காணாமல் போன 11 வயதான பார்க்கர் வெல்ஸ் (Parker Wells) என்ற சிறுவனைத் தேடும் பணிகள் தீவிரமாக நடைபெற்று வரும் நிலையில், நோஸ் ஹில் பூங்காவின் (Nose Hill Park) மேற்குப் பகுதி வாகன நிறுத்துமிடம் மற்றும் பாதை நுழைவாயில் ஆகியன இந்த வார இறுதியில் மூடப்பட்டுள்ளன.

ஷாகனப்பி ட்ரெயில் (Shaganappi Trail N.W.) பகுதிக்கு அருகிலுள்ள வாகன நிறுத்துமிடம் மற்றும் பாதை நுழைவாயில் வார இறுதி முழுவதும் மூடப்பட்டிருக்கும் எனப் பொலிஸார் சனிக்கிழமை காலை வெளியிட்ட ஊடக அறிக்கையில் தெரிவித்துள்ளனர்.

“தேடுதல் குழுக்கள் அப்பகுதியில் பாதுகாப்பாகவும் திறம்படவும் தேடுதல் நடவடிக்கைகளை மேற்கொள்வதற்கு இந்த மூடல் உதவும்,” என்று பொலிஸார் தெரிவித்தனர்.

மேலும், “சிறுவன் பார்க்கர் கண்டுபிடிக்கப்பட்டுவிட்டான் என்பதற்கோ அல்லது அவர் இந்தப் பகுதியில் இருப்பதாக விசாரணை அதிகாரிகளுக்குத் தகவல் கிடைத்துள்ளது என்பதற்கோ இந்த மூடல் ஒரு அறிகுறி அல்ல” என்றும் பொலிஸார் தெளிவுபடுத்தியுள்ளனர்.

பொலிஸாரும் அவர்களின் தேடுதல் கூட்டாளர்களும் தேடிவரும் பகுதிகளைத் தவிர்த்து, பூங்காவிற்குச் செல்ல மாற்று வழிகளைப் பயன்படுத்துமாறு பொதுமக்களிடம் பொலிஸார் கேட்டுக்கொண்டுள்ளனர்.

10 ஆவது நாளை எட்டிய தேடுதல் நடவடிக்கை:

கடந்த ஜூலை 16 ஆம் திகதி வியாழக்கிழமை, காலை 11:08 மணிக்கும் 11:41 மணிக்கும் இடைப்பட்ட காலத்தில், கொனாட் டிரைவ் (Connaught Drive N.W.) பகுதியில் அமைந்துள்ள தனது பராமரிப்பு இல்லத்திலிருந்து (day home) பார்க்கர் மாயமாகியுள்ளார்.

பின்னர், கண்காணிப்பு கேமரா (CCTV) காட்சிகளை ஆய்வு செய்தபோது, அவர் கடைசியாக மதியம் 12:52 மணிக்கு ட்ராவிஸ் கிரசண்ட் (Travis Crescent N.E.) பகுதியில் நடமாடியது உறுதி செய்யப்பட்டது.

அதன்பின்னர், கல்கரி நகரம் சமீபத்திய ஆண்டுகளில் கண்டிராத மிகப்பெரிய காணாமல் போன நபருக்கான தேடுதல் நடவடிக்கைகளில் ஒன்றாக விசாரணை விரிவுபடுத்தப்பட்டுள்ளது. இதுவரை 400 க்கும் மேற்பட்ட தகவல்களை விசாரணை அதிகாரிகள் பின்தொடர்ந்து ஆய்வு செய்துள்ளதுடன், 1,000 க்கும் மேற்பட்ட கண்காணிப்பு கேமரா காணொளிகளையும் பரிசீலித்துள்ளனர்.

காணாமல் போன 11 வயது சிறுவனைத் தேடும் பணி பத்தாவது நாளை எட்டியுள்ள நிலையில், அல்பெர்ட்டா மாகாணத்தின் பல்வேறு சமூகங்களைச் சேர்ந்த தன்னார்வலர்கள், அச்சிறுவனை மீட்கும் நோக்கில் தொடர்ந்து கல்கரிக்கு வந்த வண்ணம் உள்ளனர்.

பயிற்சி பெற்ற தேடுதல் குழுக்கள், ரோந்து பொலிஸார், HAWCS ஹெலிகாப்டர், வெப்பப் படிமக் கருவிகள் (thermal imaging) பொருத்தப்பட்ட ட்ரோன்கள், குதிரைப்படை பொலிஸார், மோப்ப நாய்கள் மற்றும் கல்கரி தீயணைப்புப் படைப் பிரிவினர் ஆகியோர் நகரம் முழுவதிலும் உள்ள பூங்காக்கள், நீர்நிலைகள், மழைநீர் வடிகால் கட்டமைப்பு பகுதிகள் மற்றும் பசுமை வெளிகளில் தேடுதல் நடத்தி வருகின்றனர்.

இதனிடையே, வீட்டின் உரிமையாளர்கள், நில உரிமையாளர்கள், ரியல் எஸ்டேட் முகவர்கள் மற்றும் சொத்து பராமரிப்பாளர்கள் தங்களது வீடுகள், கேரேஜ்கள், கொட்டகைகள், டிரெய்லர்கள், வாகனங்கள் மற்றும் காலியாக உள்ள சொத்துக்களைத் மீண்டும் மீண்டும் சோதனையிடுமாறு பொலிஸார் கேட்டுக்கொண்டுள்ளனர். குறிப்பாக ட்ராவிஸ் வீதி, ட்ராவிஸ் கிரசண்ட், ட்ரெல் டிரைவ், டெய்லர் கிரசண்ட், ட்ராவிஸ் பிளேஸ் மற்றும் தோமஸ் வீதி (N.E.) ஆகிய பகுதிகளில் உள்ள சொத்துக்களைச் சோதிக்குமாறு அறிவுறுத்தப்பட்டுள்ளனர்.

பார்க்கருக்குத் திறந்திருக்கும் கட்டிடங்களுக்குள் சென்று கதவுகளை உட்புறமாகப் பூட்டிக்கொள்ளும் பழக்கம் இருப்பதாகத் தெரிவித்துள்ள விசாரணை அதிகாரிகள், இதுவரை சோதனையிடப்படாத ஏதேனும் ஒரு கட்டிடத்திற்குள் அவர் தஞ்சமடைந்திருக்கலாம் என்ற கவலையையும் வெளியிட்டுள்ளனர்.

பொலிஸாரின் அர்ப்பணிப்பு குறித்துப் பேசிய தற்காலிக ஸ்டாஃப் சார்ஜென்ட் ஸ்காட் கட்டர்சன் (Scott Guterson): “நாம் அனைவரும் கேட்கும் ஒரே கேள்வியான ‘பார்க்கர் எங்கே?’ என்பதற்குப் பதில் கிடைக்கும் வரை நாங்கள் ஓய்வெடுக்க மாட்டோம்,” என்று கூறினார்.

“சாத்தியமான அனைத்துத் தேடுதல் வழிகளும் தீர்ந்துபோகும் ஒரு காலம் வரலாம் என்றாலும், நாங்கள் முயற்சியைக் கைவிட மாட்டோம். எவ்வளவு காலம் எடுத்தாலும் காணாமல் போன நபருக்கான இந்த விசாரணையைத் தொடர்ந்து நடத்துவோம்,” என்று கட்டர்சன் மேலும் தெரிவித்தார்