சென்னை:

முரசு புயல் நேரத்தில் சென்னை காசிமேடு பகுதியைச் சேர்ந்த 9 மீனவர்கள் நடுக்கடலில் சிக்கி மாயமான நிலையில், அவர்களது உடல்கள் ஆந்திர கடலோரப் பகுதியில் கரை ஒதுங்கியுள்ளன. இந்த மாபெரும் துயரச் சம்பவம் குறித்துச் சட்டமன்ற எதிர்க்கட்சித் தலைவர் உதயநிதி ஸ்டாலின் தவெக அரசை மிகக் கடுமையாகக் கேள்வி எழுப்பியுள்ளார்.

https://youtu.be/LEsFoRjHtqk

உதயநிதி இரங்கல்:

இது தொடர்பாக அவர் தனது எக்ஸ் தளத்தில் வெளியிட்டுள்ள பதிவில், “முரசு புயல் நேரத்தில் நடுக்கடலில் சிக்கி மாயமான சென்னை காசிமேடு மீனவர்கள் 9 பேரின் உடல்கள், ஆந்திர கடலோரப் பகுதியில் கரை ஒதுங்கியுள்ளது அறிந்து மிகுந்த வருத்தமுற்றேன். அந்த மீனவச் சகோதரர்களை இழந்து தவிக்கும் அவர்களின் குடும்பத்தினருக்கு என்னுடைய ஆழ்ந்த ஆறுதலையும் இரங்கலையும் தெரிவித்துக் கொள்கிறேன். மீனவர்கள் மாயமானது தொடர்பாக இங்குள்ள சோப்ளாங்கி அரசுக்குத் தகவல் தெரிவித்தும், அவர்களை மீட்பது தொடர்பாக எந்தவொரு நடவடிக்கையும் எடுக்கப்படவில்லை என்று இறந்தவர்களின் உறவினர்கள் கண்ணீரோடு கூறுகின்றனர்,” என்று அவர் மிகுந்த வேதனையுடன் தெரிவித்துள்ளார்.

அரசுக்குச் சாடல்:

தொடர்ந்து அவர், “புயல் நேரத்தில் மீனவர்கள் கடலுக்குள் செல்ல அனுமதி தந்தது யார்? ஒருவேளை மீனவர்கள் முன் கூட்டியே கடலுக்குச் சென்றிருந்தால், வயர்லெஸ் கருவிகள் மூலம் அவர்களைத் தொடர்பு கொண்டு அவர்கள் பாதுகாப்பாகக் கரை திரும்புவதை உறுதி செய்திருக்க வேண்டிய அரசு, எப்படித் தவறியது? உயிரைப் பணயம் வைத்துத் தொழில் செய்யும் மீனவர்களின் உயிரோடு விளையாடும் அளவுக்கு மிகுந்த அலட்சியம் காட்டியுள்ள இந்த ஆட்சியாளர்களை வன்மையாகக் கண்டிக்கிறேன். இந்தச் சம்பவத்தில் உயிரிழந்த மீனவர்களின் குடும்பத்துக்கு ஏற்கனவே அறிவிக்கப்பட்டதைவிட இன்னும் அதிகமான இழப்பீட்டை அரசு தரப்பில் உடனடியாக வழங்க வேண்டும்,” என்று அவர் ஆவேசமாகக் குற்றம் சாட்டியுள்ளார்.

ஆயுள் காப்பீடு:

மேலும், “இது மாதிரியான பெரும் துயரங்கள் இனியும் நடக்காமல் இருக்க, உரிய நடவடிக்கைகள் எடுக்கப்பட வேண்டும். மிக முக்கியமாக கடலுக்குச் செல்லும் ஒவ்வொரு மீனவரும் ஆயுள் காப்பீடு செய்துள்ளதை அரசு உறுதி செய்ய வேண்டும் என ஆணித்தரமாக வலியுறுத்துகிறேன்,” என்று உதயநிதி ஸ்டாலின் தனது பதிவில் திட்டவட்டமாகக் குறிப்பிட்டுள்ளார். இவரின் இந்த அறிக்கை அரசியல் களத்தில் தற்போது மாபெரும் பேசுபொருளாக மாறியுள்ளது.

#UdhayanidhiStalin #CMVijay #MurasuCyclone #Fishermen #BmNews #TamilNews #BreakingNews #LatestNews #TamilNewsLive