2027ஆம் ஆண்டுக்கான திரவப் பெற்றோலிய எரிவாயுவை (LPG) லிட்ரோ நிறுவனத்துக்கு விநியோகிப்பதற்கான ஒப்பந்தத்தை OQ Trading Limited நிறுவனத்துக்கு வழங்குவதற்கு அமைச்சரவை அனுமதி வழங்கியுள்ளது.
இதன்படி, லிட்ரோ நிறுவனத்தின் தேவைக்காக 420,000 மெட்ரிக் டொன் எரிவாயுவைக் கொள்வனவு செய்வதற்கு சர்வதேச போட்டி அடிப்படையில் கேள்விப்பத்திரங்கள் கோரப்பட்டுள்ளன.
இதற்கமைய, நான்கு நிறுவனங்கள் தமது கேள்விப்பத்திரங்களைச் சமர்ப்பித்துள்ளன. அவற்றை மதிப்பீடு செய்ததன் பின்னர், கொள்முதல் குழுவின் பரிந்துரைக்கு அமைய, குறைந்த விலையை முன்வைத்த நிறுவனமாக OQ Trading Limited தெரிவு செய்யப்பட்டுள்ளது.
இந்த விநியோக ஒப்பந்தம் 2027 ஜனவரி முதலாம் திகதி முதல் 12 மாத காலத்துக்கு நடைமுறைப்படுத்தப்படவுள்ளது.
இதன்படி, குறைந்தபட்சம் 336,000 மெட்ரிக் டொன் எரிவாயுவை விநியோகிப்பதற்கான உறுதிப்படுத்தப்பட்ட அளவுடன், சவூதி அராம்கோவின் (Saudi Aramco) ஒப்பந்த விலைக்கு மேலதிகமாக, ஒரு மெட்ரிக் டொன்னுக்கு 133.93 அமெரிக்க டொலர் என்ற விலையில் ஒப்பந்தம் வழங்கப்படவுள்ளது.
காப்புறுதி மற்றும் சரக்குப் போக்குவரத்துச் செலவுகள் உள்ளடங்கிய CIF விலையின் அடிப்படையில் இந்தத் தொகை நிர்ணயிக்கப்பட்டுள்ளது.
நிதி, திட்டமிடல் மற்றும் பொருளாதார அபிவிருத்தி அமைச்சராக ஜனாதிபதியினால் முன்வைக்கப்பட்ட குறித்த யோசனைக்கு அமைச்சரவை அனுமதி வழங்கியுள்ளது.
