடிப்படையில் உடனடியாக நடவடிக்கை எடுத்து, கர்நாடக அரசிடம் பேச்சுவார்த்தை நடத்தித் தமிழ்நாட்டிற்குத் தேவையான நீரைப் பெற்றுத்தர வேண்டும் என்று பொதுமக்கள் கோரிக்கை விடுத்துள்ளனர்.

#CauveryRiver #TrichyNews #WaterScarcity #MetturDam #BmNews #TamilNews #TamilNaduNews #BreakingNewsTN #DeltaFarmers #TrichyCorporation #CauveryIssue #Karnataka #PoliticalUpdate #TamilNewsLive