பிரித்தானிய ர்களை இலக்கு வைத்து, குடியேற்றவாசிகளுக்கு எதிரான போலி AI (செயற்கை நுண்ணறிவு) உள்ளடக்கங்களை உருவாக்கி, அதனைப் பரப்பி வந்த இலங்கை மற்றும் பிற நாடுகளைச் சேர்ந்த சில சமூக ஊடகப் பக்கங்களை பிபிசி (BBC) அடையாளம் கண்டுள்ளது.
பிபிசி பனோரமா (BBC Panorama) மற்றும் ‘டாப் கமெண்ட்’ (Top Comment) போட்காஸ்ட் (Podcast) ஆகியவை இணைந்து நடத்திய விசாரணையின்படி, “கிரேட் பிரிட்டிஷ் பீப்பிள்” (Great British People) என்ற முக்கியப் பக்கம் அடையாளம் காணப்பட்டுள்ளது. இந்தப் பக்கம் Yorkshire இல் இருப்பதாகக் கூறிக்கொண்ட போதிலும், இது இலங்கையிலுள்ள ஒரு நபரால் இயக்கப்பட்டு வந்தது கண்டறியப்பட்டுள்ளது.
இதேபோல், AI மூலம் உருவாக்கப்பட்ட போராட்டங்கள் மற்றும் குடியேற்றவாசிகளுக்கு எதிரான உள்ளடக்கங்களைப் பகிர்ந்து வந்த “பிரிட்டன் டுடே” (Britain Today) என்ற மற்றொரு பக்கமும் இலங்கையை தளமாகக் கொண்டு இயங்குவதை மெட்டா (Meta) நிறுவனத்தின் வெளிப்படைத்தன்மை கருவிகள் (Transparency tools) மூலம் உறுதிப்படுத்தியுள்ளதாக அந்த அறிக்கை தெரிவிக்கிறது.
பிரித்தானியாவின் நாடாளுமன்றத்தில் ஷரியா சட்டம் அமல்படுத்தப்படுவது போன்ற போலி காட்சிகள், சீரழிந்து வரும் எதிர்கால பிரித்தானிய நகரங்கள் மற்றும் குடியேற்றத்திற்கு எதிரான கதையாடல்கள் உள்ளிட்ட பிரித்தானியாவின் ஒரு இருண்ட எதிர்காலக் காட்சிகளை சித்தரிக்கும் AI வீடியோக்களை இந்தப் பக்கங்கள் வெளியிட்டு, அதன் மூலம் சமூக ஊடக ஈடுபாட்டை (Engagement) அதிகரிக்க முயன்றுள்ளன.
இலங்கை, அமெரிக்கா, வியட்நாம், மாலைத்தீவு மற்றும் பல நாடுகளைச் சேர்ந்த ஒன்றோடொன்று இணைக்கப்பட்ட பல கணக்குகள் (Accounts) இவ்வாறான உள்ளடக்கங்களை விளம்பரப்படுத்துவதில் ஈடுபட்டுள்ளதாக பிபிசி தெரிவித்துள்ளது. தங்களது பக்கங்களின் பார்வைகளை (Engagement) அதிகரித்து, அதன் மூலம் வருமானம் ஈட்டுவதற்காகவே (Revenue) இத்தகைய உள்ளடக்கங்களை பதிவிட்டதாக சில உள்ளடக்க உருவாக்குநர்கள் ஒப்புக்கொண்டுள்ளனர்.
இவற்றில் ஈடுபடும் சில பக்கங்களின் உரிமையாளர்கள் விளம்பர கிளிக்குகள் மற்றும் பணமாக்குதல் (Monetisation) ஆகியவற்றையே நோக்கமாகக் கொண்டு இயங்குவதாகத் தோன்றினாலும், இத்தகைய உள்ளடக்கங்கள் பரந்த அளவிலான தவறான தகவல் பரப்புரைகளுக்கும் (Misinformation) செல்வாக்கு செலுத்தும் முயற்சிகளுக்கும் வழிவகுக்கும் என்று நிபுணர்கள் எச்சரித்துள்ளனர்
