நிறுத்தப்பட்டிருந்த வாகனமொன்றினுள் பெண் ஒருவர் சடலமாகக் கண்டெடுக்கப்பட்ட தெல்தெனிய கொலைச் சம்பவத்தின் பிரதான சந்தேக நபர் யாழ்ப்பாணத்தில் வைத்து கைது செய்யப்பட்டுள்ளதாக காவல்துறையினர் தெரிவித்துள்ளனர்.
நுவரெலியா திசாவிற்கு பொறுப்பான சிரேஷ்ட பிரதிப் பொலிஸ் மா அதிபரின் (SDIG) கூற்றுப்படி, சந்தேக நபரும் அவரது மனைவியும் நேற்று (24) வெள்ளவத்தையிலிருந்து யாழ்ப்பாணம் நோக்கி பேருந்து மூலம் பயணிப்பதாகக் கிடைத்த ரகசியத் தகவலையடுத்து, யாழ்ப்பாண குற்றப் புலனாய்வுப் பிரிவினரும் வாலாணை ஊழல் தடுப்புப் பிரிவினரும் இணைந்து யாழ்ப்பாணப் பகுதியில் வைத்து இவர்களைக் கைது செய்துள்ளனர்.
கைது செய்யப்படும் போது, பிரதான சந்தேக நபர் முகக்கவசம் (Face mask) அணிந்திருந்ததாகவும், அவரது மனைவி முஸ்லிம் பெண் போன்று ஆடை அணிந்து தனது அடையாளத்தை மறைத்திருந்ததாகவும் (Disguised) தெரிவிக்கப்படுகிறது.
விசாரணைகளின் போது, தான் வவுனியாவிலிருந்து குருநாகலுக்குச் சென்று, அங்குள்ள தனது மற்றுமொரு இரு பிள்ளைகளைப் பார்த்துவிட்டு பின்னர் காவல்துறையினரிடம் சரணடையத் திட்டமிட்டிருந்ததாக சந்தேக நபர் வாக்குமூலம் அளித்துள்ளார்.
வாலாணை மத்திய ஊழல் தடுப்புப் பிரிவின் பணிப்பாளர், உதவிப் பொலிஸ் அத்தியட்சகர் (ASP) ரோஹண ஒலுகலவின் நேரடி மேற்பார்வையின் கீழ் இந்த வெற்றிகரமான கைது நடவடிக்கை முன்னெடுக்கப்பட்டது.
சந்தேக நபர்கள் கடந்த சில நாட்களாக நீர்கொழும்பு மற்றும் சிலாபம் ஆகிய பகுதிகளில் தங்கியிருந்ததுடன், கடல் மார்க்கமாக நாட்டிலிருந்து தப்பியோட முயன்றிருந்தமையும் புலனாய்வாளர்களின் ஆரம்பகட்ட விசாரணைகளில் இருந்து தெரியவந்துள்ளது.
கைது செய்யப்பட்டுள்ள சந்தேக நபர்கள் மேலதிக விசாரணைகளுக்காக நுவரெலியா காவல்துறையினரிடம் ஒப்படைக்கப்படவுள்ளனர்.
பின்னணி:
தெல்தெனிய பகுதியில் நிறுத்தப்பட்டிருந்த வாகனமொன்றினுள் பெண்ணொருவரின் சடலம் காணப்படுவதாக அடையாளம் தெரியாத நபர் ஒருவர் வழங்கிய தொலைபேசி தகவலின் அடிப்படையிலேயே தெல்தெனிய காவல்துறையினர் விசாரணைகளை ஆரம்பித்திருந்தனர். சம்பவ இடத்திற்கு விரைந்த அதிகாரிகள், பூட்டப்பட்டிருந்த வாகனத்தின் கதவை பலவந்தமாகத் திறந்து சடலத்தை மீட்டனர்.
இவ்வாறு சடலமாக மீட்கப்பட்டவர் வெலிகம பகுதியைச் சேர்ந்த 33 வயதுடைய பெண் எனவும், அவர் அம்பாறை மருத்துவமனையில் பௌதிக சிகிச்சை நிபுணராக (Physiotherapist) கடமையாற்றியவர் எனவும் அடையாளம் காணப்பட்டுள்ளார்.
உயிரிழந்த பெண்ணின் காதலனே அவரது சடலத்தை வாகனத்தில் கொண்டு வந்து அவ்விடத்தில் கைவிட்டுவிட்டு தப்பியோடியிருக்கலாம் என ஆரம்பகட்ட விசாரணைகள் சுட்டிக்காட்டியிருந்தன.
மேலும், குறித்த பெண் கடந்த ஜூன் 3 முதல் ஜூன் 16ஆம் தேதி வரை நுவரெலியாவில் உள்ள விடுதியொன்றில் தங்கியிருந்ததும் தெரியவந்துள்ளது. அந்த காலகட்டத்தில் அப்பெண் மயக்கமடைந்த நிலையில் இருந்தபோது, அவரது காதலன் அவரைத் தூக்கிச் செல்லும் காட்சிகள் அங்கிருந்த சிசிடிவி (CCTV) கேமராவில் பதிவாகியிருந்தன.
தெல்தெனிய காவல்துறையினருக்கு ஆரம்பத்தில் தொலைபேசி மூலம் தகவல் வழங்கிய நபர் இக்கொலையுடன் தொடர்புடைய காதலன் தான் என்பதை உறுதிப்படுத்திய காவல்துறையினர், எனினும் அவர் தொடர்ந்து தலைமறைவாகி தப்பித்து வந்த நிலையிலேயே தற்போது யாழ்ப்பாணத்தில் வைத்து கைது செய்யப்பட்டுள்ளார்.
