நாட்டில் மீண்டும் 2022 ஆம் ஆண்டைப் போன்றதொரு பாரிய பொருளாதார நெருக்கடி ஏற்படக்கூடும் எனச் சில தரப்பினர் கருத்துக்களை வெளியிட்டு வந்த போதிலும், அத்தகையதொரு இக்கட்டான நிலைமை எக்காரணம் கொண்டும் இனிமேல் நாட்டில் ஏற்படாது என ஜனாதிபதி அனுரகுமார திஸாநாயக்க திட்டவட்டமாகத் தெரிவித்துள்ளார்.
மத்திய கிழக்கில் நிலவும் தற்போதைய பதற்றமான சூழலால் ஏற்பட்டுள்ள சவால்கள் ஒரு தற்காலிக ‘வெளிப்புற நெருக்கடி’ (External crisis) மாத்திரமே எனக் குறிப்பிட்டுள்ள ஜனாதிபதி, அதனை வெற்றிகரமாக நிர்வகிப்பதற்கான முழுமையான பலமும் தகுதியும் தற்போதைய அரசாங்கத்திடம் உள்ளதாகவும் சுட்டிக்காட்டியுள்ளார்.
நாட்டின் பொருளாதாரத்தை வலுப்படுத்துதல், இனவாதத்தைத் தடுத்தல், ஊழல்வாதிகளுக்குத் தண்டனை வழங்குதல், சட்டத்தை அனைத்துப் பிரஜைகளுக்கும் சமமாக நடைமுறைப்படுத்துதல் மற்றும் அரசியல்வாதிகள் அனுபவித்து வந்த மிதமிஞ்சிய சிறப்புரிமைகளைக் குறைத்தல் ஆகிய பிரதான எதிர்பார்ப்புகளின் அடிப்படையிலேயே தற்போதைய அரசாங்கத்திற்கு மக்கள் ஆணை (Mandate) வழங்கியிருந்தனர் என்பதை ஜனாதிபதி சுட்டிக்காட்டினார். இந்த இலக்குகளை அடைவதற்காக அரசாங்கம் ஏற்கனவே கணிசமான அளவிலான பணிகளை நிறைவு செய்துள்ளதாகவும் அவர் குறிப்பிட்டார்.
அனைவருக்கும் சட்டம் சமமாக மதிக்கப்படும் மற்றும் நடைமுறைப்படுத்தப்படும் ஒரு நாட்டைக் கட்டியெழுப்பும் வரலாற்றுப் பொறுப்பைத் தற்போதைய அரசாங்கம் தவறவிட்டால், வேறு எந்தவொரு அரசாங்கத்தாலும் அதனை ஒருபோதும் சாதிக்க முடியாமல் போய்விடும் என்றும் ஜனாதிபதி தெரிவித்தார். அதிகாரம், செல்வம் அல்லது சமூக அந்தஸ்து என எதனையும் பொருட்படுத்தாமல், இன்று நாட்டில் சட்டம் அனைவருக்கும் சமமான முறையிலேயே நிலைநாட்டப்பட்டு வருவதாக அவர் வலியுறுத்தினார்.
அரசியல்வாதிகள் பெற்று வந்த ஓய்வூதியம் உள்ளிட்ட மிதமிஞ்சிய சலுகைகள் மற்றும் சிறப்புரிமைகளை (Excessive privileges) முழுமையாக ஒழிப்பதற்கும், அரசியல்வாதிகளைப் பொதுமக்களுக்குச் சேவையாற்றும் உண்மையான மக்கள் பிரதிநிதிகளாக மாற்றுவதற்கும் தற்போதைய அரசாங்கம் உரிய நடவடிக்கைகளை எடுத்துள்ளதாக ஜனாதிபதி திஸாநாயக்க மேலும் தெரிவித்தார்.
அம்பாறை, நிந்தவூர் கலாசார நிலையத்தின் (Nintavur Cultural Centre) கட்டுமானப் பணிகளை மீண்டும் ஆரம்பித்து வைக்கும் உத்தியோகபூர்வ நிகழ்வில் இன்று (22) காலை கலந்துகொண்டு உரையாற்றிய போதே ஜனாதிபதி அனுரகுமார திஸாநாயக்க மேற்கண்ட விபரங்களைப் பகிர்ந்துகொண்டார்.
கடந்த 1999 ஆம் ஆண்டு முதன்முதலாக ஆரம்பிக்கப்பட்ட இப் பாரிய திட்டத்தின் கட்டுமானப் பணிகள் 2014 ஆம் ஆண்டிலிருந்து முழுமையாக முடக்கப்பட்டிருந்தன. அம்பாறை மாவட்ட மக்களின் நீண்டகாலக் கோரிக்கைக்கு இணங்கவும், மாவட்டத்தின் செழுமையான கலாசார பாரம்பரியத்தை எதிர்கால சந்ததியினருக்குக் கொண்டு சேர்க்கும் நோக்கிலும், சுமார் 24 வருட கால தாமதத்திற்குப் பின்னர் இக் கலாசார நிலையத்தின் கட்டுமானப் பணிகள் தற்போது அரசாங்கத்தினால் மீண்டும் வெற்றிகரமாக ஆரம்பித்து வைக்கப்பட்டுள்ளமை குறிப்பிடத்தக்கது
