2027 வரவு செலவுத் திட்டத்தின் மீதான எதிர்க்கட்சியின் ஆரம்ப உரையை ஹர்ஷ டி சில்வா நிகழ்த்தாதது ஏன் எனப் பிரதமர் ஹரிணி அமரசூரிய கேள்வி
நீண்டகாலப் பாராளுமன்ற மரபிலிருந்து விலகி, 2027ஆம் ஆண்டிற்கான வரவு செலவுத் திட்டத்தின் மீதான எதிர்க்கட்சியின் ஆரம்பப் பதிலுரையை ஐக்கிய மக்கள் சக்தியின் (SJB) பாராளுமன்ற உறுப்பினர் ஹர்ஷ டி சில்வா ஏன் நிகழ்த்தவில்லை எனப் பிரதமர் ஹரிணி அமரசூரிய கேள்வி எழுப்பியுள்ளார்.
இன்று (13) பாராளுமன்றத்தில் உரையாற்றிய பிரதமர், 2020ஆம் ஆண்டில் தாம் பாராளுமன்றத்திற்குத் தெரிவானது முதல், வருடாந்த வரவு செலவுத் திட்டம் சமர்ப்பிக்கப்பட்டதைத் தொடர்ந்து எதிர்க்கட்சி சார்பாக பாராளுமன்ற உறுப்பினர் ஹர்ஷ டி சில்வாவே பாரம்பரியமாக விவாதத்தைத் தொடங்கி வைப்பதைத் தாம் அவதானித்துள்ளதாகத் தெரிவித்தார்.
“வழக்கமாக, எதிர்க்கட்சி சார்பில் பாராளுமன்ற உறுப்பினர் ஹர்ஷ டி சில்வாவே வரவு செலவுத் திட்ட விவாதத்தைத் தொடங்கி வைப்பார். 2020இல் நான் பாராளுமன்றத்திற்கு வந்ததிலிருந்து இதுவே நடைமுறையாக இருந்து வருகிறது. அவரது கருத்துக்களுக்குப் பதிலளிக்க நாங்கள் பொதுவாகத் தயாராவோம். நாம் அரசாங்கத்தில் இருந்தாலும் சரி, எதிர்க்கட்சியில் இருந்தாலும் சரி, வரவு செலவுத் திட்ட உரையைத் தொடர்ந்து அவரது ஆரம்ப உரையைக் கேட்க எப்போதும் தயாராக இருப்போம். இருப்பினும், இன்று அந்த நடைமுறையில் ஒரு மாற்றத்தைக் காண்கிறோம்,” என அவர் கூறினார்.
இந்த மாற்றத்தை அரசாங்கம் வரவேற்பதாகவும், ஆனால் 2027 வரவு செலவுத் திட்டம் குறித்த பாராளுமன்ற உறுப்பினர் ஹர்ஷ டி சில்வாவின் கருத்துக்களைக் கேட்கத் தாம் ஆவலாக இருப்பதாகவும் பிரதமர் தெரிவித்தார்.
ஐக்கிய மக்கள் சக்தியின் பொருளாதாரக் கொள்கைகளில் மாற்றம் ஏற்பட்டுள்ளதா அல்லது அக்கட்சி தனது முந்தைய நிலைப்பாட்டையே தொடர்ந்தும் பேணுகிறதா என்பதைத் தீர்மானிக்க அவரது கருத்துக்கள் உதவும் என்றும் அவர் குறிப்பிட்டார்.
விவாதத்தின் ஆரம்பத்தில் எதிர்க்கட்சித் தலைவர் சஜித் பிரேமதாச ஆற்றிய உரையைச் சுட்டிக்காட்டிய பிரதமர், பொருளாதாரம், சர்வதேச நாணய நிதியம் (IMF) மற்றும் உலக வங்கி ஆகியவை தொடர்பில் அவர் தவறான தகவல்களை முன்வைத்துள்ளதாகக் குற்றம் சாட்டினார்.
இந்தப் பொருளாதார விவகாரங்களில் எதிர்க்கட்சித் தலைவரின் நிலைப்பாட்டையே ஏனைய ஐக்கிய மக்கள் சக்தி பாராளுமன்ற உறுப்பினர்களும் கொண்டுள்ளார்களா என்பதை உறுதிப்படுத்திக்கொள்ள, பாராளுமன்ற உறுப்பினர் ஹர்ஷ டி சில்வாவின் உரைக்காக அரசாங்கம் தற்போது காத்திருப்பதாகவும் பிரதமர் மேலும் தெரிவித்தார்.
