சென்னை
அரசு நிகழ்ச்சிகளில் தமிழ்த்தாய் வாழ்த்து பாடுவது தொடர்பாகத் தமிழ்நாடு சட்டப்பேரவையில் இன்று கொண்டுவரப்பட்ட தனித்தீர்மானம் மட்டும் போதாது என்றும், அதற்கு முறையான சட்ட அங்கீகாரம் வழங்கப்பட வேண்டும் என்றும் திமுக முன்னாள் அமைச்சர் ரகுபதி திட்டவட்டமாகத் தெரிவித்துள்ளார்.
சட்ட அங்கீகாரம் எங்கே? – ரகுபதியின் அதிரடி கேள்வி:
அரசு நிகழ்ச்சிகளில் தமிழ்த்தாய் வாழ்த்து கட்டாயம் முதலில் பாடப்பட வேண்டும் என்ற தனித்தீர்மானத்தை முதலமைச்சர் விஜய் இன்று தமிழக சட்டப்பேரவையில் கொண்டுவந்தார். இத்தீர்மானம் திமுக, அதிமுக உள்ளிட்ட அனைத்துச் சட்டமன்ற உறுப்பினர்களின் ஆதரவுடன் ஏகமனதாக நிறைவேற்றப்பட்டது. இந்நிலையில், இது தொடர்பாகத் தலைமைச் செயலகத்தில் முன்னாள் சட்டத்துறை அமைச்சர் ரகுபதி செய்தியாளர்களைச் சந்தித்துப் பேசினார்.
அப்போது அவர் கூறுகையில், “முதலமைச்சர் இன்று அவையில் கொண்டு வந்த இந்தத் தீர்மானம், ஆளுநரையோ அல்லது மற்றவர்களையோ கட்டுப்படுத்துமா என்பது மிகப்பெரிய சந்தேகம். இதற்கு முறையான ஒரு சட்ட அங்கீகாரம் மிக மிகத் தேவை. அந்தச் சட்ட அங்கீகாரத்தைப் பெற இந்த அரசு முயற்சிக்கிறதா? என்பதும் சந்தேகமாகவே உள்ளது. மத்திய அரசை ‘ஒன்றிய அரசு’ என்று சொல்லவே பயப்படும் இந்த அரசு, இதற்கான சட்ட மசோதாவைக் கொண்டு வருமா? என்பது கேள்விக்குறியாகவே உள்ளது,” என்று கடுமையாக விமர்சித்தார்.
சட்ட வடிவம் தரப்படாவிட்டால் அவையில் குரல் எழுப்புவோம்:
தொடர்ந்து பேசிய அவர், “இந்தத் தீர்மானத்திற்கான சட்ட வடிவத்தை இந்தக் கூட்டத்தொடரிலேயே தமிழக அரசு உடனடியாகக் கொடுக்க முன்வர வேண்டும். இல்லையென்றால், மீண்டும் தமிழ்த்தாய் வாழ்த்தை 3-வது இடத்திற்கே கொண்டு போய் விடுவார்கள். எங்களைப் பொறுத்தவரை இதற்கான உறுதியான சட்ட வடிவம் தேவை; இதைத்தான் நாங்கள் பேரவையிலும் வலியுறுத்திச் சொல்லியிருக்கிறோம்.
இதற்குத் தமிழக அரசு தகுந்த நடவடிக்கை எடுக்கப் போகிறதா? இல்லையா? என்பதைப் பொறுத்திருந்து பார்க்க வேண்டும். ஒருவேளை நடவடிக்கை எடுக்கவில்லை என்றால், தமிழ் வளர்ச்சித் துறை மானியக் கோரிக்கையின் போதாவது இதற்கான அதிகாரப்பூர்வ அறிவிப்பு வரும் என்று எதிர்பார்க்கிறோம். அப்படியும் அறிவிப்பு வரவில்லை என்றால், அன்றைய தினத்தில் எங்களது சட்டமன்ற உறுப்பினர்கள் இதுகுறித்து அவையில் தீவிரமாகப் பேசுவார்கள்” என்று ரகுபதி எச்சரிக்கை விடுத்தார்.
#TamilThaiVaazhthu #SReghupathy #DMK #ChiefMinisterVijay #TVKGovernment #ThalapathyVijay #TNAssembly #TamilNaduNews #TNPolitics #Chennai #ViralNewsTN #TrendingTN #LatestNewsTN #TNNewsUpdates
