ராமநாதபுரம் / தூத்துக்குடி
இந்த ஆண்டு பருவநிலையில் ஏற்பட்ட திடீர் மாற்றம் மற்றும் ‘எல்நினோ’ பாதிப்புகள் காரணமாகத் தமிழகத்தில் தென்மாவட்டங்களில் கருப்பட்டி உற்பத்தி கடுமையாகப் பாதிக்கப்பட்டு, அதன் விலை வரலாறு காணாத அளவில் உயர்ந்துள்ளது.
பருவமழை பொய்த்ததால் உற்பத்தி கடும் பாதிப்பு:
தமிழகத்தில் தென்மாவட்டங்களான ராமநாதபுரம், தூத்துக்குடி, நெல்லை, தென்காசி ஆகிய பகுதிகளில் பனைத்தொழில் பிரதானமாக நடைபெற்று வருகிறது. குறிப்பாகத் தமிழகத்திலேயே அதிக பனைமரங்களைக் கொண்ட மாவட்டமாக ராமநாதபுரம் விளங்குகிறது. அங்குள்ள சாயல்குடி, நரிப்பையூர், மாரியூர், கன்னிராஜபுரம் உள்ளிட்ட கிராமங்களில் ஆயிரக்கணக்கான பனைத் தொழிலாளர்கள் வாழ்ந்து வருகின்றனர். வழக்கமாக ஜனவரி, பிப்ரவரி மாதங்களில் தொடங்கும் பதநீர் சீசன் மூலம் பதநீரைக் காய்ச்சி கருப்பட்டி தயாரிக்கப்பட்டு விற்பனை செய்யப்படுகிறது. ஆனால், கடந்த ஆண்டு பருவமழை பொய்த்ததாலும், கோடையிலும் மழை பெய்யாததாலும் இந்த ஆண்டு பதநீர் வரத்து எதிர்பார்த்த அளவில் கிடைக்கவில்லை. இதனால் கருப்பட்டி தயாரிப்பு கணிசமாகக் குறைந்துள்ளது.
ராமநாதபுரம் vs உடன்குடி கருப்பட்டி:
ராமநாதபுரம் மாவட்டத்தில் தயார் செய்யப்படும் கருப்பட்டிகள் அளவில் பெரிதாக இருக்கும். அதே சமயம் தூத்துக்குடி மாவட்டம் உடன்குடி பகுதியில் தயாரிக்கப்படும் கருப்பட்டி அளவில் சிறியதாகவும், சுவை மற்றும் விலையில் தனிச்சிறப்பு மிக்கதாகவும் இருக்கும். இதுதவிர பனங்கற்கண்டு, பனஞ்சுக்கு, சில்லுக்கருப்பட்டி உள்ளிட்டவற்றையும் பனைத் தொழிலாளர்கள் தயார் செய்து விற்பனை செய்து வருகின்றனர்.
சந்தையில் எகிறிய கருப்பட்டி விலை நிலவரம்:
உற்பத்தி குறைவு காரணமாகக் கடந்த மாதம் சாயல்குடி பகுதியில் ஒரு கிலோ ரூ.350-க்கு விற்பனை செய்யப்பட்ட கருப்பட்டி, தற்போது ரூ.400 வரை உயர்ந்துள்ளது. உடன்குடி ரகப் பழைய கருப்பட்டி ஒரு கிலோ ரூ.600-க்கும், புதிய கருப்பட்டி ரூ.500-க்கும் விற்பனை செய்யப்படுகிறது. மேலும், பனங்கற்கண்டு ஒரு கிலோ ரூ.800-க்கும், சில்லுக்கருப்பட்டி ஒரு கிலோ ரூ.600-க்கும் விற்பனையாகி வருகிறது.
இன்னும் சில நாட்களில் இந்த ஆண்டுக்கான பதநீர் சீசன் முழுமையாக முடிவடைய உள்ளதால், வரும் குளிர்காலம் மற்றும் பருவமழைக் காலத்தில் கருப்பட்டி விலை மேலும் உயர வாய்ப்புள்ளதாக வியாபாரிகள் வேதனையுடன் தெரிவித்துள்ளனர்.
#ElNino #KarupattiPrice #UdangudiKarupatti #Ramanathapuram #PalmJaggery #TamilNaduNews #TNNews #PriceHike #ViralNewsTN #TrendingTN #TNNewsUpdates
