சென்னை
தமிழ்நாடு சட்டப்பேரவையில் எம்.எல்.ஏ-க்களுக்கு அரசு சார்பில் கார் வழங்கப்படும் என்ற முதலமைச்சர் விஜய்யின் அறிவிப்பிற்கு, எதிர்க்கட்சித் தலைவர் உதயநிதி ஸ்டாலின் மற்றும் அமைச்சர் ஆதவ் அர்ஜுனா இடையே காரசாரமான விவாதம் நடைபெற்றது.
முதலமைச்சரின் 110 விதி அறிவிப்பு:
முதன்முதலாகச் சட்டமன்ற உறுப்பினர்களாகத் தேர்வு செய்யப்பட்டவர்கள் மற்றும் பொருளாதார வசதி இல்லாத உறுப்பினர்கள் தங்களது மக்கள் பணியைத் தொய்வின்றித் தொடர, அனைத்து எம்.எல்.ஏ-க்களுக்கும் அரசு சார்பில் வாகனம் வழங்கப்படும் என 110 விதியின் கீழ் முதலமைச்சர் விஜய் அறிவித்திருந்தார். மேலும், கார் பராமரிப்பு, எரிபொருள் மற்றும் ஓட்டுநர் செலவிற்காக மாதம் ரூ.75,000 மற்றும் அலுவலக உதவியாளருக்கு ரூ.25,000 வழங்கப்படும் எனவும் அறிவிக்கப்பட்டிருந்தது.
“அரசு கார் வேண்டாம்” – உதயநிதி ஸ்டாலின் திட்டவட்டம்:
இந்த அறிவிப்பு குறித்துப் பேசிய எதிர்க்கட்சித் தலைவர் உதயநிதி ஸ்டாலின், “தமிழ்நாடு கடும் கடன் சுமையில் இருப்பதாக முதலமைச்சரே கூறியுள்ளார். எனவே, தேவையற்ற செலவுகளைக் குறைக்கும் நோக்கில் திமுகவின் 59 எம்.எல்.ஏ-க்களும் அரசு வழங்கும் காரைப் பெறுவதில்லை என முன்னாள் முதலமைச்சர் மு.க.ஸ்டாலின் அறிவுறுத்தலின் பேரில் முடிவெடுத்துள்ளோம். நாங்கள் அனைவரும் கையெழுத்திட்ட கோப்பையையும் சமர்ப்பித்துள்ளேன். பொருளாதாரத்தில் நலிவடைந்த உறுப்பினர்களுக்கு மட்டுமே கார் அளிக்க வேண்டும்,” என்று வலியுறுத்தினார்.
இதனைத் தொடர்ந்து பேசிய இந்தியக் கம்யூனிஸ்ட் கட்சி (சி.பி.ஐ) எம்.எல்.ஏ தளி ராமச்சந்திரனும் தங்கள் கட்சி உறுப்பினர்களுக்கு அரசு கார் தேவையில்லை எனத் தெரிவித்தார்.
அமைச்சர் ஆதவ் அர்ஜுனாவின் அதிரடிப் பதிலடி:
உதயநிதி ஸ்டாலினின் இந்தக் கருத்துக்குப் பதிலளித்துப் பேசிய அமைச்சர் ஆதவ் அர்ஜுனா, “அமைச்சர்களுக்குக் கார், வீடு, 4 உதவியாளர்கள் வழங்கப்படுகின்றன; ஆனால் எம்.எல்.ஏ-க்களுக்கு அப்படி இல்லை. ஒரு எம்.எல்.ஏ குறைந்தது மூன்று லட்சம் மக்களைச் சென்று சந்திக்க வேண்டிய சூழல் உள்ளதாலேயே இந்தக் கார் வழங்கப்படுகிறது. எதிர்க்கட்சித் தலைவருக்குச் சொந்தமாகவே இரண்டு மூன்று வீடுகள் இருந்தும் அவர் அரசு பங்களாவில்தான் வசிக்கிறார். ‘உங்களுக்குத்தான் சொந்த வீடு உள்ளதே, எதற்கு அரசு பங்களா?’ என்று நாங்கள் கேள்வி எழுப்ப முடியுமா?” என்று சரமாரியாகக் கேள்வி எழுப்பினார்.
#TNAssembly #UdhayanidhiStalin #MinisterAadhavArjuna #ChiefMinisterVijay #JosephVijay #TVKGovernment #DMK #MLACarScheme #TamilNaduNews #ChennaiNews #TNPolitics #ViralNewsTN #TrendingTN #LatestNewsTN #TNNewsUpdates
