சென்னை:

மக்கள் பிரச்சினைகளுக்குக் குரல் கொடுக்காமல் புத்தகக் கொள்முதல் விவகாரத்தில் மட்டும் வேகம் காட்டுவது ஏன் என்று தவெக அரசைக் கண்டித்து திமுக தலைமை கழகம் மிகக் கடுமையாகக் கேள்வி எழுப்பியுள்ளது. இது தொடர்பாக திமுக வெளியிட்டுள்ள அறிக்கை தற்போது அரசியல் களத்தில் மாபெரும் பேசுபொருளாக மாறியுள்ளது.

பொம்மை பேசுமா?:

திமுக வெளியிட்டுள்ள அந்த அறிக்கையில், “இடைத்தேர்தல் பிரசாரம் மற்றும் தேர்தல் முடிவுக்குப் பிறகு தவெக தலைவர் மற்றும் டம்மி முதலமைச்சரின் அதிகாரப்பூர்வ பக்கத்தில் இருந்து வந்திருக்கும் பதிவு அடடே இந்தப் பொம்மை பேசுமா என மாபெரும் ஆச்சரியமளிக்கிறது. விலைவாசி உயர்வு குறித்துப் பதிவு இல்லை, கொலைகள் குறித்துச் சிறிதும் கவலையில்லை, காணாமல் போன சிறுமி குறித்து விசாரிப்புகள் இல்லை, மின்வெட்டு மற்றும் மின் கட்டணம் குறித்தெல்லாம் எந்த ஒரு வாக்குறுதியும் இல்லை. அவ்வளவு ஏன் அரசின் மாபெரும் அசமஞ்சத்தால் கடலில் இறந்து மிதந்த மீனவர்கள் குறித்துக் கூட எந்தப் பதிவும் இல்லை,” என்று சரமாரியாகச் சாடியுள்ளது.

புத்தக ஊழல் விமர்சனம்:

தொடர்ந்து அந்த அறிக்கையில், “ஆனால் திமுக தலைவர் கோவை பெரியார் அறிவுலகம் சென்றதும் அவருக்குக் கிடைத்த மாபெரும் பாராட்டும் பேசு பொருளானதும், புத்தகக் கொள்முதலில் ஊழல் என்று ஓடி வந்திருக்கிறார் தவெக தலைவர். பெரியார் அறிவுலகத்தில் அகல் விளக்கு மற்றும் பீனிக்ஸ் பதிப்பகத்தின் போலியான நூல்களில் மட்டும் ஜூன் மாதம் என்று முத்திரையிடப்பட்டுள்ளது என்று அங்கிருக்கும் தோழர்கள் தெரிவிக்கிறார்கள். அந்தத் தேதி கூட டம்மி சி.எம்.யின் பிறந்தநாள்தான்,” என்று திமுக கடுமையாகக் குற்றம் சாட்டியுள்ளது.

கமிஷன் யாருக்கு?:

மேலும், “அதே பெரியார் அறிவுலகத்தில் உள்ள வால்காவிலிருந்து கங்கை வரை போன்ற புகழ்பெற்ற மற்ற பதிப்பக நூல்கள் திமுக ஆட்சியின் மார்ச் மாத முத்திரையோடு உள்ளன. அப்படியென்றால் இந்தப் போலிப் பதிப்பகப் புத்தகங்கள் எப்பொழுது வாங்கப்பட்டன? இதை வாங்க யார் முடிவு எடுத்தது? தவெக ஆட்சியில் யாருக்குக் கமிஷன் போனது?” என்று திமுக ஆவேசமாகக் கேள்வி எழுப்பியுள்ளது.

#DMK #CMVijay #BookScam #PeriyarArivulagam #BmNews #TamilNews #BreakingNews #LatestNews #TamilNewsLive