தூத்துக்குடி
அதிமுக – திமுக கூட்டணி என்பது எந்தக் காலத்திலும் சாத்தியமில்லாத ஒன்று என்று திமுக எம்.பி. கனிமொழி திட்டவட்டமாகத் தெரிவித்துள்ளார். மேலும், ஆளும் தவெக அரசின் செயல்பாடுகளையும் அவர் கடுமையாக விமர்சித்துள்ளார்.
மத்திய அரசை எதிர்க்கத் தயங்கும் தவெக:
தூத்துக்குடி விமான நிலையத்தில் செய்தியாளர்களைச் சந்தித்த கனிமொழியிடம், சுதந்திர தின விழாவில் மத்திய அரசுடன் நிர்வாக ரீதியாக ஒத்துழைப்போடு இருப்பதாக முதலமைச்சர் விஜய் பேசியது குறித்துக் கேள்வி எழுப்பப்பட்டது. இதற்குப் பதிலளித்த அவர், “இதுவரை ஒன்றிய அரசை எதிர்த்து தவெக அரசோ அல்லது முதலமைச்சரோ எந்த ஒரு கேள்வியையும் எழுப்பியதாக எனக்கு நினைவில் இல்லை. கனிமவள மசோதா, நிதித்தொகை என மாநில உரிமையைப் பாதிக்கும் மசோதாக்கள் நிறைவேற்றப்பட்டபோதும் தவெக அரசு எந்தக் கருத்தும் தெரிவிக்கவில்லை. ‘எதிர்ப்போம்’ என்று வெறும் வாய்வார்த்தையாகக் கூறுகிறார்களே தவிர, மாநிலத்தைப் பாதிக்கும் எந்தப் பிரச்சினைகளிலும் இவர்கள் நடைமுறையில் எதிர்த்துக் குரல் கொடுப்பதில்லை,” என்று சாடினார்.
காலை உணவுத் திட்டத்திற்கு வரவேற்பு:
அதேவேளையில், காலை உணவுத் திட்ட விரிவாக்கம் குறித்த கேள்விக்கு, “முன்னாள் முதல்வர் மு.க. ஸ்டாலின் கொண்டு வந்த இந்தச் சிறப்பான திட்டத்தின் முக்கியத்துவத்தை உணர்ந்து, தற்போதைய அரசு அதை விரிவாக்கம் செய்திருப்பது நிச்சயமாக வாழ்த்தக்கூடிய ஒன்று,” என்று தெரிவித்தார்.
“அதிமுக – திமுக கூட்டணியா? அது அவர்கள் கனவு”:
அதிமுகவுடன் திமுக ரகசியக் கூட்டணி வைத்துள்ளதாகத் தவெக அமைச்சர்கள் தொடர்ச்சியாகக் கூறி வருவது குறித்த கேள்விக்கு, “அது அவர்கள் காணும் பகல் கனவாக வேண்டுமானால் இருக்கலாம்; ஆனால், அதிமுக – திமுக கூட்டணி அமைவதற்கு எந்தக் காலத்திலும் துளியும் வாய்ப்பே இல்லை,” என்று கனிமொழி திட்டவட்டமாகத் தெரிவித்தார்.
பெண்கள் பாதுகாப்பில் தவெக அரசின் அலட்சியம்:
தொடர்ந்து பாலியல் புகார்கள் மற்றும் பெண்கள் பாதுகாப்பு குறித்துப் பேசிய அவர், “தமிழ்நாடு முழுவதும் பெண்களுக்கு எதிரான குற்றங்கள் தொடர்ந்து அதிகரித்துக்கொண்டே வருகின்றன. புகார்கள் வந்தாலும், சம்பந்தப்பட்டவர்கள் மீது உடனடியாக வழக்குப்பதிவு செய்து கைது நடவடிக்கை எடுப்பதில்லை. பள்ளிகளில்கூட மாணவர்களுக்குப் பாதுகாப்பற்ற சூழலே நிலவுகிறது. குறிப்பாக, தவெக கட்சியில் உள்ள நிர்வாகிகள் மீது குற்றச்சாட்டு எழுந்தால், அவர்களைப் பாதுகாப்பதில்தான் அரசு கண்ணும் கருத்துமாக இருக்கிறதே தவிர, பாதிக்கப்பட்ட பெண்களுக்கு இங்கு நியாயம் கிடைப்பதே இல்லை,” என்று மிகக் கடுமையாக விமர்சித்தார்.
#Kanimozhi #DMK #AIADMK #ChiefMinisterVijay #JosephVijay #TVKGovernment #Thoothukudi #TNPolitics #TamilNaduNews #WomenSafetyTN #ViralNewsTN #TrendingTN #LatestNewsTN #TNNewsUpdates
