இங்கிலாந்து முழுவதும் உள்ள குறைந்தது 70 சிறுமிகளை இணையவழியில் ஏமாற்றி, அவர்களது பாலியல் ரீதியான படங்கள் மற்றும் காணொளிகளைப் பெற்ற நபருக்கு 30 ஆண்டுகள் சிறைத் தண்டனை விதிக்கப்பட்டுள்ளது.
செஸ்டர் பல்கலைக்கழகத்தில் படித்து வந்த இந்திய மாணவரான பிலால் காஜி (27) என்பவரே இவ்வாறு தண்டனை பெற்றுள்ளார். இவர் ஆகஸ்ட் 2021க்கும் ஆகஸ்ட் 2025க்கும் இடைப்பட்ட காலத்தில் ஸ்னாப்சாட் (Snapchat), விங்க் (Wink) மற்றும் ரோப்ளாக்ஸ் (Roblox) போன்ற செயலிகளைப் பயன்படுத்தி 10 முதல் 17 வயதுக்குட்பட்ட சிறுமிகளை இலக்கு வைத்துச் செயற்பட்டுள்ளார்.
தன்னை 14 வயது வெள்ளையின கனேடிய சிறுவனாக உருவேற்றி, பாதிக்கப்பட்ட சிறுமிகளுடன் காதலில் இருப்பதாக நம்பவைத்தே காஜி இக்குற்றங்களைச் செய்துள்ளார். ஆபாசப் படங்களைத் தயாரித்தல், மிரட்டிப் பணம் பறித்தல் மற்றும் குழந்தைகளைப் பாலியல் செயற்பாடுகளில் ஈடுபடத் தூண்டுதல் உள்ளிட்ட 37 குற்றச்சாற்றுகளை ஒப்புக்கொண்டதை அடுத்து அவருக்கு இந்தத் தண்டனை வழங்கப்பட்டுள்ளது.
காஜி பரோ (parole) எனப்படும் நன்னடத்தை விடுவிப்பைப் பெறுவதற்கு முன்னர் குறைந்தபட்சம் 20 ஆண்டுகள் சிறைத் தண்டனையை அனுபவிக்க வேண்டும் என்பதுடன், அவரது வாழ்நாள் முழுவதும் பாலியல் குற்றவாளிகள் பதிவேட்டில் (sex offenders register) பெயரிடப்படுவார். பரோ காலத்தில் அவர் எட்டு ஆண்டுகள் மேற்பார்வையின் கீழ் (on licence) இருப்பார்.
செஸ்டர் கிரவுன் நீதிமன்றத்தில் வாசிக்கப்பட்ட பாதிக்கப்பட்ட ஒருவரின் தனிப்பட்ட தாக்க அறிக்கையில், காஜி தனது தனியுரிமை மற்றும் பாதுகாப்பைக் கெடுத்துவிட்டதாகவும், தான் அதிலிருந்து மீள முயன்று வருவதாகவும் குறிப்பிட்டிருந்தார். பாதிக்கப்பட்ட சில சிறுமிகள் தற்கொலைக்கு முயன்றதுடன், கவலை மற்றும் உணவு உண்ணும் கோளாறுகளாலும் (eating disorders) பாதிக்கப்பட்டுள்ளனர் என நீதிமன்றத்தில் தெரிவிக்கப்பட்டது.
போலியான அடையாளத்தைப் பயன்படுத்திய காஜி
ஒரு சிறுவனின் சமூக வலைத்தளப் பக்கத்திலிருந்து எடுக்கப்பட்ட புகைப்படங்களைப் பயன்படுத்தி, “ரீஸ்” (Reece) என்ற போலிப் பெயரில் காஜி சிறுமிகளிடம் பழகியுள்ளார். ஆரம்பத்தில் சாதாரண முறையில் உரையாடும் அவர், பின்னர் படிப்படியாக நெருக்கமான உள்ளடக்கங்களை அனுப்புமாறு கோரியுள்ளார். சிறுமிகள் தயங்கும்போது, “இதுதான் காதலிப்பவர்கள் செய்யும் விதம்” எனக் கூறி அவர்களை ஏமாற்றியுள்ளார்.
அவர்கள் மறுக்கும் பட்சத்தில், ஏற்கனவே அனுப்பப்பட்ட அல்லது ரகசியமாகப் பெறப்பட்ட படங்களை அவர்களின் நண்பர்கள் மற்றும் குடும்பத்தினருக்கு வெளியிட்டு விடுவதாக மிரட்டியுள்ளார். சில சந்தர்ப்பங்களில் சிறுமிகளின் சமூக வலைத்தளக் கணக்குகளை ஹேக் செய்தும் அவர் மிரட்டல்களில் ஈடுபட்டுள்ளார்.
டிசம்பர் 2021 இல் டெர்பிஷயர் (Derbyshire) காவல் நிலையத்தில் பாதிக்கப்பட்ட ஒரு சிறுமி புகார் அளித்ததைத் தொடர்ந்து இக்கொலை விசாரணை தொடங்கியது. மே 2022 இல் இந்த விசாரணை செஸ்டர் காவல்துறைக்கு மாற்றப்பட்டது. ஜூலை 21, 2023 அன்று மீண்டும் நாட்டிற்குள் நுழையும் போது ஹீத்ரோ விமான நிலையத்தில் காஜி கைது செய்யப்பட்டார்.
காஜி ஒரு பாலியல் வேட்டையாடி (sexual predator) எனத் தெரிவித்த நீதிபதி ஸ்டீவன் எவெர்ட், சமூக வலைத்தளங்களில் உள்ள முறையான பாதுகாப்பு இன்மையை அவர் சாதகமாகப் பயன்படுத்திக் கொண்டுள்ளார் என்றார்.
