பரந்த அளவிலான இராஜதந்திர மற்றும் மக்கள் நலன் சார்ந்த பயணமாக, இந்தியக் குடியரசுத் துணைத் தலைவர் சி.பி. ராதாகிருஷ்ணன் அவர்கள் ஏப்ரல் 19 முதல் இரண்டு நாள் உத்தியோகபூர்வ பயணமாக இலங்கை வருகை தருகிறார். இதன்போது அவர் இலங்கையின் உயர்மட்டத் தலைவர்களுடன் பேச்சுவார்த்தை நடத்துவதுடன், இந்திய வம்சாவளித் தமிழ் மக்களுடனும் கலந்துரையாடவுள்ளார்.

இது இரு நாடுகளுக்கும் இடையிலான இருதரப்பு உறவுகளில் ஒரு குறிப்பிடத்தக்க மைல்கல்லாகக் கருதப்படுகிறது.

இலங்கைக்கான இந்தியத் தூதுவர் சந்தோஷ் ஜா தெரிவித்துள்ளபடி, இந்தியக் குடியரசுத்துணைத் தலைவரின் பயணத் திட்டத்தில் இலங்கை ஜனாதிபதி அனுர குமார திஸாநாயக்க, பிரதமர் ஹரிணி அமரசூரிய மற்றும் எதிர்க்கட்சித் தலைவர் ஆகியோருடனான சந்திப்புகள் அடங்கும். அத்துடன் இலங்கைத் தமிழ்க் கட்சிகள் மற்றும் இந்திய வம்சாவளித் தமிழ் அரசியல் குழுக்களின் பிரதிநிதிகளுடனும் அவர் கலந்துரையாடுவார்.

இந்தியக் குடியரசுத் துணைத் தலைவரின் வருகைக்கு முன்னதாக ANI செய்தி நிறுவனத்திடம் பேசிய சந்தோஷ் ஜா, இந்த விஜயமானது உத்தியோகபூர்வ இராஜதந்திரம் மற்றும் அடிமட்ட மக்களுடனான தொடர்பு ஆகியவற்றின் வலுவான கலவையாக இருக்கும் என்று குறிப்பிட்டார். இலங்கையில் வசிக்கும் சுமார் 1.5 மில்லியன் இந்திய வம்சாவளித் தமிழர்களுடனான சமூக வரவேற்பு நிகழ்ச்சியிலும் சி.பி. ராதாகிருஷ்ணன் பங்கேற்று உரையாற்றுவார் என்று எதிர்பார்க்கப்படுகிறது.”அவர் ஜனாதிபதியைச் சந்திப்பார்; அவர் பிரதமரைச் சந்திப்பார்; அவர் எதிர்க்கட்சித் தலைவரைச் சந்திப்பார். பின்னர் அவர் இலங்கைத் தமிழ்க் கட்சிகள் மற்றும் இந்திய வம்சாவளித் தமிழ் அரசியல் கட்சிகளின் தலைவர்களைச் சந்திப்பார்,” என்று சந்தோஷ் ஜா துணைத் தலைவரின் பயணத் திட்டங்களை விவரித்தார்.

பயணத்தின் இரண்டாம் நாளில், சி.பி. ராதாகிருஷ்ணன் இலங்கையின் அழகிய தேயிலை விளையும் பிராந்தியமான நுவரெலியாவிற்குச் செல்வார். இங்கு இந்திய வம்சாவளித் தமிழ் சமூகத்தினர் பெருமளவில் வசிக்கின்றனர். அங்கு இந்தியாவின் வீடமைப்புத் திட்டத்தின் (கட்டம் III) கீழ் உருவாக்கப்பட்ட குடியிருப்புகளை அவர் பார்வையிடுவார்.

இத்திட்டத்தின் கீழ் ஏற்கனவே 4,000 வீடுகள் கட்டப்பட்டுள்ளன, மேலும் 10,000 வீடுகள் தற்போது கட்டப்பட்டு வருகின்றன.இந்த வீடுகளில் வசிக்கும் குடும்பங்களுடன் சி.பி. ராதாகிருஷ்ணன் நேரடியாக உரையாடி, அவர்களின் கவலைகள் மற்றும் அனுபவங்களைக் கேட்டறியவுள்ளதால், இந்த விஜயம் குறிப்பாக நெகிழ்ச்சியானதாக இருக்கும் என எதிர்பார்க்கப்படுகிறது.

“அவர் ஒரு கிராமத்திற்குச் செல்வார், அங்கு எமது இந்திய வீடமைப்புத் திட்டத்தின் (கட்டம் 3) கீழ் நாம் வீடுகளைக் கட்டியுள்ளோம். இதன் கீழ் ஏற்கனவே 4,000 வீடுகளைக் கட்டியுள்ளோம், தற்போது அந்தப் பகுதியில் மேலும் 10,000 வீடுகளைக் கட்டி வருகிறோம். எனவே, சி.பி. ராதாகிருஷ்ணன் அங்கு சென்று, குடியிருப்பாளர்களைச் சந்தித்து, அவர்களுடன் பேசி, அவர்களின் பிரச்சினைகளைப் புரிந்துகொள்ள முயற்சிப்பார். இது இயற்கையாகவே இந்திய வம்சாவளித் தமிழ் சமூகத்துடனான எமது தொடர்பை வலுப்படுத்தும்,” என்று இந்தியத் தூதுவர் கூறினார்.

சி.பி. ராதாகிருஷ்ணர் நுவரெலியாவில் உள்ள புனிதமான சீதா அம்மன் கோவிலுக்கும் விஜயம் செய்வார், இது இந்தப் பயணத்திற்கு கலாசார மற்றும் ஆன்மீக பரிமாணத்தைச் சேர்க்கிறது. இந்த விஜயம் இலங்கையில் பெரும் எதிர்பார்ப்பை ஏற்படுத்தியுள்ளதாகவும், பல தலைவர்கள் மற்றும் பொதுப் பிரமுகர்கள் அவரைச் சந்திக்க விரும்புவதாகவும் சந்தோஷ் ஜா குறிப்பிட்டார். “அவரது வருகை குறித்து அதிக உற்சாகமும் எதிர்பார்ப்பும் உள்ளது,” என்று கூறிய அவர், இரு நாடுகளுக்கும் இடையே தொடர்ந்து நடைபெற்று வரும் உயர்மட்டப் பரிமாற்றங்களின் தொடர்ச்சியாகவே இது அமைகிறது என்றார்.”

இந்த விஜயம் (இந்திய) பிரதமரின் வருகைக்கு சரியாக ஓராண்டுக்குப் பிறகு நிகழ்கிறது. கடந்த இரண்டு முதல் மூன்று ஆண்டுகளில், தொடர்ச்சியான உயர்மட்டப் பரிமாற்றங்கள் இடம்பெற்றுள்ளன,” என்று அவர் மேலும் கூறினார்.

2024 டிசம்பரில் இலங்கை ஜனாதிபதியின் இந்தியப் பயணம், 2025 ஏப்ரலில் இந்தியப் பிரதமர் நரேந்திர மோடியின் இலங்கைப் பயணம் மற்றும் இரு தரப்புக்கும் இடையிலான மேலதிக தலைமைத்துவப் பரிமாற்றங்களை அவர் சுட்டிக்காட்டினார். இந்த விஜயத்தை ஒரு “முக்கிய மைல்கல்” என்று வர்ணித்த சந்தோஷ் ஜா, இது இருதரப்பு உறவுகளின் முழு அளவையும் மீளாய்வு செய்வதற்கான வாய்ப்பை வழங்கும் என்றார்.”மக்களிடையிலான தொடர்புகள் மற்றும் எமது உறவுகளுக்கு மேலதிக ஆழத்தை கொண்டு வருவது குறித்து நாங்கள் பேசுவோம். இன்று எமது உறவுகள் மிகவும் வலுவாக உள்ளன, ஆனால் அவற்றை எவ்வாறு மேலும் முன்னோக்கி எடுத்துச் செல்வது என்பது குறித்து நாங்கள் விவாதிப்போம்,” என்று அவர் கூறினார்

இந்தியாவின் “அண்டை நாட்டுக்கு முன்னுரிமை” (Neighbourhood First) கொள்கை மற்றும் Vision MAHASAGAR கட்டமைப்பின் கீழ் இலங்கை ஒரு முக்கிய பங்காளியாக இருப்பதாக இந்திய வெளியுறவு அமைச்சகம் விவரித்துள்ளது. இந்தப் பயணம் இரு நாடுகளுக்கும் இடையிலான பல நூற்றாண்டுகள் பழமையான நாகரீகத் தொடர்புகளை மேலும் வலுப்படுத்துவதுடன், இரு நாடுகளுக்கும் இடையிலான நீடித்த மக்களிடையிலான உறவை ஆழமாக்கும் என்றும் தெரிவிக்கப்பட்டுள்ளது.