கோவை:
தமிழகச் சட்டமன்றத்தில் சனாதனம் குறித்துப் பேசிய எதிர்க்கட்சித் தலைவர் உதயநிதி ஸ்டாலினுக்கு “நல்ல புத்தி வர வேண்டும்” என வேண்டி, இந்து மக்கள் கட்சியின் தலைவர் அர்ஜுன் சம்பத் கோவையில் உள்ள புகழ்பெற்ற விநாயகர் கோவிலில் தோப்புக்கரணம் போட்டு வினோத பிரார்த்தனையில் ஈடுபட்டார்.
தமிழகச் சட்டமன்றத்தில் தவெக அரசின் நம்பிக்கை கோரும் தீர்மானத்தின் மீது பேசிய எதிர்க்கட்சித் தலைவர் உதயநிதி ஸ்டாலின், “சனாதனம் ஒழிக்கப்பட வேண்டும்” என மீண்டும் பேசியிருந்தார். இது அரசியல் களத்தில் பெரும் கண்டனங்களையும் விவாதங்களையும் எழுப்பியுள்ள நிலையில், கோவை புலியகுளத்தில் உள்ள முந்தி விநாயகர் கோவிலில் இந்து மக்கள் கட்சியினர் அர்ஜுன் சம்பத் தலைமையில் திரண்டனர். அங்கு உதயநிதியின் கருத்துக்கு எதிர்ப்புத் தெரிவிக்கும் வகையில் விநாயகர் முன்பாக அவர்கள் தோப்புக்கரணம் போட்டுப் பிரார்த்தனை செய்தனர்.
அதன் பின் செய்தியாளர்களிடம் பேசிய அர்ஜுன் சம்பத், “சங்க காலத் தமிழர்கள் சனாதன இந்து தர்மத்தையே பின்பற்றினர். சனாதனம் என்பது சாதி, மதங்களுக்கு அப்பாற்பட்டது. பேரறிஞர் அண்ணாவின் ‘ஒன்றே குலம் ஒருவனே தேவன்’ என்ற கொள்கை தான் சனாதனத்தின் மையக்கருத்து. அதனை ஏற்றுக்கொண்டவர் தான் அண்ணா. ஏன், தற்போதைய திமுக தலைவர் மு.க.ஸ்டாலினின் மனைவி துர்கா ஸ்டாலின் கூட சனாதன கொள்கையின்படி தான் ஆன்மீக வாழ்வு வாழ்ந்து வருகிறார்” என்று குறிப்பிட்டார்.
தொடர்ந்து முதலமைச்சர் விஜய் குறித்துப் பேசிய அவர், “தன்னை அனைத்து மதங்களுக்கும் பொதுவானவர் என்று காட்டிக் கொள்ளும் முதலமைச்சர் விஜய், உதயநிதியின் இந்த சர்ச்சைப் பேச்சைக் கண்டித்திருக்க வேண்டும். ஆனால் அவர் அமைதி காக்கிறார். தவெக மற்றும் காங்கிரஸ் கட்சியின் நிர்வாகிகள் சிலர் சனாதன தர்மத்தை ஒழிப்போம் என்று வன்மத்துடன் பேசி வருகின்றனர்; அவர்களின் இந்த வன்ம அரசியல் போக்குக்கு முதலமைச்சர் விஜய் பலியாகிவிடக் கூடாது. சனாதனத்தை இழிவுபடுத்துபவர்கள் மீது இந்த அரசு கடுமையான நடவடிக்கை எடுக்க வேண்டும்” என வலியுறுத்தினார். அர்ஜுன் சம்பத்தின் இந்த வினோத போராட்டம் சமூக வலைத்தளங்களில் பரவி வருகிறது.
#ArjunSampath #UdhayanidhiStalin #SanatanaDharma #Controversy #BreakingNews #May17 #CoimbatoreNews #HinduMakkalKatchi #VijayAsCM #TVK_Government #ThalapathyVijay #DMK_Opposition #TNAssembly #PuliakulamVinayagar #AnnaIdeology #DurgaStalin #SpiritualPolitics #TamilNews #VijayMakkalIyakkam #CM_Vijay_Official_“`
