தூத்துக்குடி:

சாதாரண மனிதர்களும் மனசாட்சி உள்ளவர்களும் அரசியலில் பயணிக்க முடியாது என்றும், அரசியல்வாதிகளின் டிஎன்ஏ தனி என்றும் மதிமுக முதன்மைச் செயலாளர் துரை வைகோ மிகுந்த வேதனையுடன் கூறியுள்ளார்.

கண்ணீர் அஞ்சலி:

தூத்துக்குடி மாவட்டம் கோவில்பட்டி அருகே உள்ள கடலையூரைச் சேர்ந்த மாரிச்சாமி, மதிமுக கோவில்பட்டி கிழக்கு ஒன்றியச் செயலாளராகப் பதவி வகித்து வந்தார். இவர் உடல்நலக் குறைவு காரணமாக நேற்று காலமானார். அவருடைய உடலுக்கு மதிமுக முதன்மைச் செயலாளரும் நாடாளுமன்ற உறுப்பினருமான துரை வைகோ நேரில் அஞ்சலி செலுத்தி, குடும்பத்தினருக்கு ஆறுதல் கூறினார். தொடர்ந்து அங்கு நடைபெற்ற இரங்கல் கூட்டத்தில் பேசிய அவர், \”கடலையூர் மாரிச்சாமியின் இறப்பை என்னால் ஏற்றுக்கொள்ள முடியவில்லை,” என்று கூறிச் சில நிமிடங்கள் பேச முடியாமல் கண்ணீர் விட்டு அழுதார்.

அரசியல் வியாதி:

தொடர்ந்து நா தழுதழுக்கப் பேசிய அவர், “எனக்கு அரசியல் பிடிக்காது. அரசியல்வாதி என்று சொல்ல மாட்டேன். அரசியல் வியாதி என்றுதான் சொல்வேன். என்னுடைய அரசியல் பயணத்தில் நல்ல விஷயங்களைச் செய்யும்போது, மக்கள் கண்ணீர் மல்க நன்றி சொல்வார்கள். பொதுமக்களுக்கு நன்மை செய்வதுதான் அரசியல். ஆனால் கேடுகெட்ட அரசியலும் இருக்கிறது. சாதாரண மனிதர்களும் மனசாட்சி உள்ளவர்களும் அரசியல் பயணத்தில் பயணிக்க முடியாது. இன்றைக்கும் எனக்கு அரசியலும் பிடிக்காது, அரசியல்வாதிகளையும் பிடிக்காது. அரசியல்வாதிகளின் டிஎன்ஏ தனி, அவர்களின் குணாதிசயங்களும் தனி. அதற்குச் சிலர் விதிவிலக்காக இருக்கின்றனர். அதில் ஐயா நல்லகண்ணு, மதிமுக மற்றும் பொதுவுடைமை இயக்கங்களில் உள்ள சிலர் விதிவிலக்கானவர்கள். அவர்களில் மறைந்த மாரிச்சாமியும் ஒருவர்,” என்று புகழாரம் சூட்டினார்.

நிறைவேறாத கோரிக்கை:

மேலும் அவர் கூறுகையில், “கடலையூர் மற்றும் சுற்று வட்டாரப் பகுதிகளில் உள்ள 30 கிராமங்களுக்குத் தடையில்லாத மின்சாரம் கிடைக்க, 50 லட்ச ரூபாய் மதிப்புள்ள இடத்தைத் தானமாக வழங்கியவர் மாரிச்சாமி. திமுக ஆட்சியின்போது கோரிக்கை வைத்தும் துணை மின் நிலையம் அமைக்கப்படவில்லை. ஆட்சி மாறியதும் தற்போதைய மின்துறை அமைச்சரைச் சந்தித்துக் கோரிக்கை வைத்தோம், பணிகளைத் தொடங்கியுள்ளனர். என்னுடைய 7 ஆண்டுகால அரசியல் பயணத்தில் எவ்வளவோ விஷயங்களைச் சாதித்திருக்கிறேன். ஆனால் என்னுடைய கட்சி நிர்வாகியும் விவசாயியுமான ஒருவர் வைத்த கோரிக்கையை அவர் உயிருடன் இருந்தபோது நிறைவேற்ற முடியவில்லையே என்பதுதான் என் வேதனை. இந்தக் குறுகிய கால வாழ்க்கையில் வன்மம், பகைமை வேண்டாம். வாய்ப்புக் கிடைக்கவில்லை என்று தலைமையுடன் கோபப்படுவது அனைத்துக் கட்சிகளிலும் உள்ளது. ஆனால் அது மதிமுகவில் இருக்கக் கூடாது,” என்று அவர் தனது தொண்டர்களுக்கு அறிவுரை வழங்கினார்.