கனடாவில் ஏற்கனவே வசித்து வரும் தகுதியுடைய 2,00,000 தற்காலிக வசிப்பவர்களுக்கு (temporary residents) 2027 ஆம் ஆண்டின் இறுதிக்குள் நிரந்தர குடியுரிமை (Permanent Residency) வழங்குவதற்கான திட்டங்களை கனடா அரசு அறிவித்துள்ளது. நாட்டில் நிலவும் தொழிலாளர் பற்றாக்குறையை நிவர்த்தி செய்யவும், நிலுவையிலுள்ள குடிவரவு விண்ணப்பங்களை விரைவுபடுத்தவும் இந்த நடவடிக்கை எடுக்கப்பட்டுள்ளது.

கனடாவின் 2026 கூட்டாட்சி வரவு-செலவுத் திட்டம் மற்றும் 2027-2029 குடிவரவு அளவுகளுக்கான திட்டத்தில் (Immigration Levels Plan) சுட்டிக்காட்டப்பட்டுள்ள இந்த நடவடிக்கை, தகுதியுடைய நபர்கள் தற்காலிக நிலையிலிருந்து நிரந்தர குடியுரிமை நிலைக்கு மாறுவதற்கு மேலதிக வாய்ப்புகளை வழங்கும்.

கனடிய குடிவரவு, அகதிகள் மற்றும் குடியுரிமை அமைப்பின் (IRCC) கூற்றுப்படி, இந்த முயற்சி முக்கியமாக இரண்டு பிரிவுகளை உள்ளடக்கும்:

1. தொழிலாளர்கள் பிரிவு (Workers Category): கனடாவில் ஏற்கனவே வசித்து வரும் சுமார் 100,000 தொழிலாளர்கள் மற்றும் அவர்தம் குடும்பத்தினர் தேர்ந்தெடுக்கப்பட்ட குடிவரவு வழிகள் மூலம் நிரந்தர குடியுரிமைக்கு பரிசீலிக்கப்படுவர். ‘மாகாண நியமனத் திட்டம்’ (Provincial Nominee Program) உட்பட பிராந்திய தொழிலாளர் சந்தை தேவைகளுக்கு பங்களிக்கக்கூடிய தகுதியான தொழிலாளர்களை அடையாளம் காண அரசாங்கம் மாகாணங்கள் மற்றும் பிராந்தியங்களுடன் இணைந்து செயல்படும். அட்லாண்டிக் குடிவரவுத் திட்டம், ஸ்டார்ட்-அப் விசா திட்டம், விவசாய-உணவு முன்னோடித் திட்டம் மற்றும் வீட்டுப் பராமரிப்புத் தொழிலாளர் திட்டங்கள் மூலம் ஏற்கனவே விண்ணப்பித்துள்ள குறிப்பிட்ட விண்ணப்பதாரர்களும் இதன் மூலம் பயன்பெறலாம்.

2. மனிதநேய மற்றும் குடும்ப மறுஇணைவு பிரிவு (Humanitarian & Family Category): மீதமுள்ள 100,000 இடங்கள் மனிதநேய அடிப்படையிலான மற்றும் குடும்ப தொடர்பான வழக்குகளுக்கு ஒதுக்கப்படும். பல ஆண்டுகளாக நிரந்தர குடியுரிமை முடிவுகளுக்காக காத்திருக்கும் நபர்கள் இதில் அடங்குவர். மனிதநேய மற்றும் கருணை அடிப்படையில் தகுதிபெறும் விண்ணப்பதாரர்கள், உக்ரைன் மற்றும் ஹாங்காங் குடிவரவு திட்டங்களின் கீழ் உள்ள குறிப்பிட்ட நபர்கள் மற்றும் குடும்ப மறுஇணைவுப் பிரிவுகளின் கீழ் விண்ணப்பித்தவர்கள் இதில் சேருவர்.

நாட்டில் உள்ள பல்வேறு சமூகங்களில் ஏற்கனவே தங்களை நிலைநிறுத்திக் கொண்டவர்களைத் தொடர்ந்து தக்கவைத்துக்கொள்வதையும், பயன்பாட்டில் உள்ள விண்ணப்பங்களின் நிலுவைகளைக் குறைப்பதையும் நோக்கமாகக் கொண்டு இத்திட்டம் கொண்டுவரப்பட்டுள்ளதாகக் கனடா அரசு தெரிவித்துள்ளது.

இதற்கிடையில், 2027 முதல் 2029 வரையிலான ஒவ்வொரு ஆண்டிற்கும் 380,000 நிரந்தர வசிப்பாளர்கள் மற்றும் 370,000 புதிய தற்காலிக வசிப்பாளர்களை அனுமதிப்பதை கனடா வருடாந்திர இலக்காக நிர்ணயித்துள்ளது. இந்த புதிய நிரந்தர குடியுரிமை முயற்சியானது வழக்கமான வருடாந்திர இலக்குகளுக்கு அப்பால் கூடுதல் சேர்க்கை திறனை வழங்கும்.

இருப்பினும், இந்த அறிவிப்பானது அனைத்து தற்காலிக வசிப்பவர்களுக்கும் தானாகவே நிரந்தர குடியுரிமை கிடைக்கும் என்பதைக் குறிக்காது. விண்ணப்பதாரர்கள் சம்பந்தப்பட்ட குடிவரவுத் திட்டங்களின் தகுதித் தேவைகளைப் பூர்த்தி செய்ய வேண்டும்.

இந்த முயற்சியை நடைமுறைப்படுத்துவதற்காக நான்கு ஆண்டுகளில் 302.3 மில்லியன் கனேடிய டொலர்களை ஒதுக்க கனடா அரசு முன்மொழிந்துள்ளது.