தமிழ்நாடு:

மிஸ்டர் கிளீன் ஆட்சியில், மெத்தபெட்டமைன் கடத்தல் நெட்வொர்க்கால் தமிழகம் அதிர்ந்துபோயிருப்பதாக முன்னாள் அமைச்சர் ஆர்.பி.உதயகுமார் தெரிவித்துள்ளார். முதலமைச்சர் விஜய் மிஸ்டர் கிளீன் ஆட்சி என்று உத்தரவாதம் தந்த நிலையில், ரூ.100 கோடி போதைப்பொருள் வழக்கில் தவெகவினர் கைது செய்யப்பட்டுள்ளதாக அவர் குற்றம் சாட்டியுள்ளார்.

ரூ.100 கோடி போதைப்பொருள் வழக்கு:

தவெக ஆட்சி, தூய ஆட்சி, மிஸ்டர் கிளீன் ஆட்சி என்றெல்லாம் உத்தரவாதம் தந்தார் முதலமைச்சர் விஜய். தற்போது இந்த 5 மாத காலத்திலேயே, ரூ.100 கோடி கிரிஸ்டல் மெத்தபெட்டமைன் போதைப்பொருள் கடத்தல் வழக்கில் தவெக செயற்குழு உறுப்பினர் பூபாலன் உள்பட 4 பேர் கைது செய்யப்பட்டிருக்கும் சம்பவம் பெரும் அதிர்வலையை ஏற்படுத்தியிருக்கிறது. பூபாலனுக்குப் பின்னால் பெரிய நெட்வொர்க் இருப்பதை மத்திய வருவாய் புலனாய்வுப் பிரிவு அதிகாரிகள் கண்டறிந்துள்ளனர். இலங்கை, நேபாளம், பாகிஸ்தான் வரை இந்த வலைப்பின்னல் பரந்து விரிந்திருப்பதை அறிந்து அன்னை தமிழகம் அதிர்ந்து போயிருக்கிறது என்று அவர் கூறியுள்ளார்.

நீதிபதி கருத்து திரிப்பு:

உச்ச நீதிமன்ற நீதிபதி சஞ்சய் குமார், முதலமைச்சர் விஜய் சிறப்பாக ஆட்சி செய்கிறார் என்று கூறியதாகத் தவெகவினர் இணையதளத்தில் பதிவுகளை வெளியிட்டு வந்தனர். தாராபுரம் பிரசாரத்தில் அமைச்சர் அருண்ராஜும் இதைக் குறிப்பிட்டுப் பேசினார். ஆனால், அமைச்சர் செங்கோட்டையனின் தேர்தல் வழக்கு விசாரணையின்போது, உங்களின் முதலமைச்சர் வேகமாகச் செயல்பட நினைக்கிறாரே, நீங்கள் ஏன் வழக்கை ஒத்திவைக்கக் கேட்கிறீர்கள் என்றுதான் சொன்னேன். அதைத் திரித்து முதலமைச்சரைப் புகழ்ந்ததாகத் தவறாகச் சித்தரித்துவிட்டீர்கள். இந்த நிலையில் இந்த வழக்கை நான் விசாரிப்பது தார்மீக ரீதியாகச் சரியாக இருக்காது என்று கூறிய நீதிபதி சஞ்சய் குமார், வழக்கை வேறு அமர்வுக்கு மாற்றப் பரிந்துரைத்து அதிலிருந்து விலகிக்கொண்டார் என்று அவர் சுட்டிக்காட்டியுள்ளார்.

பொய்யிலே கட்டமைக்கப்பட்ட அரசு:

பொய்யிலே பிறந்து, பொய்யிலே வளர்ந்து, பொய்யிலே கட்டமைக்கப்பட்ட தவெக அரசு, சமூக வலைதளங்களின் வதந்திகளை மட்டும் வைத்து அமைந்திருக்கிறது. பேரிடர் காலங்களில் ரீல்ஸை முதலீடாக வைத்து, ரியலைப் பின்னுக்குத் தள்ளிவிட்டால் மக்களுக்கு மிகப்பெரிய ஆபத்து ஏற்பட வாய்ப்பு இருக்கிறது. மழைக்காலத்திலும் இதுபோன்ற ரீல்ஸ் போட்டு உண்மையைப் பின்தள்ளிவிடுவார்களோ என்ற அச்சம் மக்களுக்கு ஏற்பட்டுள்ளது என்று ஆர்.பி.உதயகுமார் எச்சரித்துள்ளார்.

#RBUdhayakumar #AIADMK #TVK #DrugCase #TNPolitics #BmNews #TamilNews #BreakingNews #LatestNews #TamilNewsLive