மிசிசாகா நகரில் செவ்வாய்க்கிழமை மதியம் இடம்பெற்ற கொடூர கத்திக் குத்து சம்பவத்தில் நபர் ஒருவர் உயிரிழந்துள்ளதை அடுத்து, தப்பியோடிய சந்தேகநபர் ஒருவரை பீல் பிராந்திய காவல்துறை (Peel Regional Police) தீவிரமாகத் தேடி வருகிறது.
டண்டாஸ் வீதி மேற்குக்கு (Dundas Street West) வடக்கே உள்ள ஹுரோன்டாரியோ (Hurontario) மற்றும் அக்னஸ் (Agnes) வீதிகளுக்கு அருகில் இருவருக்குள் ஏற்பட்ட மோதல் குறித்து மதியம் 12:25 மணியளவில் தகவல் கிடைத்ததை அடுத்து, சம்பவ இடத்திற்கு அதிகாரிகள் விரைந்ததாக காவல்துறை தெரிவித்துள்ளது.
வீதி முனையொன்றில் உயிருக்கு ஆபத்தான காயங்களுடன் இருந்த ஆண் ஒருவரை அதிகாரிகள் மீட்டதாகப் புலனாய்வாளர்கள் தெரிவித்துள்ளனர். அங்கிருந்த பொதுமக்கள் மற்றும் அவசரக்கால மீட்புப் படையினர் முதலுதவி வழங்கிய போதிலும், பாதிக்கப்பட்ட நபர் சம்பவ இடத்திலேயே உயிரிழந்துள்ளார்.
அருகிலுள்ள கட்டிடத்தின் பின்புற வாகன நிறுத்துமிடத்திலேயே (Rear parking lot) இக்கத்திக் குத்து சம்பவம் இடம்பெற்றுள்ளதாக நம்புவதாக காவல்துறை கூறியுள்ளது.
உயிரிழந்தவரின் நெருங்கிய உறவினர்களுக்கு (Next of kin) இன்னும் உத்தியோகபூர்வமாகத் தகவல் தெரிவிக்கப்படாததால், அவரது அடையாளம் இதுவரை வெளியிடப்படவில்லை.
காவல்துறைக்கு தகவல் வழங்கப்படுவதற்குச் சற்று முன்னர், ஹுரோன்டாரியோ வீதி மற்றும் டண்டாஸ் வீதி மேற்குக்கு அருகில் சந்தேகநபர் கடைசியாகக் காணப்பட்டதாக காவல்துறை தெரிவித்துள்ளது.
சந்தேகநபர் ஆயுதமேந்திய ஆபத்தானவர் எனக் கருதும் அதிகாரிகள், அவரைப் பொதுமக்கள் யாரும் நெருங்க வேண்டாம் என எச்சரித்துள்ளனர்.
