இந்தியாவிற்கு சுற்றுப்பயணம் மேற்கொண்டுள்ள ஜேவிபியின் பொதுச்செயலாளர் ரில்வின் சில்வா இந்திய வெளிவிவகார அமைச்சர் எஸ் ஜெய்சங்கரை சந்தித்து பேச்சுவார்த்தைகளில் ஈடுபட்டார்.
இந்த சந்திப்பின் பின்னர் கருத்து தெரிவித்த இந்திய வெளிவிவகார அமைச்சர் இந்தியாவிற்கும் இலங்கைக்கும் ஆழமான நட்புறவை வலுப்படுத்துவது குறித்து இரு தரப்பினரும் கலந்துரையாடியதாக தெரிவித்தார்.
நம்பகமான ஒரு பங்காளியாக இந்தியா எப்போதும் இலங்கையின் முன்னேற்றத்திற்கும் செழிப்பிற்கும் ஆதரவளிக்கும் என ஜெய்சங்கர் தனது சமூக ஊடக பதிவில் குறிப்பிட்டுள்ளார்.
இந்தியாவின் ஆளும் பாரதிஜனதா கட்சியின் பிஜேபியை அறிவோம் திட்டத்தின் கீpழ் விடுக்கப்பட்ட அழைப்பை ஏற்று செப்டம்பர் 27 திகதி முதல் ஒக்டோபர் முதலாம் திகதி வரை ஜேவிபியின் பொதுச்செயலாளர் தலைமையிலான ஐவர் கொண்ட குழுவினர் இந்தியாவிற்கு சுற்றுப்பயணம் மேற்கொண்டனர்.
இரு கட்சிகளுக்கும் இடையிலான உறவை வலுப்படுத்தவும்,அமைப்பு ரீதியான அனுபவங்களை பரிமாறிக்கொள்ளவும் தொடர்புகளை ஆழப்படுத்தவும் இந்த விஜயத்தை ஏற்பாடு செய்ததாக பாஜக தெரிவித்துள்ளது.
இந்த விஜயத்தின் போது மீனவர் விவகாரம்,அகதிகள் மீள் குடியேற்றம் குறித்தும் ஆராயப்பட்டமை குறிப்பிடத்தக்கது.
