திருப்பூர்:

தாராபுரம் இடைத்தேர்தலில் போட்டியிட்ட நாம் தமிழர் கட்சி வேட்பாளர் கார்த்திகா உள்ளிட்ட 9 பேருக்கு 15 நாட்கள் நீதிமன்றக் காவல் விதிக்கப்பட்டு, அவர்கள் கோவை மத்திய சிறையில் அடைக்கப்பட்டனர்.

அனுமதி மறுக்கப்பட்ட இடத்தில் பிரசாரம்:

தாராபுரம் தொகுதியில் அக்டோபர் 6-ஆம் தேதி இடைத்தேர்தல் நடைபெற்றது. தவெக வேட்பாளர் சத்தியபாமாவை ஆதரித்து, முதலமைச்சர் விஜய் அக்டோபர் 4-ஆம் தேதி பிரசாரம் செய்ய அனுமதி பெற்றிருந்த இடத்தில், நாம் தமிழர் கட்சியினரும் அனுமதி கேட்டனர். அதை நிராகரித்த காவல்துறையினர் காமராஜபுரம் பகுதியில் அனுமதி வழங்கினர். ஆனால், அதனை மீறி முதலமைச்சர் பிரசாரம் செய்த இடத்திலேயே நாதகவினர் பிரசாரம் மற்றும் சாலை மறியலில் ஈடுபட்டதாக வழக்குப் பதிவு செய்யப்பட்டுள்ளது.

5 வழக்குகள் பதிவு:

மு.க.ஸ்டாலின் ரோடு ஷோ சென்ற பாதையில் அனுமதியின்றிப் பேனர் வைத்தது, காவல் ஆய்வாளரைப் பணி செய்ய விடாமல் தடுத்தது, தவெக தொண்டர் மீது தாக்குதல் நடத்தியது, சமூக வலைதளத்தில் முதலமைச்சர் குறித்து அவதூறாகப் பதிவிட்டது உள்ளிட்டவை தொடர்பாக மொத்தம் 5 வழக்குகள் நாதகவினர் மீது பதிவு செய்யப்பட்டுள்ளன.

9 பேருக்கு நீதிமன்றக் காவல்:

கார்த்திகா, அவரது கணவர் முருகு சந்திரகுமார், விக்னேஷ் பாண்டியன், கந்தசாமி, கோவிந்தராஜ், சஞ்சய் காந்தி, இசை மதிவாணன், சூர்யா, ஷேக் பரித் ஆகிய 9 பேரைத் தாராபுரம் போலீசார் கைது செய்து, தாராபுரம் நீதித்துறை நடுவர் நீதிமன்ற நீதிபதி உமா மகேஸ்வரி முன்பு ஆஜர்படுத்தினர். முன்னதாக இவர்களுக்குத் தாராபுரம் அரசு மருத்துவமனையில் மருத்துவப் பரிசோதனை மேற்கொள்ளப்பட்டது. 5 மணி நேரத்திற்கும் மேலாக நடைபெற்ற விசாரணையில் இருதரப்பு வாதங்களையும் கேட்ட நீதிபதி, 9 பேருக்கும் 15 நாட்கள் நீதிமன்றக் காவல் விதித்தார்.

நான் என்ன போதைப்பொருளா கடத்தினேன்?:

அப்போது செய்தியாளர்களிடம் பேசிய கார்த்திகா, நான் என்ன போதைப்பொருளா கடத்தினேன்? தேர்தலில் நின்றது ஒரு குற்றமா? என்று கேள்வி எழுப்பினார். 4 வழக்குகள் பொய்யாகப் பதிவு செய்யப்பட்டுள்ளன, கைதின்போது கார்த்திகாவின் கையை முறுக்கியதாக அவர் நீதிபதியிடம் புகார் தெரிவித்துள்ளார். இதனை முன்வைத்து ஜாமீன் கேட்க உள்ளோம் என்று நாதக வழக்கறிஞர் நன்மாறன் தெரிவித்தார். இந்த வழக்கு தொடர்பாக மேலும் 3 நாதகவினர் கைது செய்யப்பட்டுள்ளனர்.

#NTK #Karthika #Tharapuram #JudicialCustody #TNPolitics #BmNews #TamilNews #BreakingNews #LatestNews #TamilNewsLive