சென்னை:
“தமிழ்நாடு மின்சார வாரியத்திற்கு சுமார் 2.5 லட்சம் கோடி ரூபாய் கடன் நிலுவையில் இருந்தாலும், தவெக அரசு தனது தேர்தல் வாக்குறுதியான 200 யூனிட் இலவச மின்சாரத் திட்டத்தை வரும் ஜூன் மாதம் முதல் நுகர்வோருக்குத் தொடர்ச்சியாக வழங்கும்” என்று மின்சாரத்துறை அமைச்சர் நிர்மல் குமார் அதிரடியாக உறுதி அளித்துள்ளார்.
தமிழ்நாடு மின்சாரத்துறை அமைச்சர் நிர்மல்குமார் சென்னை அண்ணா சாலையில் உள்ள மின்சார வாரியத்தின் தலைமை அலுவலகத்திற்கு (TNEB) நேரில் வருகை தந்து, துறையின் உயர் அதிகாரிகளுடன் 2 மணி நேரத்திற்கும் மேலாகத் தீவிர ஆலோசனை மேற்கொண்டார். இந்த ஆய்வுக் கூட்டத்திற்குப் பிறகு செய்தியாளர்களைச் சந்தித்த அவர் பேசியதாவது: “மின்சார வாரியத்தை மீண்டும் லாபகரமாக மாற்றுவதற்கான அனைத்து சட்டப்பூர்வ முயற்சிகளும் போர்க்கால அடிப்படையில் மேற்கொள்ளப்பட்டு வருகின்றன. முந்தைய திமுக அரசு மின்சார வாரியத்தில் பல்வேறு முறைகேடுகள் மற்றும் விதிமீறல்களை அரங்கேற்றியுள்ளது. கோடிக்கணக்கான பொதுமக்கள் தினசரி பயன்படுத்தும் இந்த மின்சார வாரியத்தை முழுமையாகச் சீரமைக்க வேண்டிய கட்டாயம் நமக்கு உள்ளது. முதலமைச்சர் விஜய்யின் நேரடி உத்தரவின் பேரில் மின்சார வாரியத்திற்குப் புத்துயிர் கொடுக்கும் பணிகளைத் தொடங்கியுள்ளோம்.
பொதுமக்களின் நீண்ட நாள் கோரிக்கையான ‘மாதம் ஒரு முறை மின் கட்டணம்’ (Monthly Billing System) கணக்கிடும் முறையைக் கொண்டுவருவதில் தற்போது ஊழியர்கள் பற்றாக்குறை பெரும் முட்டுக்கட்டையாக உள்ளது. எனவே, புதிய பணியாளர்களை அதிகப்படுத்திவிட்டு தான் இந்தத் திட்டத்தைச் சீராகத் தொடங்க முடியும். எனினும், தவெக-வின் முக்கிய வாக்குறுதியான 200 யூனிட் இலவச மின்சாரம் வழங்கும் திட்டம் வரும் ஜூன் 10-ஆம் தேதியிலிருந்து அதிகாரப்பூர்வமாக நடைமுறைக்கு வரும் என்று ஏற்கனவே உத்தரவிடப்பட்டுள்ளது. மின்சார வாரியத்திற்கு 2.5 லட்சம் கோடி ரூபாய் கடன் சுமை இருந்தாலும், இந்த இலவச மின்சாரத் திட்டத்தை எவ்வித தடையுமின்றி எங்களால் தொடர்ச்சியாகக் கொடுக்க முடியும். அதற்கான மாற்று நிதி ஆதார நடவடிக்கைகளைத் தவெக அரசு மேற்கொண்டு வருகிறது” என்று நம்பிக்கையுடன் தெரிவித்தார்.
இதற்கிடையே, சென்னை சேப்பாக்கத்தில் உள்ள பொதுப்பணித்துறை தலைமை அலுவலகத்தில் பொதுப்பணி மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜூனா தலைமையில் உயர் அதிகாரிகளின் ஆய்வுக் கூட்டம் நடைபெற்றது. புதிய அமைச்சராகப் பொறுப்பேற்றதைத் தொடர்ந்து, மாநிலம் முழுவதும் பொதுப்பணித்துறையின் கீழ் நடைபெற்று வரும் முக்கிய உள்கட்டமைப்புத் திட்டங்கள், புதிய விளையாட்டு மேம்பாட்டு அரங்குகள் மற்றும் நிலுவையில் உள்ள கட்டுமானப் பணிகளின் தற்போதைய நிலை குறித்து அவர் விரிவான ஆலோசனைகளை வழங்கினார். தவெக அரசின் புதிய அமைச்சர்கள் பொறுப்பேற்ற ஒரு வாரத்திற்குள்ளேயே தங்களது துறை சார்ந்த பணிகளில் வேகம் காட்டி வருவதால், தேர்தல் வாக்குறுதிகள் அனைத்தும் விரைவில் சாத்தியமாகும் எனப் பொதுமக்கள் மத்தியில் பெரும் எதிர்பார்ப்பு எழுந்துள்ளது.
#NirmalkumarSpeech #ElectricityMinistryTN #FreeElectricity200 #BreakingNews #May20 #TNEB_Updates #AadhavArjuna #PWD_Meeting #SportsDevelopmentTN #ThalapathyVijay #TVK_Government #NewGovernmentTN #MonthlyBilling #TNEB_Debt #WelfareSchemesTN #AdministrativeReforms #TamilNews #VijayMakkalIyakkam #CM_Vijay_Official_“`
