இந்த மாத தொடக்கத்தில் கடமையின் போது சுட்டுக் கொல்லப்பட்ட, அவசரப் பணிப் படையின் (ETF) 43 வயதுடைய உறுப்பினர் கான்ஸ்டபிள் மார்க் பினிசோட்டோவின் (Const. Marc Pinizzotto) இறுதிச் சடங்குகள் இன்று நடைபெறுகின்றன.

ஆயிரக்கணக்கான டொராண்டோ போலீஸ் அதிகாரிகள், அவசர சேவைப் பணியாளர்கள், முக்கிய பிரமுகர்கள் மற்றும் பினிசோட்டோவின் குடும்ப உறுப்பினர்கள் எடிபோகிக்கில் (Etobicoke) உள்ள டொராண்டோ காங்கிரஸ் மையத்தில் மதியம் 1 மணிக்கு நடைபெறும் இந்த இறுதி வழிபாட்டு நிகழ்வில் கலந்துகொள்வார்கள் என எதிர்பார்க்கப்படுகிறது.

டொராண்டோ போலீஸ் சேவையில் 18 ஆண்டுகள் அனுபவம் வாய்ந்த அதிகாரியான பினிசோட்டோ, கடந்த ஜூன் 11 ஆம் தேதி நோர்த் யார்க் (North York) பகுதியில் சோதனை வாரண்டுகளை நிறைவேற்றும் பணியில் ஈடுபட்டிருந்தபோது சுட்டுக் கொல்லப்பட்டார். கடந்த மார்ச் மாதம் அமெரிக்க தூதரகத்தில் நடந்த துப்பாக்கிச் சூட்டுடன் தொடர்புடைய ஒரு வாரண்டும் இதில் உள்ளடங்கும்.

இத்துப்பாக்கிச் சூட்டுச் சம்பவத்தில் காயமடைந்த 19 வயதுடைய நிக்கோலஸ் பென்னட் (Nicholas Bennett) என்ற சந்தேக நபர் மருத்துவமனையில் சிகிச்சை பெற்று வருவதுடன், அவர் மீது முதலாம் நிலை கொலைக் குற்றம் (First-degree murder) சுமத்தப்பட்டுள்ளது.

ETF இன் 64 ஆண்டுகால வரலாற்றில் அதன் உறுப்பினர் ஒருவர் கடமையின் போது கொல்லப்படுவது இதுவே முதல் முறையாகும். இந்த இறுதிச் சடங்கு நிகழ்வு பொதுமக்களுக்கு மூடப்பட்டிருந்தாலும், சிடிவி நியூஸ் (CTV News) மற்றும் சிபி24 (CP24) ஆகியவை இந்த ஊர்வலத்தை நேரடி ஒளிபரப்பு செய்து வருகின்றன.

நேரடித் தகவல்களின் சுருக்கம் (Timeline of Events):

• முற்பகல் 10:00 – இறுதி ஊர்வலம் ஆரம்பம்: பினிசோட்டோவின் உடல் வைக்கப்பட்டுள்ள பிரேதம் தாங்கி வாகனம் (Hearse) தோர்ன்ஹில்லில் (Thornhill) உள்ள மலர்ச்சாாலையிலிருந்து புறப்பட்டு எடிபோகிக் நோக்கிச் செல்கிறது. இதன்காரணமாக பல வீதிகள் மூடப்பட்டுள்ளன. பொதுமக்கள் இப் பெரணியை நெடுஞ்சாலை 407 (Highway 407) மேம்பாலங்களில் இருந்து பார்வையிடலாம்.

• முற்பகல் 09:45 – ஆயிரக்கணக்கான அதிகாரிகள் அணிவகுப்பு: டொராண்டோ போலீசார் தெரிவிக்கையில், ஆயிரக்கணக்கான அதிகாரிகள் மார்ட்டின் குரோவ் வீதி வழியாக இறுதிச் சடங்கு நடைபெறும் இடத்தை நோக்கி அணிவகுத்துச் சென்று, அஞ்சலி செலுத்துவார்கள் எனத் தெரிவித்துள்ளனர்.

• முற்பகல் 09:30 – டொராண்டோ போலீஸ் நன்றி அறிவிப்பு: பினிசோட்டோவின் மறைவுக்குப் பொதுமக்கள் வழங்கிய ஆதரவிற்கும் இரங்கல்களுக்கும் டொராண்டோ போலீஸ் சேவை தங்களது ‘X’ சமூக ஊடகப் பக்கத்தில் நன்றி தெரிவிப்பதுடன், இந்நிகழ்வு நேரடி ஒளிபரப்பு செய்யப்படும் என்றும் குறிப்பிட்டுள்ளது.

• முற்பகல் 08:30 – பினிசோட்டோ குடும்பப் படங்கள் பகிர்வு: பினிசோட்டோவின் மனைவி ஆண்ட்ரியா (Andrea) மற்றும் அவர்களின் 14 வயதுடைய இரட்டைப் பிள்ளைகளான டேனியலா மற்றும் டொமினிக் ஆகியோருடன் பினிசோட்டோ இருக்கும் புகைப்படங்களை அவரது குடும்பத்தினர் ஊடகங்களுடன் பகிர்ந்துள்ளனர்.

• 

• முற்பகல் 08:00 – வீதிகள் மூடல்: இறுதி ஊர்வலத்தை முன்னிட்டு மார்ட்டின் குரோவ் வீதி (Martin Grove Road), பெல்ஃபீல்ட் வீதி (Belfield Road) உள்ளிட்ட பல முக்கிய போக்குவரத்து வீதிகள் மற்றும் நெடுஞ்சாலை சரிவுகள் (Ramps) தற்காலிகமாக மூடப்பட்டுள்ளன. மதியம் 1 மணிக்கு இறுதிச் சடங்கு தொடங்கியதும் இக்கட்டுப்பாடுகள் தளர்த்தப்படும்.