சென்னை:

உலகிலேயே செயற்கை நுண்ணறிவு தொழில்நுட்பத்தைப் பயன்படுத்தி முதன்முதலில் ஊழல் செய்து திமுக மாபெரும் உலக சாதனை படைத்துள்ளதாகப் பொதுப்பணி மற்றும் விளையாட்டு மேம்பாட்டுத்துறை அமைச்சர் ஆதவ் அர்ஜுனா மிகக் கடுமையாகக் குற்றம் சாட்டியுள்ளார்.

உலக சாதனை ஊழல்:

இது குறித்து அவர் தனது பதிவில், “பகுத்தறிவு, சுயமரியாதை மற்றும் சமூகநீதியைத் தமிழ்நாட்டிற்குக் கற்பித்தவர் பெரியார். அவர் வழியில் வந்த பேரறிஞர் அண்ணா, மாநில சுயாட்சி என்ற கொள்கையோடு சிறப்பான ஆட்சியை ஏற்று நடத்தினார். ஆனால், அவர்கள் வழியில் வந்ததாகச் சொல்லிக்கொண்டு, அவர்கள் பெயரைத் தன் ஆட்சிக்கு முகமூடியாகப் போட்டுக்கொண்டு, முன்னாள் முதலமைச்சர் மு.க.ஸ்டாலின் ஒவ்வொரு துறையிலும் செய்ததெல்லாம் ஊழல் மட்டும்தான். பெரியாரின் பெயரில் அமைந்த நூலகத்திற்கு வாங்கிய புத்தகங்களிலும் ஏ.ஐ முறையில் ஊழல் செய்து உலக ஊழல் சாதனையைப் படைத்து நம்மையே திகைக்க வைத்துள்ளார். மக்களின் வரிப்பணம் கொள்ளையடிக்கப்பட்டுள்ளது என்பது மட்டுமே இங்குப் பிரச்சினை இல்லை. மாறாக முந்தைய தலைமுறையின் அறிவுஜீவிகளை ஏமாற்றி, இன்றைய தலைமுறையின் அறிவுஜீவிகளின் மூளையை மழுங்கடித்து, நாளைய தலைமுறை அறிவுஜீவிகளின் எதிர்காலத்தைச் சூனியத்தில் தள்ளும் படுபாதகத்தைச் செய்துள்ளது முந்தைய திமுக அரசு,” என்று சாடியுள்ளார்.

ஸ்டாலின் எங்கே?:

தொடர்ந்து அவர், “ஒரு நாளைக்கு மூன்று அறிக்கைகளை வெளியிட்டுத் தவெக அரசை விமர்சித்து வந்த மு.க.ஸ்டாலின், இந்தப் பிரச்சினை வெளியானது முதல் எங்குப் பதுங்கி இருக்கிறார் என்பதே தெரியாமல் பம்மிக் கொண்டிருக்கிறார். இப்போது வெளியிட வேண்டியதுதானே ஒரு அறிக்கையை? இன்னும் ஏன் அவரிடமிருந்து எந்த அறிக்கையும் வெளிவரவில்லை? கலைஞர் நூற்றாண்டு நூலகத்திலும், தமிழ்நாட்டில் உள்ள எத்தனை நூலகங்களில் இதுபோன்ற ஊழல் புத்தகங்கள் புதைந்து கிடக்கிறதோ, அவையெல்லாம் உடனடியாகப் போர்க்கால அடிப்படையில் களையெடுக்கப்பட வேண்டும். பல நூறு கோடி ரூபாய் செலவில் கட்டப்பட்ட பெரியார் அறிவுலகக் கட்டுமானத்தில் எவ்வளவு ஊழல் நடைபெற்றிருக்கும் என்பது பற்றியும் பொதுப்பணித்துறை வல்லுநர்களைக் கொண்டு ஆராய்ந்து உண்மைகள் விரைவில் வெளிக்கொண்டுவரப்படும்,” என்று அவர் தெரிவித்துள்ளார்.

தண்டனை நிச்சயம்:

மேலும், “கழிப்பறையிலிருந்து கல்லறை வரை, சாக்கடையிலிருந்து மழைநீர் வடிகால்வாய் வரை, குப்பையிலிருந்து புத்தகங்கள் வரை என அத்தனையிலும் ஊழல் செய்த மு.க.ஸ்டாலின் மற்றும் அவருடைய திருட்டுக் கூட்டாளிகள் மக்கள் மன்றத்தில் தினம்தோறும் அவமானப்பட்டு வருகிறார்கள். விரைவில் அவர்கள் சட்டத்தின் பிடியில் அகப்படுவார்கள், நீதிமன்றத்தில் நிச்சயம் தண்டிக்கப்படுவார்கள். தந்தை பெரியார், பேரறிஞர் அண்ணா போன்ற தலைவர்கள் சமூகநீதிக் கருத்துக்களைப் புத்தகங்கள் மூலமே விதைத்தனர். ஆனால் மு.க.ஸ்டாலின், அந்தப் புத்தகங்களிலேயே ஊழல் செய்யலாம் என்ற நஞ்சையும், பல தலைமுறைகளின் சிந்தனையை அழிக்கும் விஷத்தையும் ஊழல் புத்தகங்களால் முழுமையாக விதைத்துள்ளார்,” என்று அமைச்சர் ஆதவ் அர்ஜுனா பதிவிட்டுள்ளார். இதற்கிடையில் பெரியார் அறிவுலகப் புத்தகக் கொள்முதல் ஊழல் குறித்து விசாரிக்க திமுக சார்பிலும் ஊழல் தடுப்பு இயக்குநரிடம் புகார் ஒன்று கொடுக்கப்பட்டுள்ளது.