கனடாவின் ஹாலிஃபாக்ஸ் (Halifax) நகரில் இரண்டு நாட்களாக முன்னெடுக்கப்பட்டு வந்த தீவிர தேடுதல் நடவடிக்கையின் பின்னர், மாயமாகியிருந்த புதுப்பிறந்த குழந்தையின் உடல் எச்சங்கள் (Remains) காப்புக்காட்டுப் பகுதியொன்றில் இருந்து கண்டெடுக்கப்பட்டுள்ளதுடன், இது தொடர்பாக இருவருக்கு எதிராகக் குற்றச்சாட்டுகள் பதியப்பட்டுள்ளதாகப் பொலிஸார் தெரிவித்துள்ளனர்.

ஹாலிஃபாக்ஸ் பிராந்தியப் பொலிஸாரின் விபரங்களின்படி, ஞாயிற்றுக்கிழமை பிற்பகல் 3:20 மணியளவில் ‘ஓல்ட் கோச் வீதிக்கு’ (Old Coach Road) அப்பால் உள்ள ஒரு அடர்ந்த காப்புக்காட்டுப் பகுதியில் (Wooded area) இருந்து இக் குழந்தையின் உடல் எச்சங்கள் மீட்கப்பட்டுள்ளன.

கடந்த வெள்ளிக்கிழமை இரவு 9:40 மணியளவில், உயிருக்கு ஆபத்தான நிலையில் பெண் ஒருவர் வைத்தியசாலையில் அனுமதிக்கப்பட்டதை அடுத்து, அவர் சற்று நேரத்திற்கு முன்னரே ஒரு குழந்தையைப் பெற்றெடுத்துள்ளார் என்பதை மருத்துவ அதிகாரிகள் கண்டறிந்து பொலிஸாருக்கு அவசரத் தகவல் வழங்கியிருந்தனர். ஞாயிற்றுக்கிழமை பிற்பகல் நிலவரப்படி, 23 வயதுடைய அவ் இளம் பெண் தொடர்ந்து தீவிர சிகிச்சைப் பிரிவில் (Critical condition) அனுமதிக்கப்பட்டுள்ளார்.

அவ் பெண்ணிற்கு திடீரென ஏற்பட்ட கடுமையான பிரசவ மருத்துவ அவசரநிலை (Medical emergency) காரணமாகவே இந்த நிலை ஏற்பட்டுள்ளதாகவும், இதில் வன்முறைகள் எதுவும் இடம்பெற்றதற்கான ஆதாரங்கள் இல்லையென்றும் பொலிஸார் நம்புகின்றனர்.

இச் சம்பவத்தை அடுத்து, சனிக்கிழமை முழுவதும் பொலிஸாரும் தரைவழி மீட்புக் குழுவினரும் ‘214 வில்லட் வீதி’ (214 Willett Street) பகுதியைச் சூழவுள்ள இடங்களில் பாரியத் தேடுதல் வேட்டையை முன்னெடுத்திருந்தனர். இதன்போது அங்கிருந்த பெரிய குப்பைத் தொட்டிகளையும் பொலிஸ் தடயவியல் நிபுணர்கள் தீவிரமாகச் சோதனையிட்டிருந்தனர்.

எனினும், ஞாயிற்றுக்கிழமை கிடைத்த புதிய புலனாய்வுத் தகவல்களின் (New information) அடிப்படையில், தேடுதல் நடவடிக்கையானது ‘புரொஸ்பெக்ட் வீதி’ (Prospect Road) மற்றும் அதனைச் சூழவுள்ள பகுதிகளுக்கு மாற்றப்பட்டது. அங்கு நடத்தப்பட்ட சோதனையிலேயே குழந்தையின் உடல் எச்சங்கள் கண்டறியப்பட்டன.

இது குறித்து ஹாலிஃபாக்ஸ் பொலிஸ் அதிபர் டொன் மெக்லீன் (Chief Don MacLean) விடுத்துள்ள உத்தியோகபூர்வ ஊடக அறிக்கையில்:

“இத்தகைய தருணங்கள் அவசர உதவிப் பிரிவினருக்கு (First responders) மிகவும் கடினமான ஒன்றாகும். இந்த இழப்பின் பாரிய துயரத்தை நாமும் உணர்வதுடன், இச் சமூகத்தோடு இணைந்து துக்கத்தைப் பகிர்ந்து கொள்கிறோம். இதற்கான உண்மையான காரணங்களைக் கண்டறிய எமது குழுவினர் அயராது உழைத்து வருகின்றனர்” எனக் குறிப்பிட்டுள்ளார்.

இக் குழந்தையின் மரணத்திற்கான துல்லியமான காரணம் மற்றும் அது எவ்வாறு நிகழ்ந்தது என்பதைக் கண்டறிவதற்காக, நோவா ஸ்கோடியா மாகாண மரண பரிசோதகர் அலுவலகத்தினால் (Medical Examiner) விசேட பிரேதப் பரிசோதனை (Autopsy) முன்னெடுக்கப்படவுள்ளது.

இச் சம்பவம் தொடர்பாகச் சனிக்கிழமை சந்தேகத்தின் பேரில் நான்கு பேர் பொலிஸ் காவலில் எடுக்கப்பட்டு விசாரணைக்கு உட்படுத்தப்பட்டிருந்தனர். அவர்களில் இருவர் விடுவிக்கப்பட்டுள்ளதுடன், ஏனைய இருவருக்கு எதிராக உத்தியோகபூர்வமாகக் குற்றச்சாட்டுகள் சுமத்தப்பட்டுள்ளன.

பாதிக்கப்பட்ட பெண்ணின் உறவினரான 23 வயதுடைய சுக்ப்ரீத் சிங் (Sukhpreet Singh) மற்றும் அவரது மனைவியான 26 வயதுடைய ரமன்தீப் கவுர் (Ramandeep Kaur) ஆகிய இருவருமே இவ்வாறு கைது செய்யப்பட்டுள்ளனர். இவர்கள் இருவர் மீதும் “குழந்தையின் உடலை மறைத்தமை (Concealing the body), பொலிஸ் விசாரணைகளுக்குத் தடை ஏற்படுத்தியமை (Obstruction) மற்றும் சடலத்திற்குக் கண்ணியக்குறைவை ஏற்படுத்தியமை (Indignity to a dead body)” ஆகிய குற்றச்சாட்டுகள் சுமத்தப்பட்டுள்ளதுடன், இவர்கள் திங்கட்கிழமை நீதிமன்றத்தில் ஆஜர்படுத்தப்படவுள்ளனர்.

இவ் விவகாரம் தொடர்பான மேலதிகப் புலனாய்வு விசாரணைகள் தற்போதும் தீவிரமாக முன்னெடுக்கப்பட்டு வருவதாக ஹாலிஃபாக்ஸ் பொலிஸார் மேலும் தெரிவித்துள்ளனர்.