ஊழல் விசாரணைகளுக்கு முன்னுரிமை அளிப்பது தொடர்பான கவலைகள் குறித்து தெளிவுபடுத்திய இலஞ்சம் அல்லது ஊழல் பற்றிய குற்றச்சாட்டுகளை புலனாய்வு செய்வதற்கான ஆணைக்குழுவின் (CIABOC) பணிப்பாளர் நாயகம் ரங்க திசாநாயக்க, முக்கியமாக 2015 ஆம் ஆண்டுக்கு முந்தைய “பாரிய அளவிலான பழைய கோப்புகள்” மீது சிறப்பு கவனம் செலுத்த வேண்டிய தேவை ஏற்பட்டுள்ளதாகத் தெரிவித்தார்.
நாடாளுமன்ற உறுப்பினர் கலாநிதி ஹர்ஷ டி சில்வா தலைமையில் நடைபெற்ற அரசாங்க நிதி பற்றிய குழு (COPF) முன்னிலையில் உரையாற்றிய திசாநாயக்க, கடந்தகால வழக்குகளுக்கு ஆணைக்குழு முன்னுரிமை அளிப்பது குறித்தும், இது சமீபத்திய இலஞ்சம் மற்றும் ஊழல் புகார்களைக் கையாள்வதில் தாமதத்தை ஏற்படுத்துமா என்பது குறித்தும் எழுப்பப்பட்ட கேள்விகளுக்கு பதிலளித்தார்.
கடந்த கால ஜனாதிபதி ஆணைக்குழுக்களிடமிருந்து பல தசாப்த கால பழைய கோப்புகளைப் பெற்றதால், சட்டப்பூர்வ காலக்கெடுவைக் கடந்து வழக்குகள் முடிவுக்கு வருவதைத் தடுப்பதற்கு உடனடி தலையீடு அவசியமானது என்று திசாநாயக்க விளக்கினார்.
“நான் பதவியேற்றதும் புள்ளிவிவரங்களைப் பார்த்தபோது, நீண்ட காலத்திற்கு முந்தைய ஏராளமான பழைய கோப்புகளைக் அவதானித்தேன்… எனவே நாங்கள் செய்தது என்னவென்றால், இந்த பழைய விவகாரங்களைக் கையாள்வதற்கு ஒரு சிறப்புப் பிரிவை அமைத்து முன்னுரிமை அளித்ததுதான்” என்று திசாநாயக்க மேலும் கூறினார்.
செயலில் உள்ள நிலுவையிலுள்ள வழக்குகளின் பெரும் பகுதி, ஒரு தசாப்தத்திற்கு முன்னர் நிறுவப்பட்ட விசாரணை ஆணைக்குழுக்களிடமிருந்தே வந்துள்ளது என்றும் அவர் வெளிப்படுத்தினார்.
“பெரும் பகுதி சுமார் 2015 காலப்பகுதியைச் சேர்ந்தது. 2015 ஜனாதிபதி ஆணைக்குழுக்களிடம் இருந்து வந்த பெருமளவிலான கோப்புகள் தீர்க்கப்படாமல் எஞ்சியிருந்தன” என்று குறிப்பிட்ட அவர், 2019க்குப் பிறகு சுமார் 70 முக்கிய வழக்குகள் எந்த முன்னேற்றமும் இன்றி முடங்கிக் கிடந்ததாகவும் தெரிவித்தார்.
கட்டமைப்பு ரீதியான தாமதங்களைச் சரிசெய்ய, CIABOC கடுமையான காலக்கெடுவை அறிமுகப்படுத்தியுள்ளது. முன்னதாக ஒன்பது ஆண்டுகள் வரை இழுபறியாக இருந்த முதற்கட்ட விசாரணைகள், இனி ஒரு மாதத்திற்குள் முடிவடைய வேண்டும்.
பழைய விவகாரங்களைக் கையாள்வது தற்போதைய புகார்களின் விலையில் நடக்கவில்லை என்றும், பழைய மற்றும் புதிய விசாரணைகள் இரண்டையும் ஒரே நேரத்தில் கையாளுவதற்கு வளங்கள் சமநிலையில் பகிர்ந்தளிக்கப்பட்டுள்ளதாகவும் திசாநாயக்க அக்குழுவிற்கு உறுதி அளித்தார்.
