தனியாக வசிக்கும் முதியோர்கள் மற்றும் தனிநபர்கள் குற்றச்செயல்களுக்கும் ஏனைய ஆபத்துகளுக்கும் இலக்காகும் அபாயம் அதிகரித்து வருவதாக எச்சரித்துள்ள ஸ்ரீலங்கா பொலிஸார், அவர்களின் பாதுகாப்பு மற்றும் நல்வாழ்வு குறித்து பொதுமக்கள் அதிக கவனம் செலுத்த வேண்டும் என வலியுறுத்தியுள்ளனர்.
இது தொடர்பாக வெளியிடப்பட்டுள்ள அறிக்கையில், பிள்ளைகள் வேலைவாய்ப்புக்காக அல்லது குடியேற்றத்திற்காக வெளிநாடுகளுக்குச் சென்றுவிட்டதால் அல்லது நாட்டின் ஏனைய பகுதிகளில் வசிப்பதால், முதியோர்கள் வீடுகளில் தனியாக வசிக்கும் சம்பவங்கள் அதிகரித்து வருவது தற்பொழுது ஒரு பெரும் கவலையாக மாறியுள்ளதாக பொலிஸார் தெரிவித்துள்ளனர்.
இவ்வாறு தனியாக இருக்கும் வீடுகளைக் குறிவைத்து, போதைப்பொருள் பழக்கத்திற்கு அடிமையானவர்கள் உள்ளிட்ட குற்றவாளிகள் பணம், நகைகள் மற்றும் ஏனைய மதிப்புமிக்கப் பொருட்களைக் கொள்ளையடிக்க முற்படுகின்றனர். சமீபகாலமாக இடம்பெற்ற இவ்வாறான சில குற்றச்செயல்கள், கொடூரமான தாக்குதல்கள் மற்றும் கொலைகள் வரை நீடித்துள்ளதாக விசாரணைகளில் தெரியவந்துள்ளது.
எனவே, முதியோர்கள் வசிக்கும் வீடுகளில் இரவு நேரங்களில் போதிய வெளிச்சம் இருப்பதை உறுதி செய்யுமாறும், அறிமுகமில்லாத நபர்களை வீட்டிற்குள் அனுமதிப்பதைத் தவிர்க்குமாறும், பாதுகாப்பு மற்றும் அவசர உதவிகளைப் பெறுவதற்காக அண்டை வீட்டாருடன் வழக்கமான தொடர்பைப் பேணுமாறும் பொதுமக்கள் அறிவுறுத்தப்பட்டுள்ளனர்.
மேலும், தனியாக வாழும் முதியோர்கள் பற்றிய விபரங்களை அந்தந்தப் பகுதி கிராம உத்தியோகத்தர்கள் (Grama Niladhari) மற்றும் சமூகப் பொலிஸ் குழுக்களுக்குத் (Community Policing Committees) தெரியப்படுத்துமாறும், முக்கிய தொடர்பு எண்களைக் கொண்ட, எளிதாகப் பயன்படுத்தக்கூடிய மொபைல் போன்களை அவர்களுக்கு வழங்குமாறும், அவசர கால தொடர்பு எண்களை வீட்டின் உள்ளே தெளிவாகத் தெரியும்படி எழுதி வைக்குமாறும் பொலிஸார் குடும்பத்தினரைக் கேட்டுக்கொண்டுள்ளனர்.
இவற்றுடன், முதியோர்களைப் பராமரிப்பதற்காகப் பணியாளர்கள் அல்லது வீட்டு உதவியாளர்களை வேலைக்கு அமர்த்துபவர்கள், அவர்களின் பின்னணியை கவனமாகச் சரிபார்க்க வேண்டும் என்றும், அவர்களை வேலைக்குச் சேர்ப்பதற்கு முன்னர் பொலிஸ் சான்றிதழ் அறிக்கைகளைப் (Police clearance reports) பெற்றுக்கொள்வது அவசியம் என்றும் அறிவுறுத்தப்பட்டுள்ளது.
குடும்பத்திலுள்ள முதியவர்களின் நல்வாழ்வில் பொதுமக்கள் எப்போதும் விழிப்புடன் இருக்க வேண்டும் என்றும், சாத்தியமான அச்சுறுத்தல்களை முன்கூட்டியே கண்டறிந்து அவற்றைத் தடுப்பதற்கான தீவிர நடவடிக்கைகளை எடுக்குமாறும் ஸ்ரீலங்கா பொலிஸார் மேலும் வலியுறுத்தியுள்ளனர்.
