சின்மயா மிஷனின் 75-ஆவது ஆண்டு விழாவை முன்னிட்டு முன்னெடுக்கப்படும் “சின்மயா அமிர்த யாத்திரை” யாழ்ப்பாணத்தை வந்தடைந்தது. சின்மயா மிஷனின் இளைஞர் அமைப்பான ‘யுகேந்த்ரா’ (Yugendra) ஊடாக இந்த விசேட செயற்றிட்டம் முன்னெடுக்கப்படுகிறது.
கடந்த 2025-ஆம் ஆண்டு டிசம்பர் மாதம் ஆரம்பிக்கப்பட்ட இந்த பயணம், சுமார் 35,000 கிலோமீட்டர் தூரத்தைக் கொண்டது. நேபாளம் மற்றும் இலங்கை ஆகிய நாடுகளினூடாக பயணிக்கும் இந்த யாத்திரை, எதிர்வரும் அக்டோபர் மாதம் புதுடெல்லியில் நிறைவடையவுள்ளது.
இந்த யாத்திரை தொடர்பான ஊடகவியலாளர் சந்திப்பு வியாழக்கிழமை (30) யாழ்ப்பாணத்தில் நடைபெற்றது. இதில் சென்னை சின்மயா மிஷன் பொறுப்பாளர் சுவாமி மித்ரானந்தா, கொழும்பு சின்மயா மிஷன் பொறுப்பாளர் சுவாமி குணாதித்தானந்தா மற்றும் சுவாமி அனுகூலானந்தா ஆகியோர் கலந்துகொண்டனர்.
ஊடக சந்திப்பில் கருத்துத் தெரிவித்த சுவாமிகள், பின்வரும் விடயங்களைக் குறிப்பிட்டனர்:
இளைஞர் வலுவூட்டல்: சுமார் 10 இலட்சம் இளைஞர்களைச் சந்தித்து, அவர்களின் திறமைகளை ஊக்குவித்து, அவர்கள் ஒரு சிறந்த அர்த்தமுள்ள வாழ்க்கையை வாழ்வதற்கு வழிகாட்டுவதே இந்த அமிர்த யாத்திரையின் முக்கிய நோக்கமாகும்.
சுவாமி சின்மயானந்தரின் போதனைகள்: சுவாமி சின்மயானந்தரின் வாழ்க்கை வரலாறு, அவர் பயன்படுத்திய பொருட்கள் அடங்கிய கண்காட்சி மற்றும் அவரது தூண்டுதல் அளிக்கக்கூடிய பணிகளை மக்களிடம் கொண்டு சேர்ப்பதற்காக இந்த யாத்திரை ஆரம்பிக்கப்பட்டது. தற்போது யாத்திரையின் 120 நாட்கள் நிறைவடைந்துள்ளன.
யாழ். பல்கலைக்கழக விஜயம்: இதன் ஒரு கட்டமாக யாழ்ப்பாணப் பல்கலைக்கழகத்திற்குச் சென்று மாணவர்களுடன் கலந்துரையாடல்கள் முன்னெடுக்கப்பட்டன.
இந்த யாத்திரையில் சேவைப்பணிகளுக்காக மூன்று வாகனங்கள் பயன்படுத்தப்படுகின்றன. இதில் ஒரு வாகனத்தை ஆரம்பம் முதல் இறுதி வரை (35,000 கி.மீ) பெண்களே முழுமையாகச் செலுத்தி வருகின்றனர். பெண்களின் வலிமையையும் சக்தியையும் உலகுக்கு வெளிக்காட்டும் விதமாகவும், அவர்களை ஊக்கப்படுத்தும் விதமாகவும் இந்த முயற்சி அமைந்துள்ளதாக அவர்கள் தெரிவித்தனர்.
