சென்னை
தமிழகத்தில் நடைபெறும் அரசு நிகழ்ச்சிகளில் தமிழ்த்தாய் வாழ்த்தை இறுதியில்தான் பாட வேண்டும் எனத் தங்களது சுற்றறிக்கையில் எந்த இடத்திலும் தெரிவிக்கவில்லை என்று மத்திய அரசு சார்பில் சென்னை உயர்நீதிமன்றத்தில் அதிகாரப்பூர்வமாக விளக்கம் அளிக்கப்பட்டுள்ளது.
பொதுநல வழக்கும் அதன் பின்னணியும்:
தமிழகத்தில் நடைபெறும் அனைத்து அரசு நிகழ்ச்சிகளிலும் முதலில் தமிழ்த்தாய் வாழ்த்து பாடி நிகழ்ச்சியைத் தொடங்கும் நடைமுறையை உறுதி செய்யக் கோரி, சென்னையைச் சேர்ந்த அனன்யா ராதாகிருஷ்ணன் என்பவர் சென்னை உயர்நீதிமன்றத்தில் ஒரு பொதுநல வழக்கைத் தாக்கல் செய்திருந்தார். அந்த மனுவில், “தமிழ்நாட்டில் அரசு நிகழ்ச்சிகள் தமிழ்த்தாய் வாழ்த்தைப் பாடியே தொடங்கப்படுவதும், நிகழ்ச்சி முடிவில் தேசிய கீதம் பாடி நிறைவு செய்வதும் பல ஆண்டுகளாகத் தமிழகத்தில் மரபாகப் பின்பற்றப்பட்டு வருகிறது. ஆனால், இந்த மரபான நடைமுறையை நீர்த்துப் போகச் செய்யும் வகையில், சமீபகாலமாக அரசு நிகழ்ச்சிகளில் வந்தே மாதரமும், தேசிய கீதமும் பாடப்பட்ட பிறகே மூன்றாவதாகத் தமிழ்த்தாய் வாழ்த்து பாடப்படுகிறது” என வேதனை தெரிவித்திருந்தார்.
“தேசிய கீதத்திற்கு எதிரான வழக்கல்ல!”
மேலும் அந்த மனுவில், “அரசு நிகழ்ச்சியை ‘வந்தே மாதரம்’ பாடியே தொடங்க வேண்டும் என மத்திய உள்துறை அமைச்சகம் கடந்த 2026 ஜனவரி 28-ஆம் தேதி பிறப்பித்த சுற்றறிக்கையில், மாநிலப் பாடலைப் பாடி அரசு நிகழ்ச்சியைத் தொடங்க எந்தவொரு தடையையும் விதிக்கவில்லை. தமிழ்த்தாய் வாழ்த்து பாடுவது என்பது வெறும் சடங்கு அல்ல; அது தமிழர்களின் உணர்வு, கலாச்சாரம் மற்றும் ஒட்டுமொத்த அடையாளமாக உள்ளது. பல தலைமுறைகளாக அரசு நிகழ்ச்சிகள் தமிழ்த்தாய் வாழ்த்து பாடியே துவங்கப்பட்டுள்ளன. வந்தே மாதரத்துக்கு எதிராகவோ, தேசிய கீதத்துக்கு எதிராகவோ நான் இந்த வழக்கை தொடரவில்லை. மாறாக, அரசு நிகழ்ச்சிகளில் கலாச்சார மோதலைத் தவிர்க்கும் வகையில், தமிழ்த்தாய் வாழ்த்தை முதலில் பாடுவதற்குத் தகுந்த நிர்வாக அறிவுறுத்தல்களைப் பிறப்பிக்க அரசுக்கு உத்தரவிட வேண்டும்” எனக் குறிப்பிட்டிருந்தார்.
நீதிமன்றத்தில் மத்திய அரசின் அதிரடி விளக்கம்:
இந்த வழக்கை அண்மையில் விசாரித்த தலைமை நீதிபதி எஸ்.ஏ தர்மாதிகாரி மற்றும் நீதிபதி ஜி.அருள்முருகன் ஆகியோர் அடங்கிய அமர்வு, இது குறித்து மத்திய அரசு பதிலளிக்க உத்தரவிட்டிருந்தனர். இந்நிலையில், இந்த வழக்கு இன்று (ஆகஸ்ட் 10) மீண்டும் விசாரணைக்கு வந்தது.
அப்போது, மத்திய அரசு சார்பில் ஆஜரான மூத்த வழக்கறிஞர் ஏ.ஆர்.எல்.சுந்தரேசன் வாதிடுகையில், “மத்திய அரசு வெளியிட்ட அறிக்கையில், தேசியப் பாடலும், தேசிய கீதமும் எங்கு பாடப்பட வேண்டும், எந்தெந்த நிகழ்ச்சிகளில் ஒன்றாக இணைந்து பாட வேண்டும், மாநில அரசின் பாடல் எப்போது பாடப்பட வேண்டும் என்பது குறித்து மிகத் தெளிவாகக் கூறப்பட்டுள்ளது. மத்திய அரசின் அறிவிப்பாணையில் முதலில் வந்தே மாதரமும், அதனைத் தொடர்ந்து தேசிய கீதமும் பாடப்பட வேண்டும் என்றே கூறப்பட்டுள்ளது. அதே சமயம், தமிழ்த்தாய் வாழ்த்தை நிகழ்ச்சிகளின் இறுதியில்தான் பாட வேண்டும் எனச் சுற்றறிக்கையில் எந்த இடத்திலும் மத்திய அரசு தெரிவிக்கவில்லை,” எனத் திட்டவட்டமாகத் தெரிவித்தார்.
இருதரப்பு வாதங்களையும் தீவிரமாகக் கேட்டறிந்த நீதிபதிகள், இந்த வழக்கின் அடுத்தகட்ட விசாரணையை வரும் வாரத்திற்கு ஒத்திவைத்தனர்.
#TamilThaiVaazhthu #MadrasHighCourt #CentralGovernment #VandeMataram #NationalAnthem #TamilNaduNews #Chennai #TNPolitics #ViralNewsTN #TrendingTN #LatestNewsTN #TamilCulture #TNNewsUpdates
