முன்னாள் அரச புலனாய்வுச் சேவை மற்றும் இராணுவப் புலனாய்வுப் பிரிவின் பணிப்பாளர் நாயகமான ஓய்வுபெற்ற மேஜர் ஜெனரல் சுரேஷ் சலேவை பயங்கரவாதத் தடுப்புச் சட்டத்தின் (PTA) கீழ் தடுத்து வைத்திருப்பது தொடர்பாக ஐக்கிய நாடுகள் சபையின் பல மனித உரிமை நிபுணர்கள் இலங்கை அரசிடம் கவலை வெளியிட்டுள்ளனர்.
2019 ஈஸ்டர் ஞாயிறு பயங்கரவாதத் தாக்குதல்கள் தொடர்பான விசாரணையில், 2026 பெப்ரவரி 25ஆம் திகதி சுரேஷ் சலே கைது செய்யப்பட்டார்.
அவருக்கு எதிராக முன்வைக்கப்பட்டுள்ள குற்றச்சாட்டுகள் தொடர்பான விசாரணை மற்றும் நீண்டகால தடுப்புக்காவல் குறித்து ஐ.நா. நிபுணர்கள் கேள்வி எழுப்பியுள்ளனர்.
மேலும், அவர் தடுத்து வைக்கப்பட்டிருந்த விதம், சித்திரவதை மற்றும் மனிதாபிமானமற்ற முறையில் நடத்தப்பட்டதாகக் கூறப்படும் குற்றச்சாட்டுகள், சட்டத்தரணிகளை சந்திப்பதற்கான தடைகள் மற்றும் அவரது உடல்நிலை தொடர்பாகவும் கவலை தெரிவிக்கப்பட்டுள்ளது.
தடுப்புக்காவலின்போது அவரது உடல்நிலை மோசமடைந்து மருத்துவமனையில் அனுமதிக்கப்பட்டதாகவும், இதயப் பிரச்சினைகளுக்காக சிகிச்சை பெற்றதாகவும் தெரிவிக்கப்பட்டுள்ளது.
இந்த நிலையில், சுரேஷ் சலேவின் கைது மற்றும் தடுப்புக்காவலுக்கான சட்டபூர்வ அடிப்படை, அவரது மருத்துவ சிகிச்சை, சித்திரவதை குற்றச்சாட்டுகள் மற்றும் விசாரணையின் சுயாதீனம் உள்ளிட்ட 8 முக்கிய விடயங்கள் தொடர்பில் 60 நாட்களுக்குள் பதிலளிக்குமாறு ஐ.நா. நிபுணர்கள் இலங்கை அரசிடம் கோரியுள்ளனர்.
மேலும், அவரது உயிர் மற்றும் உடல், மனநலத்திற்கு பாதிப்பு ஏற்படாமல் உடனடி நடவடிக்கை எடுக்குமாறும், சித்திரவதை குற்றச்சாட்டுகள் தொடர்பில் சுயாதீன விசாரணை நடத்துமாறும் அவர்கள் வலியுறுத்தியுள்ளனர்.
சுரேஷ் சலே கைது மற்றும் தடுப்புக்காவல் தொடர்பான அரசாங்கத்தின் நிலைப்பாடு என்ன?PTA-வின் கீழ் அவரைத் தடுத்து வைத்திருப்பதற்கான சட்டபூர்வ அடிப்படை என்ன?
அவருக்கு சட்டத்தரணிகளின் உதவியைப் பெறுவதற்கான உரிமை முழுமையாக வழங்கப்பட்டுள்ளதா? நீண்டகாலமாக தொடர்புகளை மட்டுப்படுத்தி தடுத்து வைத்ததற்கான காரணங்கள் என்ன?
அவரது தற்போதைய உடல்நிலை மற்றும் தேவையான மருத்துவ சிகிச்சைகள் குறித்து எடுக்கப்பட்ட நடவடிக்கைகள் என்ன? சித்திரவதை மற்றும் மனிதாபிமானமற்ற நடத்தைகள் தொடர்பான குற்றச்சாட்டுகள் குறித்து என்ன நடவடிக்கை எடுக்கப்பட்டுள்ளது?
இந்தக் குற்றச்சாட்டுகள் தொடர்பாக சுயாதீனமான விசாரணை நடத்தப்பட்டுள்ளதா? CID அதிகாரிகளிடமிருந்து பழிவாங்கும் நடவடிக்கைகள் இடம்பெறாமல் அவரைப் பாதுகாக்க என்ன நடவடிக்கைகள் எடுக்கப்பட்டுள்ளன?
