சென்னை:

அரசியல் விமர்சனங்கள் நாகரிக வரம்புக்குள் இருக்க வேண்டும் என்று விசிக தலைவர் திருமாவளவன் அறிவுறுத்தியுள்ளார்.

கடை திறப்பு விழா:

சென்னை வளசரவாக்கத்தில் நடைபெற்ற தனியார் கண்ணாடிக் கடை திறப்பு விழாவில், உணவுத்துறை அமைச்சர் வெங்கட்ரமணன், விடுதலைச் சிறுத்தைகள் கட்சித் தலைவர் திருமாவளவன் ஆகியோர் கலந்துகொண்டு கடையைத் திறந்து வைத்தனர்.

63 லட்சம் மெட்ரிக் டன் நெல் இருப்பு:

ரேஷன் கடைகளில் சன்ன ரக அரிசி குறைவாக விநியோகிக்கப்படுவதாக எழுந்த குற்றச்சாட்டு குறித்துப் பேசிய அமைச்சர் வெங்கட்ரமணன், பொதுமக்கள் அதிகம் பயன்படுத்தும் சன்ன ரக அரிசி கொள்முதல் செய்யப்பட்டு, தேவை உள்ள அனைத்து மாவட்டங்களுக்கும் அனுப்பி வைக்கப்பட்டு வருகிறது. எல் நினோ தாக்கத்தால் எதிர்காலத்தில் வறட்சி, உணவு தானியப் பற்றாக்குறை வந்தால் அதையும் எதிர்கொள்ள அரசு தயாராக உள்ளது. 2025-26 காலகட்டத்தில் 63 லட்சம் மெட்ரிக் டன் நெல் இருப்பு வைக்கப்பட்டுள்ளது. 8 லட்சம் மெட்ரிக் டன் நெல் கொள்முதல் இலக்கில், இதுவரை 3 லட்சம் மெட்ரிக் டன் கொள்முதல் செய்யப்பட்டுள்ளது என்றார். மாவட்ட ஆட்சியர் தலைமையில் 2 விவசாயிகள், 5 அரசு அதிகாரிகள் கொண்ட 7 பேர் குழு ஆய்வு செய்து, தேவையான இடங்களில் நேரடி நெல் கொள்முதல் நிலையங்களை அமைப்பது குறித்து முடிவெடுக்கும். சிறு மற்றும் குறு விவசாயிகள் அதிகம் உள்ள பகுதிகளுக்கு ஏற்றவாறு நேரடி நெல் கொள்முதல் நிலையங்கள் அமைக்கப்படுகின்றன. உணவுப் பொருட்களின் விலை உயர்வால் சில உணவகங்களில் உணவின் தரம் குறைவதாகப் புகார் பெறப்பட்டுள்ளது. சிறிய கடைகளில் விதிமீறல்களைக் கட்டுப்படுத்த, உணவகங்களில் உணவின் தரம் குறித்த புகார்கள் தொடர்பாக மாவட்ட ஆட்சியர்கள் தலைமையில் ஆய்வுகள் மேற்கொள்ளப்பட்டு வருகின்றன என்றும் அவர் தெரிவித்தார்.

வரம்பு மீறுவது நல்லதல்ல:

தொடர்ந்து, முதலமைச்சர் குறித்துத் திமுக பெண் பிரமுகர் பேசிய விவகாரம் தொடர்பாகப் பேசிய திருமாவளவன், அரசியல் விமர்சனங்கள் நாகரிக வரம்புக்கு உட்பட்டு இருக்க வேண்டும். அரசியல் விமர்சனங்கள் எழுவது இயல்பான ஒன்றுதான். இரண்டாம் மற்றும் மூன்றாம் கட்டத் தலைவர்கள் நாகரிக வரம்பை மீறிப் பேசும் போக்கு நல்லதல்ல. இத்தகைய செயல்பாடுகள் அரசியலுக்கு ஆரோக்கியமானதல்ல என்று தெரிவித்தார். திருமாவளவனின் இந்தக் கருத்து அரசியல் வட்டாரத்தில் கவனம் பெற்றுள்ளது.

#Thirumavalavan #VCK #DMK #TVK #TNPolitics #BmNews #TamilNews #BreakingNews #LatestNews #TamilNewsLive