சென்னை:

டெல்லி சென்ற தமிழக விவசாயிகளை நாக்பூரிலேயே தடுத்து நிறுத்தியது யார் என்று தமிழக வாழ்வுரிமைக் கட்சித் தலைவர் வேல்முருகன் ஆவேசமாகக் கேள்வி எழுப்பியுள்ளார். இது தொடர்பாக அவர் வெளியிட்டுள்ள எக்ஸ் தளப் பதிவில், தமிழக உரிமைகள் மீது தாக்குதல் நடந்தும் தமிழக அரசு அமைதியாக இருப்பது ஏன் என்று சரமாரியாகக் கேள்வி எழுப்பியுள்ளார். டெல்லியில் காவிரி உரிமை உள்ளிட்ட தமிழ்நாட்டு விவசாயிகளின் கோரிக்கைகளை வலியுறுத்தி அமைதியான முறையில் போராடச் சென்ற விவசாயிகளை, மகாராஷ்டிர மாநிலத்தின் நாக்பூரில் அம்மாநிலக் காவல்துறையினர் ரயிலிலிருந்து கட்டாயமாக இறக்கித் திருப்பி அனுப்பியிருப்பது மிகக் கடுமையாகக் கண்டிக்கத்தக்கது என்றும், இது ஒரு ஜனநாயக விரோதச் செயல் என்றும் அவர் சாடியுள்ளார்.

இந்திய அரசியலமைப்பு ஒவ்வொரு குடிமகனுக்கும் வழங்கியுள்ள அடிப்படை உரிமையைப் பறிக்கும் வகையில் தமிழக விவசாயிகள் தடுத்து நிறுத்தப்பட்டிருப்பது, விவசாயிகளின் உரிமைகள் மீது மட்டுமல்ல, தமிழ்நாட்டின் உரிமைகள் மீதும் நடத்தப்பட்ட மாபெரும் தாக்குதலாகும் என்று அவர் வேதனை தெரிவித்துள்ளார். தமிழக விவசாயிகள் குற்றவாளிகள் அல்ல என்றும், தங்களது வாழ்வாதாரத்தையும், காவிரி உரிமையையும் காக்க ஜனநாயக வழியில் போராடச் சென்ற அவர்களை வழிமறித்துச் சொந்த மாநிலத்திற்கே திருப்பி அனுப்பியிருப்பது கூட்டாட்சித் தத்துவத்திற்கும் எதிரான செயல் என விமர்சித்துள்ளார்.

இந்த விவகாரத்தைத் தமிழக அரசு சாதாரண நிகழ்வாகக் கருதி வேடிக்கை பார்க்கக் கூடாது என்றும், உடனடியாக மகாராஷ்டிர அரசிடம் கடும் கண்டனத்தைப் பதிவு செய்ய வேண்டும் என்றும் வேல்முருகன் வலியுறுத்தியுள்ளார். மேலும், மத்திய அரசின் கவனத்திற்கு இந்த அநீதியைக் கொண்டு சென்று, இனி இதுபோன்ற சம்பவங்கள் நடைபெறாத வகையில் உரிய நடவடிக்கைகளை மேற்கொள்ள வேண்டும் எனக் கோரிக்கை விடுத்துள்ளார். விவசாயிகளின் உரிமையைப் பாதுகாப்பதிலும், தமிழ்நாட்டின் உரிமையை நிலைநாட்டுவதிலும் தமிழக அரசு உடனடியாக உறுதியான நடவடிக்கைகளை எடுக்க வேண்டும் என்று அவர் ஆணித்தரமாகக் கேட்டுக்கொண்டுள்ளார்.

#Velmurugan #TNFarmers #NagpurIncident #CauveryIssue #TamilNaduGovt #DelhiProtest #BmNews #TamilNews #BreakingNewsTN #TamilagaVazhvurimaiKatchi #PoliticalUpdate #TamilNewsLive