சென்னை:

கடலூர் மாவட்டம் வடலூரில் அமையவிருந்த பிரம்மாண்டமான வள்ளலார் சர்வதேச மையத் திட்டத்தைக் கைவிடுவதாக இந்து சமய அறநிலையத்துறை சென்னை உயர்நீதிமன்றத்தில் அதிரடியாகத் தெரிவித்துள்ளது. வடலூரில் வள்ளலார் நிறுவிய சத்திய ஞானசபைப் பெருவெளியில் சுமார் ரூ.100 கோடி செலவில் சர்வதேச மையம் அமைக்கப்படும் என கடந்த சட்டப்பேரவைத் தேர்தலில் வாக்குறுதி அளிக்கப்பட்டது. அதன்படி நிதியொதுக்கப்பட்டுப் பணிகளும் தொடங்கப்பட்டன. ஆனால், சத்திய ஞானசபைப் பெருவெளியில் எவ்விதக் கட்டுமானங்களையும் எழுப்பக் கூடாது என்றும், அது பல லட்சக்கணக்கான பக்தர்களின் ஜோதி தரிசன வழிபாட்டுக்குப் பெரும் இடையூறாக அமையும் என்றும் கடும் எதிர்ப்பு கிளம்பியது.

கட்டுமானப் பணிகளை மாற்று இடத்திற்கு மாற்றக் கோரி சென்னை உயர்நீதிமன்றத்தில் பல்வேறு வழக்குகள் தாக்கல் செய்யப்பட்டன. இந்த வழக்குகளை விசாரித்த நீதிமன்றம், பெருவெளியில் கட்டுமானங்கள் மேற்கொள்ளத் தற்காலிகத் தடை விதித்திருந்தது. இந்த நிலையில், இவ்வழக்கு இன்று சென்னை உயர்நீதிமன்ற நீதிபதி ஜெயச்சந்திரன் தலைமையிலான அமர்வு முன்பு மீண்டும் விசாரணைக்கு வந்தது. அப்போது அறநிலையத்துறை சார்பில் ஆஜரான வழக்கறிஞர், வடலூரில் வள்ளலார் சர்வதேச மையம் அமைக்கும் திட்டத்தை அரசு முழுமையாகக் கைவிடுவதாகத் திட்டவட்டமாகத் தெரிவித்தார்.

மேலும், பக்தர்களின் ஜோதி தரிசனத்திற்கு எவ்விதப் பாதிப்பும் ஏற்படாத வகையில் மாற்று இடத்தில் யாகசாலை, நூலகம் மற்றும் முதியோர் இல்லம் கட்டத் திட்டமிட்டுள்ளதாகவும் அவர் கூறினார். அத்துடன், சத்திய ஞானசபைக்குச் சொந்தமான 71.24 ஏக்கர் நிலத்தைச் சுற்றிப் பாதுகாப்பு கருதி சுற்றுச்சுவர் கட்ட உள்ளதாகவும் அறநிலையத்துறை தரப்பில் தெரிவிக்கப்பட்டது. அரசின் இந்த மாற்றுத் திட்டத்திற்கு முழு அனுமதி அளித்த நீதிபதிகள், வழக்கின் அடுத்தக்கட்ட விசாரணையை நான்கு வாரங்களுக்கு ஒத்திவைத்து உத்தரவிட்டனர். அரசின் இந்த முடிவு வள்ளலார் சபைப் பக்தர்களிடையே மாபெரும் வரவேற்பைப் பெற்றுள்ளது.

#Vadalur #Vallalar #HRCE #MadrasHighCourt #BmNews #TamilNews #BreakingNewsTN #SathyaGnanaSabai #CuddaloreNews #TamilNaduGovt #PoliticalUpdate #TamilNewsLive