கனடா, பிராம்ப்டன் (Brampton) நகரின் குவீன் ஸ்ட்ரீட் ஈஸ்ட் (Queen Street East) மற்றும் கோர்வே டிரைவ் (Goreway Drive) பகுதிக்கு அருகே இடம்பெற்ற வன்முறை வாகனக் கடத்தல் (Carjacking) சம்பவம் தொடர்பாக இரண்டு ஆண்கள் மீது பீல் பிராந்திய காவல்துறையினர் (Peel Regional Police) குற்றம் சுமத்தியுள்ளனர்.

காவல்துறையின் தகவல்படி, கடந்த ஜனவரி 10 ஆம் தேதி அதிகாலை 2:10 மணியளவில் தம்பதியினர் (ஒரு ஆணும் பெண்ணும்) தங்கள் வாகனத்திலிருந்து இறங்கிக் கொண்டிருந்த போது, முகமூடி அணிந்த இரு சந்தேகநபர்கள் அவர்களை அணுகியுள்ளனர். இதன்போது அந்த ஆண் பலவகைத் தாக்குதலுக்கு உள்ளாக்கப்பட்டதுடன், தம்பதியினரின் வாகனத்தைப் பறித்துக்கொண்டு சந்தேகநபர்கள் அங்கிருந்து தப்பியோடியுள்ளனர்.

இச்சம்பவம் நடந்த சில நிமிடங்களிலேயே சந்தேகநபர்களில் ஒருவர் கைது செய்யப்பட்டார். இதனைத் தொடர்ந்து நடத்தப்பட்ட தீவிர கண்காணிப்பு நடவடிக்கையின் மூலம், கடந்த ஜூன் 18 ஆம் தேதி வோன் (Vaughan) பகுதியில் வைத்து இரண்டாவது சந்தேகநபரைக் காவல்துறையினர் கைது செய்தனர்.

கைது செய்யப்பட்ட வோன் பகுதியைச் சேர்ந்த எவன் நர்ஸ் (Evan Nurse – 23) மற்றும் பிராம்ப்டனைச் சேர்ந்த ஷெமார் சல்லபி (Shemar Sallaby – 23) ஆகிய இருவர் மீதும் பின்வரும் குற்றச்சாட்டுகள் சுமத்தப்பட்டுள்ளன:

• கொள்ளை (Robbery)

• குற்ற எண்ணத்துடன் முகத்தை மறைத்தல் (Disguise With Intent)

• அமைதிப் காவற்துறை அதிகாரியிடமிருந்து தப்பியோடுதல் (Flight From a Peace Officer)

• மோட்டார் வாகனத்தை ஆபத்தான முறையில் இயக்குதல் (Dangerous Operation of a Motor Vehicle)

• குற்றச்செயல் மூலம் பெறப்பட்ட சொத்துக்களைத் தன்வசம் வைத்திருத்தல் – இரண்டு வழக்குகள் (Possession of Property Obtained by Crime)

நீதிமன்றத்தில் ஆஜர்படுத்தப்பட்ட இவ்விருவரும் பல கடுமையான நிபந்தனைகளின் கீழ் தற்காலிகமாக விடுவிக்கப்பட்டுள்ளனர்.

இந்தக் கொள்ளைச் சம்பவம் குறித்து ஏதேனும் தகவல் தெரிந்தவர்கள், பீல் பிராந்திய காவல்துறையின் மத்திய கொள்ளை தடுப்புப் பிரிவை (Central Robbery Bureau) 905-453-2121 (ext. 3410) என்ற எண்ணில் தொடர்பு கொள்ளுமாறு கோரப்பட்டுள்ளனர்.

குறிப்பு: சுமத்தப்பட்டுள்ள குற்றச்சாட்டுகள் இன்னும் நீதிமன்றத்தில் நிரூபிக்கப்படவில்லை. குற்றம் சாட்டப்பட்டவர்கள் நீதிமன்றத்தால் குற்றவாளி என நிரூபிக்கப்படும் வரை நிரபராதிகளாகவே கருதப்படுவார்கள்.