2019 ஏப்ரல் 21 அன்று நடத்தப்பட்ட ஈஸ்டர் ஞாயிறு தொடர் குண்டுவெடிப்புத் தாக்குதல்களின் பின்னணியில், ஸஹ்ரான் ஹாஷிமிற்கு மேல் ஒரு சூத்திரதாரி (Mastermind) இருந்தே தீரவேண்டும் எனப் பாதிக்கப்பட்டவர்களின் குடும்பத்தினர் வலியுறுத்தியுள்ளனர்.
சமீபத்தில் கருத்து தெரிவித்த பிவிதுரு ஹெல உறுமயவின் தலைவர் உதய கம்மன்பில, ஈஸ்டர் தாக்குதலின் மூளையாகச் செயல்பட்டவர் தேசிய தவ்ஹீத் ஜமாஅத்தின் நிறுவனர் ஸஹ்ரான் ஹாஷிம் தான் எனத் தனது கண்டுபிடிப்புகளின் அடிப்படையில் தெரிவித்திருந்தார். இந்தக் கருத்தே தற்போது புதிய விவாதங்களைக் கிளப்பியுள்ளது.
இது குறித்து ‘ஈஸ்டர் தாக்குதலால் பாதிக்கப்பட்டவர்களின் கூட்டமைப்பின்’ தலைவர் நிஷாந்த மோகந்திரம் கருத்து தெரிவிக்கையில் ஸஹ்ரான் ஹாஷிம் மட்டும் இந்தத் தாக்குதலைத் திட்டமிட்டு நடத்தியிருக்க முடியாது.
அவருக்குப் பின்னால் இருந்து வழிநடத்திய மற்றும் உத்தரவுகளைப் பிறப்பித்த உயர்மட்ட அதிகார மையங்கள் குறித்து வெளிப்படையான விசாரணை நடத்தப்பட வேண்டும்.
“யார் உத்தரவு போட்டது என்று எங்களுக்கு இன்னும் தெரியவில்லை, ஆனால் பதிலுக்காகத் தொடர்ந்து போராடுவோம்” எனப் பாதிக்கப்பட்ட குடும்பத்தினர் விரக்தியுடன் தெரிவித்துள்ளனர்.
இந்த விவகாரம் குறித்து கொழும்பு மறைமாவட்டத்தின் ஊடகப் பேச்சாளர் அருட்தந்தை சிறில் காமினி பெர்னாண்டோ கருத்து தெரிவிக்கையில்:
விசாரணைகளைத் திசைதிருப்பவும், நீதியைத் தாமதப்படுத்தவும் சிலர் முயற்சிப்பதாக அவர் குற்றம் சாட்டினார்.
தனிநபர்களின் கருத்துகளால் திருச்சபை அசைந்துவிடாது. உண்மையான சூத்திரதாரி யார் என்பதை முறையான விசாரணை மற்றும் நீதிமன்ற நடவடிக்கைகளே தீர்மானிக்க வேண்டும்.
தாக்குதல் குறித்து யாரிடமாவது முக்கியமான தகவல்கள் இருந்தால், அவற்றை ஊடகங்களில் பேசாமல் நேரடியாகச் சட்ட அமலாக்கத் துறையிடம் (CID) ஒப்படைக்க வேண்டும் என அவர் கேட்டுக்கொண்டார்.
ஈஸ்டர் தாக்குதலின் பின்னணியில் ஒரு பரந்த சதி இருப்பதாகத் திருச்சபை நீண்டகாலமாக நம்பி வரும் நிலையில், தற்போது கம்மன்பிலவின் கருத்து விசாரணையின் போக்கை மாற்றும் முயற்சி எனப் பாதிக்கப்பட்ட தரப்பினர் கருதுகின்றனர்.
