க்ரோசொப்ட் (Microsoft) நிறுவனத்தின் பல முக்கியமான இணையவழிச் சேவைகளில் ஏற்பட்டுள்ள பாரிய தொழில்நுட்பக் கோளாறு காரணமாக உலகளாவிய ரீதியில் ஆயிரக்கணக்கான பயனர்கள் பாதிக்கப்பட்டுள்ளனர்.

குறிப்பாக, Microsoft Outlook, Microsoft Teams, Copilot உள்ளிட்ட சேவைகளை அணுகுவதில் பயனர்கள் சிரமங்களை எதிர்கொண்டுள்ளதாக வெளிநாட்டு ஊடகங்கள் தெரிவிக்கின்றன.

வியாழக்கிழமை 12 ஆம் திகதி ஆரம்பமான இந்தத் தொழில்நுட்பக் கோளாறு காரணமாக மின்னஞ்சல்களை அனுப்புதல் மற்றும் பெறுதல், மின்னஞ்சல் பெட்டிகளைத் திறத்தல், அலுவலகத் தொடர்பாடல் மற்றும் இணையவழிச் சேவைகளைப் பயன்படுத்துதல் உள்ளிட்ட பல செயற்பாடுகள் பாதிக்கப்பட்டுள்ளன.

இது தொடர்பாக பயனர்களிடமிருந்து பெருமளவிலான முறைப்பாடுகள் கிடைத்துள்ளதாக சேவைத் தடைகளைக் கண்காணிக்கும் Downdetector இணையத்தளம் தெரிவித்துள்ளது. குறிப்பாக, Outlook சேவை தொடர்பில் ஒரே நேரத்தில் சுமார் 130,000 முறைப்பாடுகள் பதிவாகியுள்ளன.

இதனிடையே, Exchange Online மின்னஞ்சல் சேவையை அணுகுவதில் பயனர்கள் எதிர்கொள்ளும் பிரச்சினைகள் குறித்து விசாரணை நடத்தி வருவதாக மைக்ரோசொப்ட் நிறுவனம் அறிவித்துள்ளது.

நிறுவனத்தின் சில உட்கட்டமைப்புப் பகுதிகளில் வழக்கத்திற்கு மாறாக அதிகப்படியான சுமை ஏற்பட்டமையே இணைப்புச் சிக்கல்களுக்கு ஒரு காரணமாக இருக்கலாம் எனவும் தெரிவிக்கப்பட்டுள்ளது. இதனால் சில சேவையகங்கள் எதிர்பாராத விதமாகச் செயலிழந்துள்ளதாகவும் நிறுவனம் குறிப்பிட்டுள்ளது.

பாதிக்கப்பட்ட சேவையகங்களை மீண்டும் இயங்கச் செய்வதற்கும், இணையப் போக்குவரத்தை வேறு கட்டமைப்புகளுக்கு மாற்றுவதற்கும் நடவடிக்கைகள் முன்னெடுக்கப்பட்டு வருவதாக மைக்ரோசொப்ட் தெரிவித்துள்ளது.

சில சேவைகள் படிப்படியாக மீளச் செயற்படத் தொடங்கியுள்ள போதிலும், அனைத்துச் சேவைகளும் வழமைக்குத் திரும்புவதற்கான உறுதியான காலவரையறை அறிவிக்கப்படவில்லை.