போக்குவரத்து சேவைகளை ஒருங்கிணைக்க புதிய சட்டம் உதவும் என மாகாண அரசு கூறுகிறது; ஆனால் இது சாமானியர்களின் நிதிச்சுமையை அதிகரிக்குமோ என சிலர் அஞ்சுகின்றனர்.

ஒன்டாரியோ மாகாணம் முழுவதும் உள்ள பொதுப் போக்குவரத்து கட்டணங்களை (Transit Fares) நிர்ணயிக்கும் அதிகாரத்தைத் தன்வசப்படுத்த மாகாண அரசு திட்டமிட்டுள்ளது. இந்த நடவடிக்கை, ஒரு ஒருங்கிணைந்த போக்குவரத்து அமைப்பை உருவாக்கும் நோக்கத்தில் எடுக்கப்பட்டதாகச் சிலர் வரவேற்றாலும், டொராண்டோ போக்குவரத்து ஆணையத்தின் (TTC) எதிர்காலம் குறித்துப் பலர் கவலை தெரிவித்துள்ளனர்.

வீடு கட்டுமானத்தை விரைவுபடுத்தவும், பொதுப் போக்குவரத்தை எளிதாக்கவும் கொண்டுவரப்பட்டுள்ள புதிய சட்டமூலத்தின் ஒரு பகுதியாக இந்த மாற்றங்கள் முன்மொழியப்பட்டுள்ளன.

இந்தச் சட்டத்தின்படி, போக்குவரத்துத் துறை அமைச்சர் பிரப்மீத் சர்க்காரியா (Prabmeet Sarkaria), போக்குவரத்து கட்டணங்களை நிர்ணயிக்கவும், கட்டணப் பிரிவுகளை வரையறுக்கவும் மற்றும் தள்ளுபடி கொள்கைகளை உருவாக்கவும் அதிகாரம் பெறுவார்.

குவீன்ஸ் பார்க்கில் திங்கள்கிழமை நடைபெற்ற செய்தியாளர் சந்திப்பில் பேசிய அமைச்சர் சர்க்காரியா, “இந்த மாற்றம் ஒன்டாரியோவின் ‘ஒரே கட்டண’ (One Fare) திட்டத்தை விரிவாக்கம் செய்வதற்கான அடித்தளமாகும். இதன் மூலம் மாகாணத்தின் அனைத்துப் போக்குவரத்து அமைப்புகளையும் இணைத்து, பொதுவான கட்டணங்கள், தள்ளுபடிகள் மற்றும் இலவச மாற்றங்களை (Free Transfers) வழங்க முடியும்,” என்று கூறினார்.

TTC-இன் 2026-ஆம் ஆண்டுக்கான வரவு-செலவுத் திட்டத்தில், தொடர்ந்து மூன்றாவது ஆண்டாகக் கட்டண உயர்வு தவிர்க்கப்பட்டு, ‘கட்டண உச்சவரம்பு’ (Fare Capping) போன்ற சலுகைகள் அறிவிக்கப்பட்டிருந்தன. இப்போது மாகாண அரசு கட்டணங்களை நிர்ணயித்தால் இந்தச் சலுகைகள் என்னவாகும் என்ற கேள்வி எழுந்துள்ளது.

ஆண்ட்ரூ பல்சிஃபர் (TTCriders நிர்வாக இயக்குநர்): “மாகாணம் முழுவதும் ஒரே கட்டணம் கொண்டு வரப்பட்டால், ஏழை எளிய மக்களுக்கான சலுகைகள் பாதிக்கப்படுமோ என நாங்கள் கவலைப்படுகிறோம். டொராண்டோ நகரக் கொள்கைகளில் தலையிடும் வரலாறு மாகாண அரசுக்கு உண்டு.”

ஜோஷ் மேட்லோ (TTC வாரிய உறுப்பினர்): “போக்குவரத்து ஒருங்கிணைப்பு என்பது நல்ல விஷயம். ஆனால், ஒவ்வொரு போக்குவரத்து அமைப்பும் தனித்தனி முன்னுரிமைகளையும் சவால்களையும் கொண்டுள்ளன. மாகாண அரசு கட்டணத்தை நிர்ணயிக்கும்போது, உள்ளூர் தேவைகள் எவ்வாறு கவனிக்கப்படும் என்பது குறித்து முறையான விவாதம் தேவை.”

மேயரின் நிலைப்பாடு:
டொராண்டோ மேயர் ஒலிவியா சௌ (Olivia Chow) தனது 2026 பட்ஜெட்டில் TTC கட்டணங்களை முடக்கி வைத்திருந்தார். தற்போது மாகாண அரசின் இந்தப் புதிய முன்மொழிவு குறித்து அவரது அலுவலகம் ஆய்வு செய்து வருகிறது. “எந்தவொரு புதிய மாற்றமும் டொராண்டோ மக்களுக்கு மலிவாகவும், அவர்களின் நலனுக்காகவும் இருக்க வேண்டும் என்பதே மேயரின் நிலைப்பாடு,” என அவரது ஊடகச் செயலாளர் தெரிவித்துள்ளார்.

ஆதரவு குரல்கள்:
இந்தத் திட்டத்தை நகரத்தின் வணிகச் சபை (Board of Trade) வரவேற்றுள்ளது. “போக்குவரத்து அமைப்புகளை ஒருங்கிணைப்பதன் மூலம் நெரிசலைக் குறைக்கலாம் மற்றும் அதிகமான மக்கள் பொதுப் போக்குவரத்தைப் பயன்படுத்த ஊக்குவிக்கலாம்,” என்று அதன் தலைமை நிர்வாக அதிகாரி கில்ஸ் கெர்சன் (Giles Gherson) தெரிவித்துள்ளார்.

இந்த மாற்றங்கள் குறித்த இறுதி முடிவுகள் எடுக்கப்படுவதற்கு முன்னதாக, அனைத்துப் போக்குவரத்து நிறுவனங்களுடன் விரிவான ஆலோசனைகள் நடத்தப்படும் என அமைச்சர் சர்க்காரியா உறுதியளித்துள்ளார்.