ஈரானிய புரட்சிகர காவல்படையின் (IRGC) உளவுத்துறைத் தலைவர் மஜித் காதேமி (Majid Khademi) இன்று காலை கொல்லப்பட்டதாக ஈரானிய ஊடகங்கள் செய்தி வெளியிட்டுள்ளன.
இந்தத் தாக்குதலுக்குப் பின்னால் அமெரிக்காவும் இஸ்ரேலும் இருப்பதாக ஈரான் உத்தியோகபூர்வமாக குற்றம் சாட்டியுள்ளது. இது குறித்து இஸ்ரேலிய பாதுகாப்புப் படையினரிடம் (IDF) கேட்டபோது, அவர்கள் இந்த அறிக்கை குறித்து “ஆராய்ந்து” வருவதாகத் தெரிவித்துள்ளனர்.
கடந்த 2025 ஆம் ஆண்டு ஜூன் 15 ஆம் திகதி, ஈரான்-இஸ்ரேல் போரின் போது கொல்லப்பட்ட முகமது காசேமிக்கு (Mohammad Kazemi) பதிலாகவே மஜித் காதேமி இந்தப் பதவிக்கு நியமிக்கப்பட்டார். இப்போது ஓராண்டு காலத்திற்குள் ஈரானின் இரண்டாவது உளவுத்துறைத் தலைவரும் கொல்லப்பட்டுள்ளார்.
கடந்த ஜனவரி மாதம் ஈரானில் வெடித்த அரசு எதிர்ப்புப் போராட்டங்களின் போது, அமெரிக்க அதிபர் டொனால்ட் ட்ரம்ப் மற்றும் 10-க்கும் மேற்பட்ட வெளிநாட்டு உளவு அமைப்புகள் (இஸ்ரேலின் ‘யூனிட் 8200’ உட்பட) ஈரானில் வன்முறையைத் தூண்டியதாக காதேமி குற்றம் சாட்டியிருந்தார்.
மனித உரிமைகள் அமைப்புகளின் தகவல்படி, கடந்த ஜனவரி மாதம் ஈரானில் நடந்த போராட்டங்களின் போது சுமார் 7,000 பேர் கொல்லப்பட்டதாகத் தெரிவிக்கப்படுகிறது.
ஏற்கனவே ஹார்முஸ் ஜலசந்தி விவகாரத்தில் அமெரிக்காவுக்கும் ஈரானுக்கும் இடையே போர் பதற்றம் அதிகரித்துள்ள சூழலில், ஈரானின் மிக முக்கியமான உளவுத்துறைத் தலைவர் கொல்லப்பட்டிருப்பது மத்திய கிழக்கில் ஒரு முழு அளவிலான போருக்கான அபாயத்தை அதிகரித்துள்ளது.
