கோவை:
காவிரி நதிநீர் விவகாரத்தில் தமிழ்நாட்டிற்குத் தண்ணீர் வழங்க வேண்டும் என்பதில் உச்ச நீதிமன்றத் தீர்ப்பு மிகத் தெளிவாக உள்ள நிலையில், கர்நாடக அமைச்சர் டி.கே.சிவக்குமார் பொய்ப் பிரச்சாரம் செய்து வருவதாக மதிமுக முதன்மைச் செயலாளரும் நாடாளுமன்ற உறுப்பினருமான துரை வைகோ மிகக் கடுமையாகக் குற்றஞ்சாட்டியுள்ளார்.
பொய்யான தகவல்:
கோவை விமான நிலையத்தில் செய்தியாளர்களைச் சந்தித்துப் பேசிய அவர், “உச்ச நீதிமன்றத் தீர்ப்பைத் திரித்துப் பேசி அமைச்சர் டி.கே.சிவக்குமார் பொய்யான தகவல்களைத் தொடர்ந்து பரப்பி வருகிறார். பிரதமர் மோடி பங்கேற்ற நிகழ்ச்சியிலேயே அவர் இவ்வாறு அப்பட்டமாகப் பேசியிருப்பது வன்மையாகக் கண்டிக்கத்தக்கது. இதனைத் தமிழக பாஜக தலைவர்கள் ஏன் தட்டிக் கேட்க மறுக்கிறார்கள்?” என்று அவர் சரமாரியாகக் கேள்வி எழுப்பினார்.
தீர்வு காண வேண்டும்:
தொடர்ந்து பேசிய அவர், “காவிரி விவகாரத்தில் தமிழக அரசு கர்நாடக அரசுக்கு எதிராகச் சட்டரீதியான நடவடிக்கைகளைத் தொடர்ந்து மேற்கொண்டு வருகிறது. இரு மாநிலங்களுக்கு இடையிலான இந்தப் பெரும் நதிநீர்ப் பிரச்சினைக்கு மத்திய அரசு உடனடியாக உரியத் தீர்வு காண வேண்டும். காவிரி நீர் மேலாண்மை அமைப்பு வழங்கிய அறிவுறுத்தல்களைக் கூட கர்நாடக அரசு முறையாகப் பின்பற்றவில்லை. மேலும், யார் தவறு செய்திருந்தாலும் அவர்கள் மீது பாரபட்சமின்றி உரிய நடவடிக்கை எடுக்கப்பட வேண்டும் என்பதே எங்களது உறுதியான நிலைப்பாடு. அதிகாரிகளாக இருந்தாலும் சரி, அமைச்சர்களாக இருந்தாலும் சரி, தவறு செய்தவர்கள் உறுதியாகத் தண்டிக்கப்பட வேண்டும்,” என்று துரை வைகோ ஆவேசமாகத் தெரிவித்துள்ளார்.
#DuraiVaiko #DKShivakumar #CauveryIssue #MDMK #BmNews #TamilNews #BreakingNews #LatestNews #TamilNewsLive