சென்னை:

அரசுப் போக்குவரத்துக் கழகத்தில் வேலை வாங்கித் தருவதாகக் கூறி மாபெரும் மோசடியில் ஈடுபட்டதாகப் பதிவு செய்யப்பட்ட வழக்கில், முன்னாள் அமைச்சர் செந்தில் பாலாஜிக்கு 25 ஆயிரம் பக்கங்கள் கொண்ட குற்றப்பத்திரிகை நகலைச் சென்னை சிறப்பு நீதிமன்றம் வழங்கியுள்ளது.

25,000 பக்க குற்றப்பத்திரிகை:

கடந்த 2011 முதல் 2015-ஆம் ஆண்டு வரை அவர் போக்குவரத்துத் துறை அமைச்சராகப் பதவி வகித்த காலத்தில், போக்குவரத்துக் கழகங்களில் ஓட்டுநர், நடத்துநர் உள்ளிட்ட பல்வேறு பணியிடங்களை நிரப்புவதற்குப் பணம் பெற்றுக்கொண்டு நியமனம் செய்ததாகச் சென்னை மத்திய குற்றப்பிரிவு காவல் துறை வழக்குப்பதிவு செய்தது. இந்த மாபெரும் மோசடி வழக்கில் செந்தில் பாலாஜி உள்ளிட்ட 2,202 பேர் மீது காவல் துறை வழக்குப்பதிவு செய்துள்ளது. இந்த வழக்கு சென்னை மாவட்ட ஆட்சியர் அலுவலக வளாகத்தில் உள்ள எம்.பி மற்றும் எம்.எல்.ஏ-க்கள் மீதான வழக்குகளை விசாரிக்கும் சிறப்பு நீதிமன்றத்தில் தீவிர விசாரணையில் உள்ளது. இந்த வழக்கில் சுமார் 25 ஆயிரம் பக்கங்களைக் கொண்ட மெகா குற்றப்பத்திரிகை நீதிமன்றத்தில் முறைப்படி தாக்கல் செய்யப்பட்டது.

பென் டிரைவ்வில் நகல்:

இந்த நிலையில், இந்த வழக்கில் குற்றம் சாட்டப்பட்ட அனைவரும் நீதிமன்றத்தில் ஆஜராகியிருந்தனர். மேலும், இந்த வழக்கு சிறப்பு நீதிமன்ற நீதிபதி என்.லோகேஸ்வரன் அமர்வு முன் இன்று மீண்டும் விசாரணைக்கு வந்தது. அப்போது முன்னாள் அமைச்சர் செந்தில் பாலாஜி நேரில் ஆஜரானார். பின்னர், இந்த வழக்கில் குற்றம் சாட்டப்பட்டுள்ள செந்தில் பாலாஜி உள்ளிட்ட முதல் 50 பேருக்கு இந்தக் குற்றப்பத்திரிகை நகல் பென் டிரைவ்வில் வழங்கப்பட்டது. அப்போது குற்றம் சாட்டப்பட்டவர்கள் தரப்பில், குற்றப்பத்திரிகை நகல்களைக் காகித வடிவில் வழங்க வேண்டும் எனவும், தற்போது விசாரணை நடைபெறும் நீதிமன்ற அறை குறுகியதாக இருப்பதால் அடுத்த முறை விசாரணையை அனைவரும் கலந்து கொள்ளும் வகையில் நேரு ஸ்டேடியம் அல்லது தீவுத்திடல் போன்ற நெருக்கடியில்லாத இடங்களில் நடத்த வேண்டும் எனவும் மாபெரும் கோரிக்கை வைக்கப்பட்டது.

நவம்பர் 11-க்கு ஒத்திவைப்பு:

குற்றம் சாட்டப்பட்டவர்களின் இந்தக் கோரிக்கைக்குப் பதிலளித்த அரசுத் தரப்பு வழக்கறிஞர்கள், விசாரணையை வேறு இடத்துக்கு மாற்றுவது குறித்துப் பரிசீலித்து விரைவில் முடிவெடுப்பதாகத் தெரிவித்தனர். இதையடுத்து வழக்கை விசாரித்த நீதிபதி, வழக்கில் குற்றம் சாட்டப்பட்டுள்ள 51 ஆவது நபர் முதல் 100 ஆவது நபர்கள் வரையிலானவர்களுக்குக் குற்றப்பத்திரிகை வழங்குவதற்காக வழக்கின் விசாரணையை நவம்பர் 11 ஆம் தேதிக்கு ஒத்திவைத்தார்.

#SenthilBalaji #JobScam #ChennaiCourt #Chargesheet #BmNews #TamilNews #BreakingNews #LatestNews #TamilNewsLive