மணப்பாறை:

கடந்த திமுக ஆட்சியில் சட்டம் ஒழுங்கு ஏதோ சரியாகப் பராமரிக்கப்பட்டது போல எதிர்க்கட்சிகள் பேசுவது முற்றிலும் அரசியல் காழ்ப்புணர்ச்சி எனச் சிறுபான்மை நலத்துறை அமைச்சர் ஷாஜகான் மிகக் கடுமையாகக் கேள்வி எழுப்பியுள்ளார்.

ஊழலற்ற ஆட்சி:

திருச்சி மாவட்டம் மணப்பாறை அடுத்த புத்தாநத்தம் பகுதிக்கு வந்த அமைச்சர் ஷாஜகான் செய்தியாளர்களைச் சந்தித்துப் பேசினார். அப்போது அவர் கூறுகையில், “தற்போதைய தவெக அரசின் இந்த ஆறு மாத கால ஆட்சி என்பது, மக்கள் எதை விரும்பி மாற்றத்திற்காக வாக்களித்தார்களோ அதை நிறைவேற்றக்கூடிய வகையிலே மிகச் சிறப்பான ஆட்சியாக நடந்து கொண்டிருக்கிறது. தமிழக வரலாற்றிலேயே முதன்முறையாக லஞ்சம் மற்றும் ஊழல் இல்லாத ஆட்சி என்று பிரகடனம் செய்யப்பட்டு, அதை இந்த அரசு உறுதியாகப் பின்பற்றி வருகிறது,” என்று பெருமிதத்துடன் தெரிவித்தார்.

உதவித்தொகை வழங்கப்படும்:

தொடர்ந்து கல்வி உதவித்தொகை குறித்துப் பேசிய அவர், “வெளிநாடு சென்று பயிலும் மாணவர்களுக்குச் சமூக நீதித்துறையின் சார்பில் மட்டுமின்றி, சிறுபான்மை நலத்துறையின் சார்பிலும் நிதி வழங்கப்படுகிறது. தகுதியுடன் விண்ணப்பித்த அனைவருக்கும் அதற்கான தொகை உறுதியாக வழங்கப்படும். கடந்த வருடம் சிறுபான்மை சமுதாயத்தைச் சார்ந்த 10 நபர்களுக்குக் கொடுக்கப்பட்டது. இந்த வருடம் தேதிகள் நீட்டிப்பு செய்த பிறகும் 15, 16 விண்ணப்பங்கள் மட்டுமே வந்துள்ளன. அதில் தகுதி படைத்த விண்ணப்பங்கள் 7 மட்டுமே பெறப்பட்ட காரணத்தால், மீண்டும் அதற்கான தேதியைத் தள்ளி வைத்திருக்கிறோம். விண்ணப்பம் சரியாக இருக்கும்போது அவருக்கான உதவியை அரசு நிச்சயமாக வழங்கும்,” என்று விளக்கமளித்தார்.

அரசியல் காழ்ப்புணர்ச்சி:

சட்டம் ஒழுங்கு குறித்த கேள்விக்குப் பதிலளித்த அவர், “கடந்த 5 ஆண்டு கால திமுக ஆட்சியில் சட்டம் ஒழுங்கு ஏதோ சரியாகப் பராமரிக்கப்பட்டது போலவும், அமைதிப் பூங்காவாக இருந்தது போலவும் எதிர்க்கட்சித் தலைவராக உள்ள உதயநிதி ஸ்டாலின், கனிமொழி போன்றவர்கள் தவெக அரசின் மீது குற்றம் சுமத்துவது அரசியல் ரீதியான காழ்ப்புணர்ச்சி. திமுக ஆட்சியில் 9,000 கொலைகள் நடைபெற்றன. அதற்காக நான் இப்போது கொலை நடப்பதை ஒருபோதும் நியாயப்படுத்திப் பேசவில்லை,\” என்று பதிலடி கொடுத்தார்.

உறுதியான நடவடிக்கை:

மேலும் அவர் கூறுகையில், “ஆளுங்கட்சி எம்.எல்.ஏ.க்கள் மீது சமூக வலைதளங்களில் தினந்தோறும் பல வகையான செய்திகளைத் தொடர்ந்து எழுதிக் கொண்டிருக்கிறார்கள். அதன் மீது உறுதியான குற்றச்சாட்டு கொடுக்கப்பட்டுப் புகார் அளிக்கப்பட்டு, அதில் உண்மை இருக்கும் என்றால் முதலமைச்சர் விஜய் அவர்கள் மீது உறுதியான மற்றும் கடுமையான நடவடிக்கையை எடுப்பார். சூப்பர் எல் நினோ தாக்கத்தால் தான் தற்போது விலைவாசி ஏறியுள்ளது. உலக நாடுகளிலும் பிற மாநிலங்களிலும் இந்த விலை ஏற்றம் கடுமையாக உள்ளது. ஆனால் தமிழகத்தைப் பொறுத்தவரை அதைக் கட்டுக்குள் கொண்டு வர வேண்டும் என்ற அடிப்படையிலே முதலமைச்சர் பல்வேறு ஆக்கப்பூர்வமான நடவடிக்கைகளை எடுத்து வருகிறார்,” என்று அமைச்சர் ஷாஜகான் ஆணித்தரமாகத் தெரிவித்தார்.