நடிகர் சந்தீப் கிஷன் கதையின் நாயகனாக முதன்மையான வேடத்தில் நடித்திருக்கும் ‘சிக்மா’ திரைப்படத்தில் இடம்பெற்ற ‘சுலோச்சனா’ எனும் பாடலும், பாடலுக்கான லிரிக்கல் விடியோவும் வெளியிடப்பட்டிருக்கிறது.
தமிழக முதல்வர் ஜோசப் விஜயின் மகன் ஜேசன் சஞ்சய் இயக்குநராக அறிமுகமாகும் ‘சிக்மா’ திரைப்படத்தில் சந்தீப் கிஷன், ஃபரியா அப்துல்லா, ராஜூ சுந்தரம், சம்பத்ராஜ், சிவ பண்டிட், அன்பு தாசன், மகாலட்சுமி , ஷீலா ராஜ்குமார், கமலேஷ் உள்ளிட்ட பலர் நடித்திருக்கிறார்கள். கிருஷ்ணன் வசந்த் ஒளிப்பதிவு செய்திருக்கும் இந்த திரைப்படத்திற்கு எஸ். தமன் இசையமைத்திருக்கிறார். எக்சன் என்டர்டெய்னராக தயாராகி இருக்கும் இந்த திரைப்படத்தை லைகா புரொடக்ஷன்ஸ் நிறுவனம் சார்பில் தயாரிப்பாளர் சுபாஷ்கரன் தயாரித்திருக்கிறார்.
எதிர்வரும் ஒக்டோபர் மாதம் இரண்டாம் திகதி முதல் உலகம் முழுவதும் பட மாளிகையில் வெளியாகும் என அறிவிக்கப்பட்டிருக்கும் இந்த திரைப்படத்தில் இடம்பெற்ற ‘சுல்லோ சிலாக்கா..கல்லா இலாகா..’ எனத் தொடங்கும் பாடலும், பாடலுக்கான லிரிக்கல் விடியோவும் வெளியிடப்பட்டிருக்கிறது. இந்த பாடலில் கவர்ச்சி நடிகை கேத்தரின் தெரேசா ஒரே ஒரு பாடலுக்கு நடனம் ஆடியிருக்கிறார்.
இந்தப் பாடலை பாடலாசிரியர் சுப்பர் சுப்பு எழுத , பின்னணி பாடகர் சான்வி சுதீப் பாடியிருக்கிறார். கவர்ச்சி குத்தாட்ட பாடல் என்பதால் துள்ளல் இசை பாணியில் உருவாகி, ரசிகர்களை நடனமாட வைக்கிறது. இதன் காரணமாக இந்தப் பாடல் இலட்சக்கணக்கான டிஜிட்டல் பார்வைகளை பெற்று சாதனை படைத்து வருகிறது.
